Dragonli Khalaphaikahai
Satanli kum thingkha mari-khara̱ eina khalapa, sāyurli makhoruma raobingna wungda lei. Pheishok kahaiva̱ ana yurbingli thingkhapāng ngaranghaora, kala ithumwui Avāwui eina meina athumli shaihāk. Chiwui thili lairikbing phonga, kala kathibingli athumna sākahai athishurda bichar sā. Kathi khalattali horshokhaira.
20 1Ina kazingrao akha kazingramwui eina tāda theilui, awui pāngli makatang leizingkhurwui sho kala chaiyāng kahak akha singsai. 2Ana achālakha phara̱, chipee kala Satanna kaji dragon chili tukkhuilaga, ali zingkum thing khalaphaihaowa. 3Zingkum thing kuphairanglakha eina tangda yurbingli machipat khavai, ana ali makatang leizingkhurli horsangda, ali shungtitta awuitungli saphinhaowa; chithang eina a kasha̱khawui vang ningkhān ngasakhaora.
4Ina wungpamkhongbing thei; chiwuitungli kapamabingna bichar sākhavaiwui pangshap samphanga. Kala Jishu kala ithumwui Avāwui Tuiwui shākhi kahaiwui vang kui arangkhuikasābingwui manglā chila ina thei. Athum sāyur lah awui ama̱li makhorumbing, kala awui khudam chi najeeli lah pāngli makhuisangbingna. Athum ringluida Khristali ngasoda zingkum thing munga. 5(Kathi kateibing chiya zingkum thing kuphairanglakha eina tangda maringmana.) Hina ringkhalui kharena. 6Ringkhalui khareli sharuk khaleibing chi sokhami kala kathara ngasāranu; kathi kakhane china athumwuitungli pangshap maleimana, kha athum ithumwui Avā kala Khristawui pāngmonbing ngasāra, kala ali ngasoda zingkum thing mungra.
Satan Shokngasakhai
7Zingkum thing kuphaira eina, Satanli awui phātopwui eina ningkhān ngasakhaora. 8A okathuiwui achikun matili khalei yurbing, Gog kala Magogli, chipat khavai shokra, kala raiwui vang athumli kazipkhuira; athumwui mashing shamadruwui situi yākhana. a a v8 Gog kala Magog chiya yur khani maningmana, kha chānjamna, Ezekiel marānwui lairikwui eina hokahai, okathuiwui, ithumwui Avāwui mibingli ngararthang khavai khangarum kahāng makhangānā miyur saikorawui vang. 9Athum okathuiwui aret hup peida muivai, kala katharabingwui rāmrah kala leikashe keinung chi kuinama; kha kazingramwui eina, ithumwui Avāwui eina mei tāhaida athumli chuitai. 10Athumli chipatkasā chipee chi sāyur kala minama marān chi khalei pam, mei kala meiri ngayili horsanghaowa. Athum ngashun ngayā katang makhavai mashimānda ningrāk ngasakra.
Wungpamkhong Kahak Kachar
11Ina wungpamkhong kachar kahakva akha kala chiwuitungli kapama chi thei. Awui mangā eina okathui kala kazingram yāmhaowa; athumwui vang pam akhanida matheithuwa. b b v11 Naomeikapta bichar sāwui wungpamkhong kachar kahakva chiya ithumwui Avāwui wungpamkhongna. Atam saikorali ringkahai mi kachiva̱na awui mangāli nganinga. 12Ina kathibing, kharei kala kateo, wungpamkhong mangāli nganingda thei. Lairikbing shohaowa, kala kharingwui lairik kaji khangatei akhala shohaowa. Lairikbingli kapihaikasā eina kathibing chili, mi kachiva̱li awui otsak athishurda bichar sāhaowa. 13Shamadruna awui kathibing chi khuishokhaowa; kathi kala chikhurna athumwui kathibing chi khuishokhaowa; mi kachiva̱li awui otsak athishurda bichar sāhaowa. 14Kathi kala chikhur chi mei ngayili horsanghaowa. Mei ngayi hi kathi kakhanena. 15Kharingwui lairikli awui aming kapihaida matheikasa mi chi mei ngayili horsanghaowa.
