Tariro Inononoka, Chishuwo Chinozadziswa
Mari nechido zvinoyerera mukati macho, kubva pakunyepedzera kuti wakapfuma usina chinhu kusvika pamari yokubiridzira inopera apo kuchengeta zvishoma nezvishoma kunokura. Chinodomawo kurwadza kwokumirira, sezvo tariro inononoka ichirwarisa mwoyo. Shamwari dzinokosha: famba nevakachenjera uye uve akachenjera.
13 1Mwanakomana akachenjera anoteerera kurayira kwababa vake, asi museki haateereri kutsiurwa. 2Kubva pazvibereko zvomuromo wake munhu anofarira zvinhu zvakanaka, asi chishuwo chavanyengeri ndechechisimba. 3Anochengeta muromo wake anodzivirira upenyu hwake, asi uyo anoshamisa miromo yake kwazvo anoparara. 4Munhu ane usimbe anopanga asi haawani chinhu, asi chishuwo chavanoshingaira chinogutswa zvakanaka. 5Vakarurama vanovenga nhema, asi vakaipa vanounza nyadzi nokuzvidzwa. 6Kururama kunochengeta ane nzira yakarurama, asi kuipa kunowisira mutadzi pasi. 7Mumwe munhu anozviita somupfumi, asi asina chinhu; mumwe anozviita somurombo, asi ane upfumi huzhinji. 8Upfumi hwomunhu hungadzikinura upenyu hwake, asi murombo haanzwi kutyisidzirwa. 9Chiedza chavakarurama chinopenya nomufaro, asi mwenje wavakaipa uchadzimwa. 10Kuzvikudza hakubereki chimwe kunze kwegakava, asi uchenjeri huri kune avo vanotsvaka zano. 11Upfumi hunowanikwa nokunyengera hunopera, asi uyo anounganidza zvishoma nezvishoma anohuwedzera. 12Tariro inononoka inorwarisa mwoyo, asi chishuwo chinozadziswa muti woupenyu. 13Anozvidza shoko anozviunzira kuparara, asi uyo anoremekedza murayiro achapiwa mubayiro. 14Kudzidzisa kwavakachenjera itsime roupenyu, kunodzora munhu kubva pamisungo yorufu. 15Njere dzakanaka dzinowana nyasha, asi nzira yavanyengeri inovaparadza. 16Munhu wose akangwara anoita zvinhu noruzivo, asi benzi rinoratidzira upenzi hwaro. 17Nhume yakaipa inowira mudambudziko, asi nhume yakatendeka inounza kuporesa. 18Urombo nenyadzi zvinowira uyo anoshaya hanya nokurangwa, asi uyo anoteerera kutsiurwa anokudzwa. 19Chishuwo chinozadziswa chinotapira kumweya, asi kufuratira zvakaipa kunosemesa mapenzi. 20Anofamba navakachenjera anova akachenjera, asi shamwari yamapenzi inokuvadzwa. 21Njodzi inotevera vatadzi, asi zvakanaka zvinopa mubayiro vakarurama. 22Munhu akanaka anosiyira vazukuru vake nhaka, asi upfumi hwomutadzi hunochengeterwa vakarurama. 23Munda usina kurimwa womurombo ungabereka zvokudya zvizhinji, asi zvinotsvairwa nokuda kwokushaya kururamisira. 24Anonyima shamhu anovenga mwanakomana wake, asi uyo anomuda anoshingaira kumuranga. 25Vakarurama vanodya vachiguta mwoyo yavo, asi dumbu ravakaipa rinonzwa nzara.