Ufunuo 21

21 ¹Kisha nikaona mbingu mpya na nchi mpya, kwa maana mbingu ya kwanza na nchi ya kwanza zilikuwa zimepita, wala hakukuwa na bahari tena. ²Nikaona mji mtakatifu, Yerusalemu mpya, ukishuka kutoka mbinguni, kutoka kwa Baba yetu, umewekwa tayari kama bibi arusi aliyepambwa kwa ajili ya mumewe.

³Nikasikia sauti kuu kutoka katika kile kiti cha enzi ikisema, "Tazama, maskani ya Baba yetu iko pamoja na wanadamu. Atakaa pamoja nao; nao watakuwa watu wake, naye mwenyewe, Baba yao, atakuwa pamoja nao.

⁴Baba yetu atafuta kila chozi machoni pao, wala mauti haitakuwapo tena, wala maombolezo, wala kilio, wala maumivu hayatakuwapo tena, kwa maana mambo ya kwanza yamekwisha kupita."

⁵Yeye aliyeketi juu ya kile kiti cha enzi akasema, "Tazama, nayafanya mambo yote kuwa mapya." Akaongeza, "Andika haya: maneno haya ni ya kuaminika na kweli." ⁶Akaniambia: "Imekwisha kuwa. Mimi ni Alfa na Omega, mwanzo na mwisho. Yeye aliye na kiu nitampa apate bure katika chemchemi ya maji ya uzima. ⁷Yeye ashindaye atayarithi haya, nami nitakuwa Baba yake, naye atakuwa mwanangu. ⁸Bali waoga, na wasioamini, na wenye machukizo, na wauaji, na wazinzi, na wachawi, na waabudu sanamu, na waongo wote—sehemu yao ni katika lile ziwa liwakalo moto na kiberiti, ndiyo mauti ya pili."

⁹Akaja mmoja wa wale malaika saba waliokuwa na vile vitasa saba vilivyojaa yale mapigo saba ya mwisho, akaniambia, "Njoo, nitakuonyesha Bibi arusi, mke wa Yesu, Mwana-Kondoo." ¹⁰Akanichukua katika Roho hata mlima mkubwa, mrefu, akanionyesha ule mji mtakatifu, Yerusalemu, ukishuka kutoka mbinguni, kutoka kwa Baba yetu, ¹¹ukionyesha utukufu wa Baba yetu, ukimetameta kama kito cha thamani kupita vyote, kama yaspi, safi kama bilauri. ¹²Ulikuwa na ukuta mkubwa, mrefu, wenye milango kumi na miwili, na malaika kumi na wawili wamesimama kwenye hiyo milango, na majina yameandikwa, ambayo ni majina ya kabila kumi na mbili za wana wa Israeli, ¹³upande wa mashariki milango mitatu, upande wa kaskazini milango mitatu, upande wa kusini milango mitatu, na upande wa magharibi milango mitatu. ¹⁴Na ukuta wa mji ulikuwa na misingi kumi na miwili, na juu yake majina kumi na mawili ya wale mitume kumi na wawili wa Yesu, Mwana-Kondoo.

¹⁵Na yeye aliyesema nami alikuwa na ufito wa dhahabu wa kupimia, ili aupime ule mji, na milango yake, na kuta zake. ¹⁶Na mji ule ni wa mraba, urefu wake sawa na upana wake. Akaupima mji kwa ule ufito: kama maili elfu na mia nne—urefu, na upana, na kimo chake ni sawasawa. ¹⁷Akaupima ukuta wake—kama futi mia mbili na kumi na sita, kwa kipimo cha kibinadamu, ndicho pia cha malaika. ¹⁸Na ukuta wake ulijengwa kwa yaspi, na mji ule ulikuwa dhahabu safi, kama bilauri safi. ¹⁹Na misingi ya ukuta wa mji ilikuwa imepambwa kwa kila namna ya kito cha thamani: msingi wa kwanza yaspi, wa pili yakuti samawi, wa tatu kalkedoni, wa nne zumaridi, ²⁰wa tano sardoniki, wa sita akiki, wa saba krisolitho, wa nane zabarajadi, wa tisa yakuti ya manjano, wa kumi krisopraso, wa kumi na moja hiakintho, na wa kumi na mbili amethisto. ²¹Na ile milango kumi na miwili ilikuwa lulu kumi na mbili, kila mlango ni lulu moja. Na njia kuu ya mji ilikuwa dhahabu safi, kama bilauri ing'aayo.

²²Nami sikuona hekalu ndani yake, kwa maana Bwana Baba Mwenye Enzi Mwenyezi ndiye hekalu lake, pamoja na Yesu, Mwana-Kondoo. ²³Na mji ule hauhitaji jua wala mwezi kuuangaza—kwa maana utukufu wa Baba yetu unautia nuru, na taa yake ni Yesu, Mwana-Kondoo. ²⁴Na mataifa watatembea katika nuru yake, na wafalme wa dunia wataleta utukufu wao ndani yake. ²⁵Na milango yake haitafungwa kamwe mchana—kwa maana hakutakuwa na usiku huko. ²⁶Nao wataleta ndani yake utukufu na heshima ya mataifa. ²⁷Wala hakitaingia ndani yake kitu chochote kilicho najisi, wala mtu ye yote atendaye machukizo na uongo—ila wale walioandikwa katika kitabu cha uzima cha Yesu, Mwana-Kondoo.