Maangto Shatbü Ngüh, Shat Semtibü Lishang

Aei kümbü, ngüh, hoba lubü shuongei ngebü shuong shanga ki. Maang kaangbü ikei yeida, lausikei haushedei lolo khangenbü sühda; mashikbü ngühei ik shatyoda, hoba juongbü tongde salang che ong kida. Khüsi phaika ngüh hakso che ki: nyensangei soushou dühtida, hoba hanbü ngühei kho yaangenda.

Chapter 12.

Aoei tangtikubü sanouda haoei hapbüngebü sanouda, lausikei aoei hakbü mangsenda haoei songsido aki. Maibü mütei seneibü Bou ka onou hapda, lausikei haoei amaibü takbü müt kho yuktilabü. Müt cheei shabüei ayaütilabü, lausikei saopobü shuongeibü li ladangkei ashatlabü. Maanglimaangsang yakei laoeibü khun ki, lausikei himou sungbabü yak kho laoeibü lo nyaületbü tegü ki. Saopobü shuongeibü huon kho ngühmai ki, lausikei amaibü shuongeibü ngühsidei kho khüpsilang ki. Amaibü shuongeibü ngüh kho sii shanga haiyeida, lausikei maang tangbü shuongeibü ngühei shedbü akibü shuong khümenlabü. Amaibü shuong pekan apda hoba akiko aplabü, lausikei saopobü shuongeibü chem kho kaangtham kilabü. Müt kho haoeibü songsido maibü tegü sanglabü, lausikei maang amaibü kibü müt kho nyikulabü. Hanbü kibü hoba sambou kibü kho, yaangbü la hanglenko mühei haibü toje maibou ki. Saopobü shuongei haoeneibü samkeisamokeibü khambü ngeda, lausikei amaibü shuongeibü onou ongkei kaangbü ki. Aoei jembü kao ungda haoei shausiyung souko haplabü, lausikei aoei jim akibü to chaseko haoei songsido aki. Amaibü shuongei amaibü müt shuongeibü kokbü peisilei dühda, lausikei saopobü shuongeibü li kho lang hekbü ki. Amaibü müt kho haoeibü shabü ngühei minan aplabü, lausikei saopobü müt kho khonsak ka satenlabü. Müt kho haoeibü ngüh langei maibüei phottia, hoba haoeibü ik kümbüei haola jongsak sepeian ngaitilabü. Ngoubü müteibü lam kho jembü nyeka tükde dogo chühenda, lausikei songsido kibü shuongei ngühsidei ditda. Ngoubü mütei haoeibü khauang mangde ong lenda, lausikei songsido kibüei nyikubü to aleda. Aoei ngühmai lauda haoei ngühmaanglanbü aukabü kuda, lausikei amlangbü aukabü mütei amlangbü lauda. Maangto shatbü ngühei inei tegü paiko seplabü, lausikei songsido kibü shuongeibü lishangei shat semtilabü. Ngühmaanglanbü sembung kho ponpen shanga kaangtham kilabü, lausikei amlangbü lishang kho longche ongkei kilabü. Amaibü huon takbü shuongeibü maanga khüpsilang shenlabü, lausikei sangmai lamleibü shuongei olinbü haplabü. Saopobü shuong to amaibü cheje asühlabü, lausikei amaibü shuong kho khonsak ka shenlabü. Amlangbü sembung kho seneibü Bou thedanga mangsenlabü, lausikei maimaithama kümbü shuong kho Haoeibü olinbü ki. Songsido kibüei hapbüngebü jembü yoa phoda, lausikei ngoubü shuongeibü maangponei ngoualoubü jungan apda. Moshikbü ikei songdaklabü, lausikei haulohaushedei aaoeibü kümsilei la yeilabü. Maang khonsak cheei müt maang to tüttilabü, lausikei maibü ngühei kho olintilabü. Saopobü mütei haoeibü lepbou to lam lenlabü, lausikei amaibü shuongeibü lam khoei haoen mashikan satlabü. Haulohaushed mütei jembü meishi phe angoulabü, lausikei moshikbü müt shanga peisilei kho khonsakbü nyaksinam ki. Saopobü lamnyua langkei kia, hoba kho lam danko haibü aying.