Maanglem Jihsidakbü, Mangsühbü Loushadbü
Nyaksinam hoba mühsinou ho le thüka paida, keibou tegü lenan ai aki jinei, hoba shalebü ka shatyobü nyaksinam lepbolangbü longtiko langnyak souko paibü sühko. Haiyeibü soushou tegü lauda, aishanga maanglem jihsidaklaje maang shattida. Jaisina mautida: songsido lambü shuong yoa salanga paian songsihon ki.
13 1Songbüdobü shouei jembü bou songlen ditda, lausikei nyikubouei hak to adit. 2Müt cheei jembü sembung hek ka maibü shauda, lausikei amlangbü shuong mühei ik shatyobü shanga ki. 3Aoei jembü sembung jungeida haoei jembü langkei maanglemda, lausikei aoei jembü sembungkhop hopatham ipbuda haoei mautilabü. 4Haulohaushed müteibü mangsühsikei ai ahapda, lausikei jungeibü müteibü mühei soukoauko senyühshemlabü. 5Saopobü müteibü amlangbü mangsenda, lausikei amaibü müteibü himou hoba shed longtilabü. 6Saopobüei lam maikeimainyu müt kho maanglemda, lausikei amaibüei shabü müt kho sepeitilabü. 7Müt cheei keibou tegü lenda, lausikei haoei ai aki; lubü cheei shalebü tegü lenda, lausikei haoei nyaksinam juong ki. 8Müt cheeibü nyaksinamei jembü langkei shanga angnam kulabü, lausikei shalebü mütei hak to adit. 9Saopobü shuong ngesakbü olinko shingda, lausikei amaibü shuong hantin kho metlabü. 10Yonglambü mütei oyophetyobü ong longtilabü, lausikei songsido lambü shuong yoa songsihon ki. 11Lepbolangko hapbü nyaksinam langtilabü, lausikei aoei shisho shisho yoshaian haoei kho haatilabü. 12Maanglem jihsidaklaje maang shattida, lausikei mangsühbü loushadlaje kho langkei bua ki. 13Aoei ngüh to ekda haoei himshuong mautilabü, lausikei aoei ngühkhüm to souhatda haoei pailetbü haplabü. 14Songbüdobü songlen kho langkei deikük ki, hibü müt kho hailabü sung ka bangtilabü. 15Maibü sensimaang kibü mütei olinbü longtilabü, lausikei amlangbü shuong lam kho haoeneibü sangliphang ki. 16Damanchühbü müt pendouei hapbüngebü yoa kümda, lausikei ngoubü mütei jembü ngoubü tang khittida. 17Amaibü ngühlang künbouei thushed to atlabü, lausikei maimaithambü ngühlang künbouei shat semtibü longtilabü. 18Tangtikubü to ekbou to shalebü hoba himou loulabü, lausikei hak to ditbü hangenlabü. 19Mangsühbü loushadlabü kho soushou shanga teibou ki, lausikei amaibü ka sepeibü kho ngoubü shuong shanga mangsenlabü ki. 20Aoei songbüdobü yoa paida haoei songsido kilabü, lausikei ngoubü shuong jenabou amaibü haplabü. 21Thushedei shabü shuong shijung hauda, lausikei maibüei saopobü müt pailetbü kulabü. 22Maibü müteibü jembü shisi shousi shuong la phet kulabü, lausikei shabü müt nyaksinam kho saopobü müt shanga thanan pholabü. 23Shalebü shuong youli ajinbü sekei shausiyung juong hekkula thükkei, lausikei ngühmai aki shanga kho shemtilabü. 24Aoei jue senetan haoei jembü shou to mangsenda, lausikei hao sanoubouei shieikoela jungeida. 25Saopobü müteibü senyühshembo shauda, lausikei amaibü müt shimungei mühei haida.
