ምሳሌ 13

13 ¹ጠቢብ ልጅ የአባቱን ተግሣጽ ይሰማል፤ ፌዘኛ ግን ዘለፋን አይሰማም። ²ሰው ከአንደበቱ ፍሬ መልካም ነገርን ያጣጥማል፤ የከዳተኞች ፍላጎት ግን ግፍ ነው። ³አንደበቱን የሚጠብቅ ሕይወቱን ይጠብቃል፤ ከንፈሩን የሚያላላ ግን ጥፋት ይደርስበታል። ⁴ሰነፍ ሰው ይመኛል፤ ነገር ግን ምንም አያገኝም፤ የትጉህ ፍላጎት ግን ፍጹም ይረካል። ⁵ጻድቅ ሐሰትን ይጠላል፤ ክፉ ሰው ግን ነውርንና ውርደትን ያመጣል። ⁶ጽድቅ መንገዱ ንጹሕ የሆነውን ይጠብቃል፤ ክፋት ግን ኀጢአተኛውን ይገለብጣል። ⁷አንዱ ሀብታም መስሎ ይታያል፤ ነገር ግን ምንም የለውም፤ ሌላው ድኃ መስሎ ይታያል፤ ነገር ግን ብዙ ሀብት አለው። ⁸የሰው ሀብት ሕይወቱን ይቤዠዋል፤ ድኃ ግን ዛቻን አይሰማም። ⁹የጻድቃን ብርሃን በደስታ ያበራል፤ የክፉዎች መብራት ግን ይጠፋል። ¹⁰ትዕቢት ጠብን እንጂ ሌላ አያስገኝም፤ ጥበብ ግን ምክርን ከሚፈልጉ ጋራ ናት። ¹¹በማጭበርበር የተገኘ ሀብት ይመናመናል፤ ጥቂት በጥቂት የሚሰበስብ ግን ያበዛዋል። ¹²የዘገየ ተስፋ ልብን ያሳምማል፤ የተፈጸመ ምኞት ግን የሕይወት ዛፍ ነው። ¹³ቃልን የሚንቅ በራሱ ላይ ጥፋትን ያመጣል፤ ትእዛዝን የሚያከብር ግን ይሸለማል። ¹⁴የጠቢባን ትምህርት የሕይወት ምንጭ ነው፤ ሰውን ከሞት ወጥመድ ያርቃል። ¹⁵መልካም ማስተዋል ሞገስን ያስገኛል፤ የከዳተኞች መንገድ ግን ጥፋታቸው ነው። ¹⁶አስተዋይ ሰው ሁሉ በዕውቀት ይሠራል፤ ሞኝ ግን ሞኝነቱን ያሳያል። ¹⁷ክፉ መልእክተኛ በመከራ ውስጥ ይወድቃል፤ ታማኝ መልእክተኛ ግን ፈውስን ያመጣል። ¹⁸ተግሣጽን ለሚንቅ ድኽነትና ውርደት ይደርስበታል፤ ዕርማትን የሚቀበል ግን ይከበራል። ¹⁹የተፈጸመ ምኞት ለነፍስ ጣፋጭ ነው፤ ከክፋት መራቅ ግን ለሞኞች አስጸያፊ ነው። ²⁰ከጠቢባን ጋራ የሚሄድ ጠቢብ ይሆናል፤ የሞኞች ባልንጀራ ግን ጉዳት ይደርስበታል። ²¹መቅሰፍት ኀጢአተኞችን ያሳድዳል፤ መልካም ነገር ግን ጻድቃንን ይሸልማል። ²²መልካም ሰው ለልጅ ልጆቹ ርስትን ያወርሳል፤ የኀጢአተኛ ሀብት ግን ለጻድቅ ይከማቻል። ²³ያልታረሰ የድኆች እርሻ ብዙ ምግብ ሊያስገኝ ይችላል፤ በፍትሕ ማጣት ግን ይጠራረጋል። ²⁴በትርን የሚቆጥብ ልጁን ይጠላል፤ የሚወደው ግን በመገሠጽ ይተጋል። ²⁵ጻድቅ ልቡ እስኪጠግብ ድረስ ይበላል፤ የክፉዎች ሆድ ግን ይራባል።