Phongkhami 21

21 ¹Chiwui thili ina kazingram kadhar kala okathui kadhar akha thei, khikhalajila kazingram khare kala okathui khare chi thuihaira, kala shamadru maleiluimana. ²Ina khām kahaiva̱ agaharawui vang kashankachon ngavaida shaksākharik kathā, kathara keinung, Jerusalem kadhar chi, ithumwui Avāwui eina kazingramwui eina katāda thei.

³Ina wungpamkhongwui eina panglāk eina akhon akha shai, "Yanglu, ithumwui Avāwui pamkhavai mibingli ngasoda lei. Ana athumli ngasoda pānra; athum awui mibing ngasāra, kala athumwui Avā a khalattana athumli ngasoda leira.

⁴Ithumwui Avāna athumwui mik eina mikthi saikora malaichaohaora, kala kathi, sifaya, chapkhangachā kala kachot akhala maleiluimara, khikhalajila kachama chi thuihaira."

⁵Wungpamkhongli kapamapā china hānga, "Yanglu, ina ot saikora chi kadhar sāra." Ana ngarorda hānga, "Hi kapilu: tui hi chānsam kala khamashungna." ⁶Ana ili hānga, "Sāchithei kahaina. I Alpha eina Omegana, haokaphok eina katangana. Ra̱changhaobingli ina kharingwui tara̱ uraokwui eina lemmet eina mira. ⁷Khayuiapā china hibing samphangra, kala ina awui Avā ngasāra, kala ana iwui naomayara ngasāra. ⁸Kha mao kahaibing, shitkasang makhaleibing, ningkakachai ot kasābing, mi shaokathatbing, khamathang-khamarangbing, shāmkasābing, meoma̱li khokharumbing, kala kakapika mi saikorawui sharuk hi mei kala meiri eina chuikatā ngayili leira, hi thi kakhanena."

⁹Kazātyur khanaowa shini pemda kahai koklui shini singkasā kazingrao shini akhana ili rāhānga, "Rālu, ina nali khām kahaiva̱, Yaonao Jishuwui preiva̱ chi chitheira." ¹⁰Ana Manglā eina ili kaphung haklak kala kajuiva̱li khuivāda, kathara keinung Jerusalem chi ithumwui Avāwui eina kazingramwui eina katāda ili chithei, ¹¹ithumwui Avāwui tekhamatei chitheimi, aman kasaka ngalung khamathāthā jasper kathā horchamri, mathingrik eina horchamri kahaina. ¹²Chili ngavei tharāda khani kakā phākho haklak kala kajuiva̱ akha lei, ngaveibingli kazingrao tharāda khani pamngasaka, kala Israelwui naomayarabingwui shang tharāda khaniwui aming chili kapihaida lei, ¹³zingshoshongli ngavei kathum, atungshongli ngavei kathum, azingshongli ngavei kathum, zingtunshongli ngavei kathum. ¹⁴Keinungwui phākho chi shimphunga tharāda khani kai, shimphungabingtungli Yaonao Jishuwui paokazat tharāda khaniwui aming tharāda khani kapihaida lei.

¹⁵Ili ngazekta khalei china keinung, chiwui ngaveibing, kala phākho tamkhavai sināwui onkhavai thing akha singa. ¹⁶Keinung chi ngaphora, asānla aretla ngaraichā. Ana thing eina chi tama: mile thingkha shāmati shakha; asān, aret kala kajui ngaraichāra. ¹⁷Ana miwui tam eina chiwui phākho tama: feet shākhani tharāda tharuk shakha. Chi kazingraowui tamla ngaraichāra. ¹⁸Phākho chi jasper eina sākahaina, kha keinung chi sinā kachanga, mengshen thada mathingrik kahaina. ¹⁹Keinung phākhowui shimphungabing aman kasaka ngalungyur kachiva̱ eina rommithaisai: khare china jasper, kakhane china sapphire, kakathuma china agate, khamate china emerald, ²⁰kaphangā china onyx, katharuka china cornelian, kashine china chrysolite, kachishata china beryl, kachiko china topaz, katharā china chrysoprase, tharāda khare china jacinth, kala tharāda kakhane china amethyst. ²¹Ngavei tharāda khani chi pearl tharāda khanina, ngavei kachiva̱ pearl akha eina sākahaina. Keinungwui chānrei chi sinā kachanga, mengshen thada mathingrik kahaina.

²²Ina keinung chili khorumshim akhala matheithuwa, kaja Sāshap-pangshapa Avā kala Yaonao Jishu chi chiwui khorumshimna. ²³Keinung chili horkhavai zimik kala kachāng masāvaimara, kaja ithumwui Avāwui tekhamateina chi horngasaka, kala Yaonao Jishu chi chiwui thaomeina. ²⁴Miyurbing china chiwui kahor eina zatra, kala okathuiwui awungabing china athumwui tekhamatei chiwuili khuirāra. ²⁵Kala chiwui ngaveibing ngashunshong khipākha mashunghaimara, kala chili ngayā mavaimara. ²⁶Athumna miyurbingwui tekhamatei kala khayākakā chi chiwuili khuirāra. ²⁷Makathar ot akhala chiwuili mazangpaimara, lah ningkakachai ot kala kakapik ot kasā mi akhalala mazangpaimara; kha Yaonao Jishuwui kharingawui lairikli kapisang kahaibing maningla zangshapra.