Pot Bing Kathan Thangnu
Kamanu lamchat bing ga se drwe, khatle ani Pa mi nun le diga ongme—Maan baraanto bani Pa gana, bani mik pina mikthi bing kanun sat thangluga. Namlian ga badat thangluga, kachaak baman kungnu lung na kasem, taki bina inkhaanmun amga, kanu hungne; basung bi bathiangnu in am make, balangbe Maan khatle Zao saza ga haba om bathiangnu in gaye, khatle inkhaanmun khaan lang zingpha le amla rwe.
Ani Pa na chongkhak hei bing bi kabia nge 3, 5–8
21 1Atiga eina tambaan kathan khatle talei ram kathan ding mu rwe, balangbe thoutannu tambaan khatle thoutannu talei ram ga se drwe, khatle tuipui ga amla rwe. 2Eina bathiangnu namlian, Jerusalem kathan ga tambaan lana, ani Pa khouna kanu, baom tazwanpa lang pon sin basoinu tazwannu danga daanga ongnu ding mu rwe.
3Takung riak lana hungnu basaangnu khwan khatna rinnu eina ngaisu rwe, “Phaang ngo, ani Pa om pwan in ga mi nun le diga ongme. Maan bani le diga onglune; bani ga Baom mi nun onglune, khatle Maan Bapum, bani Pa gana, bani le diga onglune.
4Ani Pa na bani mik pina mikthi bing ding kanun sat thanglune, khatle thinu ga am lat pila rwe, nu hweinu le amla rwe, chapnu le amla rwe, naalai le am lat pila rwe, balangbe thoutannu thinu bing ga se drwe.”
5Takung riak pi badung ongnu Bating na rinne, “Phaang ngo, Eina pot bing lu ding kathan thang nge.” Maanna atiga rinne, “Heiya hiakro: hei chong bing ga balumsanu khatle bazenuwe.” 6Maanna akhou rinne, “Pungpha ta rwe. Ei Alpha khatle Omega, Kamanu khatle Kakhamnu gaye. Taraannu maan khou ringnu tui tuipwak in bina Eina bathaam in pi dingnuwe. 7Ngam hungnu maan gana hei bing ding rakhum danga lousulune, khatle Eina maan om Pa onglune, khatle maan ga Asa onglune. 8Atiyeda kachinu nun, balumsa maknu nun, batannu nun, mi athatnu bing, lungkoi lungmaannu bing, dwei choinu bing, ri katha kalumnu bing khatle chong karwaknu bing lu om khak ga mei khatle chok ga rounu tuikhun bi ongme, haga thi leng ninu gaye.”
9Kakhamnu ripian siari sipnu kam siari ding choi ongnu tambaan chonglang siari lak pi pakhatna akim bi hungluga akhou rinne, “Abeiya hung ngo, tazwannu, Zao saza Jisu om zanu ding Eina nakhou pi mu thangne.” 10Maanna Katha bi ei ding kaliannu basaangnu rammwan khou kai thou rwe, khatle tambaan lana, ani Pa khouna kanu bathiangnu namlian Jerusalem ding akhou pi mu thang rwe, 11Haba namlian ga ani Pa om lwat theinu ga choi ongme, baom baannu ga baman kungnu lung jasper lung danga, crystal danga bathing ring ringnu ngaake. 12Haba namlian ga kaliannu basaangnu kapan am ngaake, inkhaan somga kani le amme, inkhaan bing bi tambaan chonglang somga kani ga han ongme, khatle Israel chaat om phum somga kani om nameng bing ga habei ga hiak thang nge, 13Lumik swak lang inkhaan inthum, kasak lang inkhaan inthum, kathwei lang inkhaan inthum, lumik taak lang inkhaan inthum amme. 14Namlian om kapan ga inphung somga kani am ngaake, haba bing chung bi Zao saza Jisu om chonglang somga kani om nameng somga kani ga hiak thang nge.
15Ei le kabianu maanna namlian, baom inkhaan bing khatle baom kapan bing ding badat lang kachaak badat thingrwa khat choi ongme. 16Haba namlian ga bazai pali khatchanu ongme, baleng khatle balian ga khatchaye. Maanna baom thingrwa gana haga badat rwe, mile razaga khatle raza pali khak namlaa ongme; baleng, balian khatle basaangnu ga khatchaye. 17Maanna baom kapan ga badat rwe, feet raza kani khatle somga karuk khak namlaa ongme, haga misa om badat danga, tambaan chonglang om badat le khatchaye. 18Kapan ga jasper lungna bacha ngaake, atiyeda namlian ga glass danga bathing ring ringnu kachaak bathiangnu ngaake. 19Namlian kapan om inphung bing ga baman kungnu lung chamchatna soi thang nge: kamanu inphung ga jasper, kaninu sapphire, inthumnu agate, balinu emerald, 20impaangnu onyx, karuknu carnelian, siarinu chrysolite, kariatnu beryl, kukunu topaz, somnu chrysoprase, somga khatnu jacinth, khatle somga kaninu amethyst. 21Inkhaan somga kani ga mukta somga kaniye, inkhaan pakhat khat ga mukta singchak khatna bacha ngaake. Namlian om lampui pui ga glass danga bathing ring ringnu kachaak bathiangnu ngaake.
22Eina namlian bi Rikrwang in khatchale mu make, balangbe baom Rikrwang in ga Ngam Bachangnu Pa Pukraangba khatle Zao saza Jisu gaye. 23Haba namlian ga baom chung bi baan lang lumik le tha le batik cha make, balangbe ani Pa om lwat theinuna haga baan thang nge, khatle baom thaomei ga Zao saza Jisu gaye. 24Chaat bingna baom baannu bina sen lune, khatle talei ram om krwang bingna bani om lwat theinu ding haba sung khou lwang hunglune. 25Baom inkhaan bing ga ha bing bi khatchale khop satla rwe, khatle habei ga thamlai ga amla rwe. 26Chaat bing om lwat theinu khatle bani om bakhopnu ding haba sung khou lwang hunglune. 27Bathiang maknu pot khatchale haba sung khou khut lat pila rwe, batannu mak tabe chong karwaknu ding tonu maan le khut lat pila rwe, atiyeda Zao saza Jisu om ringnu chongdip pi hiak thangnu nunna khutlune.