Phetphan Pendou Haanbü
Shaangbü shuong danjung haukei, hoba seneibü Bou müt yoa lemshang kikei—haoei himshuong haoeneibü Bou, haoeneibü nyek sat kunyu. Sangnyu kho amakhetbü, ponlemhibü shuong yoa shoubü, jiji to bakhün kibü, louyenkei; insiaubua sang chem aki, aishanga hao si Lambo khoeibü sang chem ki, hoba bakhün shuttila shanga touje nangnak aki.
21 1Kheijinei ngei khuthük haanbü si kaodak haanbü hapbei, aishanga shaangbou khuthük si shaangbou kaodak danjung haukei, hoba chükhuang touje akitei. 2Ngei saopobü sangnyu, Jerusalem haanbü, seneibü Bou jungka khuthük ka louyenko kibü hapbei, kho leiyetnyu che hao lao shanga nei kaian lamleettian kibü tegü kikei.
3Hobaje ngei Choba setshang ka ngüh yaangbü laubü ditkei, “Chühashi, seneibü Bou lemshang müt yoa kia. Haoei haoen yoa kilabü; haoen hao mütshuong yeilabü, hoba hao himshuong, haoeneibü Bou, haoen yoa kilabü.
4Seneibü Bouei haoeneibü nyek ka nyekdei pendou mautilabü, hoba hai touje akilabü, mang haapbü kei akilabü, ngekbü kei, onat kei touje akilabü, aishanga shaangbou phetphan danjung haukei.”
5Choba setshanga setbouei laukei, “Chühashi, ngei phetphan pendou haanbü yeitida.” Hoba haoei laukei, “Ho doashi, ho ngüh shuong mailembü hoba ngühmai ki.” 6Haoei kü to laukei, “Wantikei. Ngo Alfa hoba Omega, khangshang hoba thonshang ki. Deilabü to langkei dei deikhün ka ngei amakhetko kulabü. 7Aoei thükbaje ho shuong pailetlabü, hoba ngo haoeibü Bou yinglabü, hoba hao ngeibü shou yeilabü. 8Lausikei haiyetnyu shuong, asangalanbü shuong, mangsenbü shuong, müt haitibü shuong, siisiphe kümbü shuong, huonseibü shuong, heangsho to khangenbü shuong, hoba amlangbü lenbou shuong pendou—haoeneibü phejan wan si wanküh laangei juokbü deiyaang ka kilabü, kho nyiboubü hai ki.”
9Thonbü shieikoe nyetei shenbü buphau nyet jungbü khuthük hangangbü nyet yoa che kü jungto lotkei, hoba kü to laukei, “Loushi, ngei ka to leiyetnyu, Jisu Lambeibü yak kho lenlabü.” 10Haoei Soushoua ngo shongh yaangbü juongbü che to jungan satkei, hoba haoei seneibü Bou jungka khuthük ka louyenko kibü saopobü sangnyu Jerusalem kü to lenkei, 11kho seneibü Bou soneikangbüei shenkei, hoba haoeibü ngesakbü namseklaang tokei namsek jasper laang, krustal tegü namsek kikei. 12Kho banyu yaangbü juongbü che kikei, bakhün anthüknyi yoa, hoba khübü ka khuthük hangangbü anthüknyi loan kikei, hoba khübü ka Israel shousi chung anthüknyieibü nyen doan kikei, 13chanyu phamshang aenei bakhün sem, khükhu aenei bakhün sem, yemkhu aenei bakhün sem, chanep aenei bakhün sem. 14Sangnyu banyu chemshang anthüknyi kikei, hoba khübü ka Jisu Lambü youkoikjai anthüknyieibü nyen anthüknyi doan kikei.
15Kü to joyobouei sangnyu, khübü bakhün shuong hoba khübü banyu takanchühla shanga hon takanchühbü kamtho jungkei. 16Sangnyu kho nyek lei pendou jeteitei kikei, khübü süng si khaang jeteitei kikei. Haoei jembü kamthoei kho takanchühkei, mail hajar cheto saongao lei abou kikei—süng, khaang hoba suokbü jeteitei kikei. 17Haoei khübü banyu takanchühkei—müteibü takan thüng fit lalok nyi anthüklak abou kikei, kho khuthük hangangbübü takan kei ong kia. 18Banyu kho jasper laangei dangbü kikei, lausikei sangnyu kho hon lanbü, glass tegü namsek kikei. 19Sangnyu banyu chemshang shuong namseklaang phang weko pendoueibü naanglepan kikei: shaangbou jasper laang, nyiboubü safair laang, semboubü aget laang, leiboubü emerald laang, 20ngaoboubü oniks laang, lakboubü sardis laang, nyetboubü krisolait laang, setboubü beril laang, güboubü topaz laang, anthükboubü krisopres laang, anthükche boubü jacint laang, hoba anthüknyi boubü amethis laang. 21Bakhün anthüknyi kho muti anthüknyi kikei, bakhün weko muti che chenei kümbü kikei. Sangnyubü khong kho hon lanbü, glass tegü namsek kikei.
22Ngei sangnyu ka chema aikei ahapkei, aishanga Pendou Thükenbou Bou hoba Jisu Lambü kho khübü chema ki. 23Sangnyu la kho thüka ngesakla shanga chanyu ayingsi litnyu akhamkei, aishanga seneibü Bou soneikangbüei kho ngesaktida, hoba khübü wanthung kho Jisu Lambü ki. 24Phang shuongei khübü ngesakbüa paitilabü, hoba kaodak Choba shuongei haoeneibü soneikangbü khünei jungan atlabü. 25Hoba chaloua khübü bakhün ongkei akhinlabü—hoba khünei nangnak akilabü. 26Haoenei phang shuongeibü soneikangbü hoba nyensang khünei jungan atlabü. 27Asaopobü aikei, mangsenbü ayingsi amlangbü kümbü aokei, khünei ongkei alotlabü; Jisu Lambeibü langkei le ka doan kibü shuong ong lotlabü.
