بوتون شیلر تزه‌دئر
کؤهنه نئظام کچئب گتدی و آتامیز ائنسانلارلا بئرلئکده مسکن سالیر — اؤزو اونلارین آتاسی، اوزلرئنی سیلئب قوروداراق. شهر اؤلچولموش، جاواهئرلرله بزه‌نمئش، هر طرفدن دروازالی اولاراق آشاغی انئر؛ ائچئنده معبد یوخدور، چونکی اؤزو و قوزو عئسا اونون معبدی‌دئر، و دروازالاری باغلاماغا گجه یوخدور.
21 1سونرا تزه بئر گؤی ائله تزه بئر یِر گؤردوم. چونکی بئرئنجی گؤی و بئرئنجی یِر کچمئشدی و دنیز داها یوخ ائدی. 2موقدّس شهری، تزه اورشلئمی گؤردوم کی، گؤیدن، آتامیزدان آشاغی اِنئردی، اَری اوچون بزه‌نمئش گلئن کئمی حاضیر ائدی.
3تختدن اوجا بئر سَس اشئتدئم کی، ددی: «باخ، آتامیزین مسکنی ائنسانلارلا بئرلئکده‌دئر. او اونلارلا یاشایاجاق؛ اونلار اونون خالقی اولاجاقلار و اؤزو، اونلارین آتاسی، اونلارلا اولاجاق.
4آتامیز اونلارین گؤزلرئندن هر یاشی سیله‌جک و اؤلوم آرتیق اولمایاجاق، نه ماتم، نه آغلاماق، نه ده آرتیق آغری اولاجاق، چونکی اوّلکی شیلر کچئب گتدی.»
5تختده اوتوران ددی: «باخ، من هر شیی تزه ادئرم.» سونرا ددی: «بونو یاز: بو سؤزلر اعتئبارلی و دوغرودور.» 6منه ددی: «اولدو. من آلفا و اومِگایام، باشلانیش و آخیر. سوسوز اولانا حیات سویونون چشمه‌سئندن مُفت وره‌جیم. 7غالئب گلن بونلارا وارئث اولاجاق و من اونا آتا اولاجاغام، او دا منه اوغول اولاجاق. 8آمّا قورخاقلارین، ائمانسیزلارین، ائیرنج اولانلارین، قاتئل‌لرئن، زئناکارلارین، سِحربازلارین، بوت‌پرستلرئن و بوتون یالانچیلارین پایی اود و گوگورد ائله یانان گؤلده اولاجاق کی، ائکئنجی اؤلومدور.»
9یدّی آخیرکی بلا ائله دولو یدّی کاسا توتان یدّی ملکدن بئری گلئب منه ددی: «گل، سنه گلئنی، قوزو عئسانین آروادینی گؤرسده‌رم.» 10او، منی روحدا بؤیوک و اوجا بئر داغا آپاردی و موقدّس شهر اورشلئمی منه گؤرستدی کی، گؤیدن، آتامیزدان اِنئردی، 11آتامیزین جلالینی ساچیردی، لاپ قئیمتلی جواهئر کئمی، بئللور کئمی دورو یَشَم داشی کئمی پارلاق. 12اونون بؤیوک و اوجا بئر دوواری وار ائدی، اون ائکی قاپیسی و قاپیلارین یانیندا دایانان اون ائکی ملک وار ائدی و اورادا ائسرایئل اوغوللارینین اون ائکی قبئله‌سئنئن آدلاری یازیلمیشدی، 13شرقده اوچ قاپی، شئمالدا اوچ قاپی، جنوبدا اوچ قاپی، قربده اوچ قاپی. 14شهرئن دووارینین اون ائکی بونؤوره‌سی وار ائدی و اونلارین اوستونده قوزو عئسانین اون ائکی حوارئسئنئن اون ائکی آدی یازیلمیشدی.
15منئمله دانیشان، شهری، اونون قاپیلارینی و دووارلارینی اؤلچمک اوچون، الئنده قیزیل بئر اؤلچو قامیشی توتموشدو. 16شهر مربع شکلئنده ائدی، اوزونلوغو اِنئنه برابر ائدی. اونو اؤز قامیشی ائله اؤلچدو: تخمئنَن مئن دؤرد یوز مئل؛ اوزونلوغو، اِنی و بویو برابر ائدی. 17اونون دووارینی اؤلچدو: تخمئنَن ائکی یوز اون آلتی فوت، ائنسان اؤلچوسو ائله کی، ملکئن ده اؤلچوسودور. 18دووار یَشَم داشیندان تئکئلمئشدی، آمّا شهر، شوشه کئمی دورو خالئص قیزیل ائدی. 19شهر دووارینین بونؤوره‌لری هر جور جواهئرله بزه‌دئلمئشدی: بئرئنجی یَشَم داشی، ائکئنجی لاجورد داشی، اوچونجو عقئق، دؤردونجو زومرود، 20بشئنجی دامارلی عقئق، آلتینجی یاقوت، یدّئنجی زبرجد، سکّئزئنجی آغ عقئق، دوقّوزونجو توپاز، اونونجو یَشئل عقئق، اون بئرئنجی سئرکون، اون ائکئنجی آمِتئست. 21اون ائکی قاپی اون ائکی مروارید ائدی؛ هر قاپی بئر دنه مرواریددن دوزَ‌لمئشدی. شهرئن کوچه‌سی، شوشه کئمی شفّاف خالئص قیزیل ائدی.
22شهرده هچ معبد گؤرمه‌دئم، چونکی اونون معبدی قادئری‌موطلق سلطان آتا و قوزو عئسادیر. 23شهرئن اوستونه ائشیق ساچماق اوچون، گونشه یا دا آیا احتئیاجی یوخدور، چونکی آتامیزین جلالی اونو ائشیقلاندیریر و اونون چیراغی قوزو عئسادیر. 24مئلّتلر اونون ائشیغی ائله گزه‌جکلر و یرئن پادشاهلاری اؤز جلاللارینی اونون ائچئنه گتئره‌جکلر. 25اونون قاپیلاری گوندوزلر هچ واخت باغلانمایاجاق و اورادا گجه اولمایاجاق. 26مئلّتلرئن جلالینی و عئزّتئنی اونون ائچئنه گتئره‌جکلر. 27ناپاک اولان هچ بئر شی هچ واخت اونا گئرمه‌یه‌جک، نه ده ائیرنج و یا یالان ائش گؤرن کئمسه؛ آنجاق قوزو عئسانین حیات کئتابیندا آدی یازیلان کسلر گئره‌جکلر.
