Chānsam 13

13 ¹Thangkhama naomayarana avāva̱wui tamkachitheili nganākhui, kha mashātkathei hina hāngkhamachinli manganākhuimana. ²Akhamorwui atheiwui eina mi akhana kaphā ot reisanga, kha yorkazābingwui yāngna khangashao ningchānga. ³Akhamorli khamayon china khalattawui mirin phāriya, kha amorchai makāda kahai china kashimānli zangra. ⁴Chāngshe mina ot ningchāngda khikha masamphangmara, kha khamakhuna miwui yāngli mavātlakla thotinghai ngasakra. ⁵Khangarongana mikhanamli yangkharinga, kha makhayā mina mai kala khayā khamalā shokngasaka. ⁶Khamashung khangarongna shongfa shāt makā mili phāriya, kha makaphā makhayāna morei kaphungali thānthuihaowa. ⁷Mi akhana kashānga da hāngmāngda, khikha maleimana; mi akhana kachāma da hāngmāngda, lan kachungkha lei. ⁸Miwui lanna awui mirin ngatangkhuira, kha kachāma mina ngachee khavai chi mashāmimana. ⁹Khangarongawui kahor china panglāk eina horshoka, kha makhayāwui thaomei shimitmihaora. ¹⁰Langkasona nganangmāng pharā ngasaka, kha hāngkachithei nganākasangbingli thangkhamei leiya. ¹¹Mikhanam eina samkaphang lanna shimānhaora, kha kazatzata kazipkhui china mataisang ngasaka. ¹²Kachihān atam naoda unghaona wuklung kazā ngasaka, kha ningkachāng ungshunga chi mirinwui thingrongna. ¹³Tuili ningkakachaia china kashimānli zangra, kha ningkhamili khangacheea china sāman samphangra. ¹⁴Kathi khalenwui eina mili yāmshok khavai, thangkhamawui tamkachithei hi kharinga ura̱na. ¹⁵Kaphā theishingkakhuina ngahānkhangai samphanga, kha yorkazābingwui apongna athumwui shimān khavaina. ¹⁶Shingā kathei mi kachiva̱na awor eina ot sai, kha mangkhama̱ mina akhalattawui mangkhama̱ vaozata. ¹⁷Makhayā paomena kalākashili tāzanga, kha chisin kahai paomena kharai ngasaka. ¹⁸Kharākli makhuikasanga a chiwuitungli chām kala maishi tāra, kha hāngkhamachinli khuikasanga chi khayākakā samphangra. ¹⁹Ningkachāng ungshunga kahai chi manglāli shima, kha makaphāli ningngatei hi mangkhama̱bingwui vang ningkakachai otna. ²⁰Thangkhamabingli yaothuikharuma a chi thangmeira, kha mangkhama̱bingwui khangayur chi kalāshāt samphangra. ²¹Unshimuina morei kaphungbingli kharoma, kha khamathāna khangarongbingli sāman mira. ²²Kaphā mina awui ara̱ ngarāli shimlui kataimira, kha morei kaphungawui lan chi khangarongabingwui vang kaziphaira. ²³Kachāmawui rampho kahai lui chi kashakazā kachungkha vaikashap, kha mashun makhaleiwui vang khuithuihaora. ²⁴Lijei makhāma a chi awui naomayarali ningkachaiya, kha ali leishi a china khamakhu eina ali hāngmachinmi. ²⁵Khangaronga mina awui ningkachāng chir eina zai, kha makhayāwui wuk chi thaihaora.