Siloka 12 FHB Father's Heart Bible™

12 ¹Sing saha nu resep kana didikan, resep kana pangaweruh, tapi sing saha nu ijid kana panggeuing, eta bodo. ²Jalma nu hade meunang kurnia ti Rama urang, tapi Mantenna ngahukum jalma nu ngarah jahat. ³Taya saurang oge nu bisa kukuh ku jalan kajahatan, tapi akar jalma bener moal bisa oyag. ⁴Istri nu luhung budi jadi makuta salakina, tapi istri nu matak era mah lir buruk dina tulang salakina. ⁵Rarancang jalma bener teh adil, tapi pituah jalma jahat mah pinuh ku tipu. ⁶Omongan jalma jahat ngadodoho getih, tapi caritaan jalma jujur nyalametkeun nu teu salah. ⁷Jalma jahat mah digulingkeun tuluy musna, tapi imah jalma bener mah bakal tetep ngadeg. ⁸Jalma dipuji satadbir hade akalna, tapi nu bengkok pikiranana mah dihina. ⁹Leuwih hade jadi jalma biasa tapi boga bujang, batan api-api jadi gegeden tapi kalaparan. ¹⁰Jalma bener nalingakeun kabutuh sasatoanana, tapi karunya jalma jahat mah angger bae telenges. ¹¹Sing saha nu ngagarap tanahna bakal loba kadaharan, tapi sing saha nu ngudag perkara mubadir mah taya akalna. ¹²Jalma jahat hayang kana rampasan jalma doraka, tapi akar jalma bener mah bakal buahan. ¹³Jalma jahat kajebak ku omonganana nu dosa, tapi jalma bener mah luput tina bancang pakewuh. ¹⁴Tina buah omonganana jalma meunang loba kahadean, sarta pagawean leungeunna baris mulang ganjaran ka manehna. ¹⁵Jalan jalma bodo katenjona bener cek pikiran sorangan, tapi jalma bijaksana mah daek ngadengekeun pituah. ¹⁶Jalma bodo mah ambekna harita keneh nembongan, tapi jalma wijaksana mah teu mirosea kana panghina. ¹⁷Sing saha nu nyarita bener mere kasaksian nu jujur, tapi saksi palsu mah ngabohong. ¹⁸Omongan ngaco nojos lir pedang, tapi letah jalma bijaksana mah ngadatangkeun kacageuran. ¹⁹Biwir nu jujur tahan salilana, tapi letah nu bohong ngan sakedapan. ²⁰Hate jalma nu ngararancang jahat pinuh ku tipu, tapi kabungahan mah pikeun jalma nu ngayakeun karapihan. ²¹Jalma bener moal katarajang balai, tapi jalma jahat mah pinuh ku bancang pakewuh. ²²Biwir nu bohong teh pikaijideun ku Rama urang, tapi jalma anu satia lampahna jadi kabungah manah Mantenna. ²³Jalma wijaksana mah nyimpen pangaweruhna keur sorangan, tapi hate jalma bodo mah ngagaler kabodoan. ²⁴Leungeun nu getol bakal marentah, tapi kedul mah tungtungna jadi kuli paksa. ²⁵Kasalempang ngabeungbeuratan hate, tapi omongan nu hade matak ngabungahkeun. ²⁶Jalma bener mituduh jalan ka pada batur, tapi jalan jalma jahat mah nyasabkeun sorangan. ²⁷Jalma kedul mah teu manggang hasil moroanana, tapi jalma getol mah ngajenan pangabogana. ²⁸Dina jalan kabeneran aya kahirupan, sarta sapanjang eta jalan taya ajal.