Òwe 13

13 ¹Ọmọ ọlọ́gbọ́n a máa gbọ́ ìtọ́ni baba rẹ̀, ṣùgbọ́n ẹlẹ́gàn kì í fetí sí ìbáwí. ²Láti inú èso ẹnu rẹ̀ ni ènìyàn ti ń jẹ ohun rere, ṣùgbọ́n ìwọra àwọn aláìṣòótọ́ ń fẹ́ ìwà ipá. ³Ẹni tí ó bá ṣọ́ ẹnu rẹ̀ ń dáàbò bo ẹ̀mí rẹ̀, ṣùgbọ́n ẹni tí ó la ètè rẹ̀ gbọrọ yóò parun. ⁴Ọ̀lẹ ń fẹ́kúfẹ̀ẹ́ ṣùgbọ́n kò rí nǹkan kan, ṣùgbọ́n ọkàn aláápọn ni a óò tẹ́ lọ́rùn dáadáa. ⁵Olódodo kórìíra irọ́, ṣùgbọ́n ènìyàn búburú a máa mú ìtìjú àti àbùkù wá. ⁶Òdodo ń ṣọ́ ẹni tí ọ̀nà rẹ̀ jẹ́ aláìlẹ́gàn, ṣùgbọ́n ìwà búburú ń bi ẹlẹ́ṣẹ̀ ṣubú. ⁷Ẹnìkan ń díbọ́n bí ọlọ́rọ̀, síbẹ̀ kò ní nǹkan kan; ẹnìkejì ń díbọ́n bí tálákà, síbẹ̀ ó ní ọrọ̀ púpọ̀. ⁸Ọrọ̀ ènìyàn lè ra ẹ̀mí rẹ̀ padà, ṣùgbọ́n tálákà kì í gbọ́ ìhàlẹ̀ kankan. ⁹Ìmọ́lẹ̀ olódodo ń tàn pẹ̀lú ayọ̀, ṣùgbọ́n a óò pa fìtílà ènìyàn búburú kú. ¹⁰Ìgbéraga kì í mú nǹkan kankan wá bí kò ṣe ìjà, ṣùgbọ́n ọgbọ́n ń bẹ lọ́dọ̀ àwọn tí ń wá ìmọ̀ràn. ¹¹Ọrọ̀ tí a rí gbà nípa ìrẹ́jẹ a máa dínkù lọ, ṣùgbọ́n ẹni tí ó ń kójọ díẹ̀díẹ̀ a máa mú un pọ̀ sí i. ¹²Ìrètí tí a sún síwájú ń mú kí ọkàn ṣàìsàn, ṣùgbọ́n ìfẹ́-ọkàn tí a mú ṣẹ jẹ́ igi ìyè. ¹³Ẹni tí ó bá gan ọ̀rọ̀ a máa fa ìparun bá ara rẹ̀, ṣùgbọ́n ẹni tí ó bọ̀wọ̀ fún òfin ni a óò fún ní èrè. ¹⁴Ẹ̀kọ́ ọlọ́gbọ́n jẹ́ orísun ìyè, tí ń yí ènìyàn padà kúrò nínú ìdẹkùn ikú. ¹⁵Òye rere a máa ní ojúrere, ṣùgbọ́n ọ̀nà àwọn aláìṣòótọ́ ni ìparun wọn. ¹⁶Gbogbo ọlọ́gbọ́n ènìyàn ń fi ìmọ̀ ṣe nǹkan, ṣùgbọ́n aṣiwèrè ń fi ìwà òmùgọ̀ rẹ̀ hàn. ¹⁷Oníṣẹ́ búburú a máa bọ́ sínú ìyọnu, ṣùgbọ́n ikọ̀ olóòótọ́ a máa mú ìwòsàn wá. ¹⁸Òsì àti ìtìjú ni yóò bá ẹni tí ó kọ ìbáwí sílẹ̀, ṣùgbọ́n ẹni tí ó gbọ́ ìtọ́ni ni a óò bọ̀wọ̀ fún. ¹⁹Ìfẹ́-ọkàn tí a mú ṣẹ a máa dùn mọ́ ọkàn, ṣùgbọ́n yíyí padà kúrò nínú ibi jẹ́ ìríra fún aṣiwèrè. ²⁰Ẹni tí ó bá ń bá ọlọ́gbọ́n rìn yóò gbọ́n, ṣùgbọ́n ẹni tí ó bá aṣiwèrè kẹ́gbẹ́ yóò rí ìpalára. ²¹Ìpọ́njú ń lépa àwọn ẹlẹ́ṣẹ̀, ṣùgbọ́n ire ni èrè olódodo. ²²Ènìyàn rere a máa fi ogún sílẹ̀ fún àwọn ọmọ ọmọ rẹ̀, ṣùgbọ́n a to ọrọ̀ ẹlẹ́ṣẹ̀ jọ fún olódodo. ²³Oko tálákà tí a kò tì í ro lè mú oúnjẹ púpọ̀ wá, ṣùgbọ́n à ń gbá a lọ nítorí àìsí ìdájọ́ òdodo. ²⁴Ẹni tí ó bá fa ọ̀pá ìbáwí sẹ́yìn kórìíra ọmọ rẹ̀, ṣùgbọ́n ẹni tí ó fẹ́ ẹ ní ìtara láti bá a wí. ²⁵Olódodo a máa jẹun yó tẹ́ ọkàn rẹ̀ lọ́rùn, ṣùgbọ́n ikùn ènìyàn búburú a máa wà ní ebi.