Kalmomin Rashin Hankali, Harshe Mai Warkarwa
Galibi game da aiki, kalmomi, da abin da sauran mutane suke iya gani. Hannuwa masu ƙwazo suna mulki, ragwanci kuma yana ƙarewa da aikin tilas. Kalmomin gaggawa suna sukā, harshe mai ƙarya kuma yana dawwama ne na ɗan lokaci kaɗai. A tsakaninsu akwai kalma ɗaya mai natsuwa: damuwa tana nauyaya zuciya, kalma mai kirki kuma tana ɗaga ta.
12 1Duk mai ƙaunar horo yana ƙaunar sani, amma duk mai ƙin gyara wawa ne. 2Mutumin kirki yakan sami tagomashi daga wurin Ubanmu, amma yana hukunta mutumin da yake ƙulla mugunta. 3Ba wanda yake tabbata ta wurin mugunta, amma saiwar mai adalci ba za tă taɓa matsawa ba. 4Mace mai halin kirki rawanin mijinta ce, amma wadda take kawo kunya kamar ruɓa ce a cikin ƙasusuwansa. 5Shirye-shiryen masu adalci na gaskiya ne, amma shawarar mugaye mai ruɗi ce. 6Kalmomin mugaye suna fakon zub da jini, amma maganar masu gaskiya takan ceci marar laifi. 7Akan tumɓuke mugaye su ƙare, amma gidan masu adalci zai tsaya. 8Akan yabi mutum bisa ga hikimarsa, amma akan rena mai karkataccen hankali. 9Gara ka zama kaskantacce ka kasance da bawa, da ka ɗauki kanka babba amma ka ji yunwa. 10Mai adalci yakan kula da bukatun dabbobinsa, amma ko tausayin mugaye zalunci ne. 11Duk mai noma gonarsa zai sami abinci a yalwace, amma duk mai bin wofintattun abubuwa marar hankali ne. 12Mugaye suna marmarin ganimar mugayen mutane, amma saiwar masu adalci takan ba da 'ya'ya. 13Mugun mutum yakan fāɗa tarko ta wurin muguwar maganarsa, amma mai adalci yakan kuɓuce daga wahala. 14Daga 'ya'yan maganarsa mutum yakan cika da kyawawan abubuwa, kuma aikin hannuwansa yakan dawo yă saka masa. 15Hanyar wawa takan yi kamar daidai ce a idanunsa, amma mai hikima yakan saurari shawara. 16Wawa yakan nuna fushinsa nan take, amma mai hankali yakan ƙyale zagi. 17Duk mai faɗar gaskiya yakan ba da shaida ta gaskiya, amma mai shaidar ƙarya yakan faɗi ƙarairayi. 18Kalmomin rashin hankali sukan soka kamar takobi, amma harshen mai hikima yakan kawo warkarwa. 19Leɓɓa masu gaskiya sukan dawwama har abada, amma harshen ƙarya yakan dawwama na ɗan lokaci kawai. 20Ruɗi yakan cika zukatan masu ƙulla mugunta, amma farin ciki na masu haɓaka salama ne. 21Babu wata cuta da takan sami mai adalci, amma mugaye cike suke da wahala. 22Leɓɓan ƙarya abin ƙyama ne ga Ubanmu, amma masu aikata aminci farin cikinsa ne. 23Mai hankali yakan ɓoye saninsa, amma zuciyar wawaye takan yi ta tofa wauta. 24Hannuwa masu aiki tuƙuru za su yi mulki, amma ragwanci yakan ƙare da aikin dole. 25Damuwa takan nauyaya zuciya, amma kalma mai daɗi takan faranta ta. 26Mai adalci yakan jagoranci maƙwabcinsa, amma hanyar mugaye takan ɓatar da su. 27Rago ba ya gasa naman farautarsa, amma mai aiki tuƙuru yakan daraja mallakarsa. 28A hanyar adalci akwai rai, kuma a tafarkin nan babu mutuwa.