ምሳሌ 12 FHB Father's Heart Bible™

12 ¹እቲ ተግሳፅ ዘፍቅር ፍልጠት የፍቅር፥ እቲ ተግሳፅ ዝፀልኦ ግና ዘይለባም እዩ። ²ሕያዋይ ሰብ ካብ ኣቦና ፀጋ ይረክብ፥ ነቲ ክፉእ ዝሓስብ ሰብ ግና ይዅንኖ። ³ሰብ ብክፍኣት ኣይፀንዕን፥ ሱር ፃድቃን ግና ከቶ ኣይናወፅን። ⁴ሰናይ ጠባይ ዘለዋ ሰበይቲ ኣኽሊል ሰብኣያ እያ፥ እተሕፍር ግና ኣብ ኣዕፅምቱ ከም ብስብሳ እያ። ⁵ሓሳባት ፃድቃን ቅኑዕ እዩ፥ ምኽሪ ረሲኣን ግና ተንኰል እዩ። ⁶ቃላት ረሲኣን ደም ንምፍሳስ የድቡ፥ ዘረባ ቅኑዓት ግና ነቶም ንፁሃት የድሕኖም። ⁷ረሲኣን ተገልቢጦም ይጠፍኡ፥ ቤት ፃድቃን ግና ትፀንዕ። ⁸ሰብ ከከም ጥበቡ ይንኣድ፥ ዝተዛብዐ ልቢ ዘለዎ ግና ይንዓቕ። ⁹ትሑት ኮይንካ ግዙእ ምውናን፥ ዓብዪ ኽትመስል ጠሚኻ ኻብ ምንባር ይሓይሽ። ¹⁰ፃድቕ ድላይ እንስሳኡ ይሓሊ፥ ራህራሀ ረሲኣን ግና ጨካን እዩ። ¹¹ምድሩ ዝሓርስ እንጀራ ይፀግብ፥ ከንቱ ነገር ዝስዕብ ግና ኣእምሮ የብሉን። ¹²ረሲኣን ምርኮ እኩያት ይምነዩ፥ ሱር ፃድቃን ግና ፍረ ይህብ። ¹³ክፉእ ሰብ ብክፉእ ዘረባ ኸናፍሩ ይጥለፍ፥ ፃድቕ ግና ካብ ፀበባ የምልጥ። ¹⁴ሰብ ካብ ፍረ ኣፉ ሰናይ ነገር ይፀግብ፥ ግብሪ ኣእዳዉ ድማ ተመሊሱ ይፈድዮ። ¹⁵መንገዲ ዓሻ ኣብ ዓይኑ ቅኑዕ ይመስል፥ ጠቢብ ግና ምኽሪ ይሰምዕ። ¹⁶ዓሻ ቝጥዓኡ ብኡ ንብኡ የርኢ፥ ለባም ግና ፀርፊ ይሽፍን። ¹⁷ሓቂ ዝዛረብ ቅኑዕ ምስክር ይህብ፥ ሓሶተኛ ምስክር ግና ሓሶት ይዛረብ። ¹⁸ዘይሕሰብ ቃላት ከም ሰይፊ ይወግእ፥ ልሳን ጠቢባን ግና ፈውሲ የምፅእ። ¹⁹ናይ ሓቂ ኸናፍር ንዘለኣለም ይፀንሓ፥ ናይ ሓሶት ልሳን ግና ንቕፅበት ዓይኒ ጥራሕ እያ። ²⁰ኣብ ልቢ እቶም ክፉእ ዝሓስቡ ተንኰል ኣሎ፥ ሓጎስ ግና ናይቶም ሰላም ዝገብሩ እዩ። ²¹ንፃድቕ ጉድኣት ኣይረኽቦን፥ ረሲኣን ግና ብመከራ ይመልኡ። ²²ናይ ሓሶት ኸናፍር ኣብ ኣቦና ርኹስ እዩ፥ እቶም ብሓቂ ዝገብሩ ግና ባህ የብልዎ። ²³ለባም ፍልጠት ይሓብእ፥ ልቢ ዓያሹ ግና ዕሽነት የውፅእ። ²⁴ትግህቲ ኢድ ክትገዝእ እያ፥ ሃኬት ግና ናብ ባርነት ተብፅሕ። ²⁵ጭንቀት ንልቢ የኽብዶ፥ ሕያዋይ ቃል ግና የሐጕሶ። ²⁶ፃድቕ ንብፃዩ ይመርሕ፥ መንገዲ ረሲኣን ግና የስሕቶም። ²⁷ሃካይ ዝሃደኖ ኣይጠብስን፥ ትጉህ ግና ንጥሪቱ የኽብር። ²⁸ኣብ መንገዲ ፅድቂ ህይወት ኣሎ፥ ኣብታ መንገዲ እቲኣ ድማ ሞት የለን።