Chānsam 12

12 ¹Kharākli leikashe china theikakhui leishiya, kha hāngkhamachinli ningkakachaiya china mangkhama̱na. ²Kaphā mina ithumwui Avāwui eina ngahānkhangai samphanga, kha makaphā khangarān kasā mili ana yonngasaka. ³Makaphā-makhayā eina khipākha nganingshing masamphangmana, kha khangarongabingwui angayung china katang manganuklakmara. ⁴Khayākakā preiva̱ china agaharawui kuihonna, kha maishi rānganai kashe china agaharawui ara̱kui shuikahai kathāna. ⁵Khangarongabingwui khangarān china khamashungana, kha makhayābingwui hāngkachithei china mikhanamna. ⁶Makhayābingwui tui china ashee tākhavai rimkapama, kha mashungrik kahaibingwui matui eina khayon makhaleibingli kanshokmi. ⁷Makhayābing china pitāda kongluihaida maleihaora, kha khangarongabingwui shim china nganingshinghaora. ⁸Mi akhali awui ning khamathā athishurda mibingna sochikata, kha kha̱khamakhei ning khalei a chili yangkharinga. ⁹Reikhamatai mi da sākhaninglaga thaida lei kajili, khangazana ngasoda rao khalei chi phāmei. ¹⁰Khangaronga mina awui sha̱keiwui khavata phaningmi, kha makhayābingwui lukhamashanla sāshilaka. ¹¹Luikhavā mina kachungkha kashakazā samphangra, kha masā khavai phākazata mi chiya ning mazangmana. ¹²Makhayā mina makaphā mibingwui ngaponkakhui ningchānga, kha khangarongabingwui angayung china athei shoka. ¹³Makaphā mi china awui morei matuina tuknarhai, kha khangaronga china kakhanangwui eina yāmshoka. ¹⁴Awui tuiwui atheiwui eina mi akha china kaphā ot eina pemtinghai, kala awui pāng eina sāhai otsakna a chili sāman mira. ¹⁵Mangkhama̱wui apong china akhalattawui mikyanli khamashung khalei thāda lei, kha thangkhama mina hāngkachithei nganā. ¹⁶Mangkhama̱na awui malungkhavāt chichangli hāngchitheizata, kha shingā kathei mina khayakli yangkhumkhami. ¹⁷Khamashung tui matui kaje china khamashung shākhi sāmi, kha kakapika shākhina kakapik matuishoka. ¹⁸Matuitā tui china raighai thāda zangra, kha thangkhamawui malena kharai khuirāmi. ¹⁹Khamashung morchaina mashimānda leichingra, kha kakapika malena hunkhawui vang mānga. ²⁰Makaphā khangarānbingwui ningli mikhanamna pemtinghai, kha chingri kahai khamatui thābingwui vang khamathān lei. ²¹Khangarong mili kalākashi marāmara, kha makhayā mi china kakhanangna pemtinghai. ²²Kakapika morchaina ithumwui Avāwui mangāli ningkakachaina, kha ningtonglak eina sābingna awui ningyāng khaungna. ²³Shingā kathei mina awor kaziphai, kha mangkhama̱bingwui ningna mangkhama̱ tui heishoka. ²⁴Khamakhunawui pāngna mungra, kha ngachāng makakāna thoukainao samphanga. ²⁵Malungkharingna ningli ritlak eina shirena, kha kaphā tui china chili ringphāngasaka. ²⁶Khangaronga mina awui khongnainaoli thānmi, kha makhayāwui apong china athumli thannguiya. ²⁷Chāngshena awui ramsā maruishaimana, kha khamakhuna mina awui lanli aman kachungkha da phaninga. ²⁸Khamashung khangarongwui apongli kharing lei, kala chi shongfali kathi maleimana.