Me basika na mukanda
Dibuku

Dalagona ya Ba me Kanga

Satana ke kangama bamvula funda, ntangu bambangi yina buyaka kibulu ke yala. Ntangu ba ke bika yandi, yandi ke vukisa bayinsi mbala ya nsuka, mpe tiya yina katuka na Tata ya beto ke dya bawu. Na manima, ba ke zibula mikanda mpe ba ke fundisa bantu ya kufwa na kutadila mambu yina bawu salaka. Lufwa yawu mosi, ba ke losa yawu na ngaanda.

Kapu 20.

Mu talaka mbazi mosi ya mazulu ke kulumuka na zulu, yandi vwandaka na diboko fungula ya dibulu ya mudimba mpe musanga ya nene. Yandi simbaka dalagona, nyoka ya ntangu ya ntama, yina kele dyabulu mpe Satana, mpe yandi kangaka yandi bamvula 1.000. Yandi losaka yandi na kati ya dibulu ya mudimba, yandi kangaka mpe tulaka kinyemo na zulu ya yandi, samu na kukanga yandi na kuvuna dyaka natina ve tii ntangu bamvula 1.000 ke kwiza suka. Na manima, ba fwana kubika yandi kaka mwa ntangu.

Mu talaka bakiti ya kintinu. Bayina vwandaka ya kuvwanda na zulu ya yawu bakaka lulendo ya kufundisa. Mu talaka mpe milunda ya bayina ba zengaka laka samu na kimbangi ya bawu na Yesu mpe samu na mpova ya Tata ya beto. Bawu vwandaka me fukama ve na ntadisi ya mbisi ya nkakala to na kifwani ya yawu, mpe bawu ndimaka ve kidimbu ya yawu na mbunzu to na diboko. Bawu kumaka na moyo mpe bawu yalaka kintwadi na Klisto bamvula 1.000. (Bantu ya nkaka yina fwaka vwandaka na moyo ve tii ntangu bamvula 1.000 kwizaka suka.) Yayi kele mvumbukulu ya ntete. Kyese mpe kuvwanda ya longo na muntu yina kele na kitini na mvumbukulu ya ntete. Lufwa ya zole kele na lulendo ve na zulu ya bawu, kasi bawu ke vwanda banganga-Nzambi ya Tata ya beto mpe ya Klisto, mpe bawu ke yala kintwadi na yandi bamvula 1.000.

Ba Bikaka Satana

Ntangu bamvula 1.000 ke kwiza suka, ba ke bika Satana na boloko ya yandi. Yandi ke kwenda kuvuna bantu ya makanda na bansongi yiya ya ntoto, Ngonge mpe Mangonge, samu na kuvukisa bawu samu na mvita. Lutangu ya bawu ke vwanda mingi mutindu munyenge ya mubu. a a v8 Ngonge mpe Mangonge kele ve makanda zole ya kyeleka, kasi yawu kele bidimbu, yina katukaka na mumbikudi Ezekiele, samu na bantu nyonso ya kolama ya ntoto yina ba me vukana samu na kunwanisa bantu ya Tata ya beto. Bawu kwendaka na yinsi nyonso ya ntoto, mpe bawu zungaka nganda ya basantu mpe mbanza ya kuzolakana, kasi tiya katukaka na Tata ya beto na zulu mpe fwaka bawu. Dyabulu yina vunaka bawu, ba losaka yandi na dyanga ya tiya yina ke pela na sufe, kisika mbisi ya nkakala mpe mumbikudi ya luvunu vwandaka. Ba ke nyokola bawu mwini na mpimpa seko na seko.

Kiti ya Kintinu ya Nene ya Mpembe

Mu talaka kiti ya kintinu ya nene ya mpembe mpe muntu yina vwandaka na zulu ya yawu. Ntoto mpe zulu kimaka na ntadisi ya yandi, mpe kisika mosi vwandaka dyaka ve samu na bawu. b b v11 Kiti ya kintinu ya nene ya mpembe ya lufundusu ya nsuka kele kiti ya kintinu ya Tata ya beto. Konso muntu yina me zinga bantangu nyonso ke telama na ntadisi ya yandi. Mu talaka bantu ya kufwa, ya nene mpe ya fyoti, ya kutelama na ntadisi ya kiti ya kintinu. Ba fungulaka bamikanda, mpe ya nkaka, mukanda ya luzingu. Ba fundisaka bantu ya kufwa na mambu yina vwandaka ya kusonika na bamikanda, konso muntu na mavanga ya yandi. Mubu vutulaka bantu ya kufwa ya yandi, Lufwa mpe Ndyamu vutulaka bawu ya bawu. Ba fundisaka konso muntu na mambu yina yandi salaka. Ba losaka Lufwa mpe Ndyamu na kati ya dyanga ya tiya. Yayi kele lufwa ya zole, dyanga ya tiya. Konso muntu yina nkumbu ya yandi ba talaka ve ya kusonika na mukanda ya luzingu, ba losaka yandi na kati ya dyanga ya tiya.