ራእይ 20

20 ¹ከሰማይ ሲወርድ የነበረ መልአክን አየሁ፤ በእጁም የጥልቁን ቍልፍና ታላቅ ሰንሰለት ይዞ ነበር። ²ዘንዶውን፣ የቀደመውን እባብ፣ ዲያብሎስንና ሰይጣንን ያዘው፤ ሺሕ ዓመትም አሰረው። ³ወደ ጥልቁም ጣለው፤ ሺሕ ዓመት እስኪፈጸም ድረስ ሕዝቦችን እንዳያስት በላዩ ዘግቶ አተመበት፤ ከዚያም በኋላ ለጥቂት ጊዜ ሊፈታ ይገባዋል።

⁴ዙፋኖችንም አየሁ፤ በእነርሱ ላይ የተቀመጡትም የመፍረድ ሥልጣን ተሰጣቸው። ስለ ኢየሱስ ምስክርነትና ስለ አባታችን ቃል አንገታቸው የተቈረጠ፣ አውሬውንም ሆነ ምስሉን ያልሰገዱለት፣ ምልክቱንም በግንባራቸው ወይም በእጃቸው ያልተቀበሉ ሰዎች ነፍሳትን ደግሞ አየሁ። ሕያዋንም ሆኑ፤ ከክርስቶስ ጋራ ሺሕ ዓመት ነገሡ። ⁵(የቀሩት ሙታን ግን ሺሕ ዓመት እስኪፈጸም ድረስ ሕያዋን አልሆኑም።) ፊተኛው ትንሣኤ ይህ ነው። ⁶በፊተኛው ትንሣኤ የሚካፈል ብፁዕና ቅዱስ ነው፤ ሁለተኛው ሞት በእነርሱ ላይ ሥልጣን የለውም፤ ነገር ግን የአባታችንና የክርስቶስ ካህናት ይሆናሉ፤ ከእርሱም ጋራ ሺሕ ዓመት ይነግሣሉ።

ሰይጣን ተፈታ

⁷ሺሕ ዓመት በተፈጸመ ጊዜ ሰይጣን ከእስር ቤቱ ይፈታል። ⁸በምድርም አራት ማዕዘን ያሉትን ሕዝቦች፣ ጎግንና ማጎግን ሊያስት ይወጣል፤ ለሰልፍም ያከማቻቸዋል፤ ቍጥራቸውም እንደ ባሕር አሸዋ ነው። ^a a v8 ጎግና ማጎግ ሁለት በቍም ነገር ያሉ ሕዝቦች አይደሉም፤ ነገር ግን ከነቢዩ ሕዝቅኤል የተወሰዱ፣ በአባታችን ሕዝብ ላይ የተሰበሰቡትን የምድርን ዐማፅያን ሕዝቦች ሁሉ የሚያመለክቱ ምሳሌዎች ናቸው። ⁹በምድርም ስፋት ሁሉ ተስፋፍተው የቅዱሳንን ሰፈርና የተወደደችውን ከተማ ከበቡ፤ ነገር ግን ከአባታችን ዘንድ ከሰማይ እሳት ወርዶ በላቸው። ¹⁰ያስታቸውም ዲያብሎስ አውሬውና ሐሰተኛው ነቢይ ወዳሉበት ወደ እሳትና ዲን ባሕር ተጣለ። ለዘላለም ዓለምም ቀንና ሌሊት ይሠቃያሉ።

ታላቁ ነጭ ዙፋን

¹¹ታላቅ ነጭ ዙፋንንና በእርሱ ላይ የተቀመጠውን አየሁ። ምድርና ሰማይ ከፊቱ ሸሹ፤ ስፍራም አልተገኘላቸውም። ^b b v11 የመጨረሻው ፍርድ ታላቁ ነጭ ዙፋን የአባታችን ዙፋን ነው። ኖሮ የሚያውቅ ሰው ሁሉ በፊቱ ይቆማል። ¹²ታናናሾችንና ታላላቆችን ሙታን በዙፋኑ ፊት ቆመው አየሁ። ጥቅልሎችም ተከፈቱ፤ ሌላም ጥቅልል፣ የሕይወት መጽሐፍ ተከፈተ። ሙታንም በጥቅልሎች ተጽፎ በተገኘው፣ እያንዳንዱም እንደ ሥራው ተፈረደባቸው። ¹³ባሕር በውስጡ የነበሩትን ሙታን አወጣ፤ ሞትና መቃብርም በእነርሱ ዘንድ የነበሩትን ሙታን አወጡ፤ እያንዳንዱም እንዳደረገው ተፈረደበት። ¹⁴ሞትና መቃብር ወደ እሳት ባሕር ተጣሉ። ይህም የእሳቱ ባሕር ሁለተኛው ሞት ነው። ¹⁵ስሙ በሕይወት መጽሐፍ ተጽፎ ያልተገኘ ሁሉ ወደ እሳት ባሕር ተጣለ።