Seret Tükde Kho Haoeibü Olinbü Ki
Seret, ikei kubü hoba nyen kho ho le thüka ki. Maubü tegü limbü kho maimaitham amau dogo ho le ngelepda, kongkong kuan aei keibü kiko, youshou thuan khoei khauanglangbü. Songsihon akibü mai kho sosotham hanbü ngüh hapda: meisiau noa kibü ngüma hon tegü.
11 1Seret amaibü kho seneibü Bou thedanga mangsenlabü ki, lausikei seret tükde kho haoeibü olinbü ki. 2Lilibü loulaje, kheijinei himou longda, lausikei songsihon kho eaaoabü shuong yoa louda. 3Tükdebü shuongeibü maang tükdebüei haoen leida, lausikei asangalanbü shuongeibü khüpbülangbü khoei haoen mautilabü. 4Nyaksinam kho khauang chaloua aikei athükda, lausikei saopobüei hailabü ka khümenda. 5Mubü shuongeibü saopobüei haoeneibü lamnyu tangsheitham kümda, lausikei amaibü müt kho hao lolo amaibüei tuonglabü. 6Tükdebü shuongeibü saopobüei haoen khümenda, lausikei asangalanbü shuong kho haoeneibü maangdakei minan aplabü. 7Amaibü müt hailaje, haoeibü maanglembü maulabü, hoba hao lolo seisihau to püetbü kho aila yeilabü. 8Saopobü müt kho khonsak ka khümenda, hoba amaibü müt kho hao jeila khüto loulabü. 9Asaopobü müt kho haoeibü sembungei lepbou mautilabü, lausikei ditenbü danko saopobü shuong khümenda. 10Saopobü shuong la maibü longlaje, sangnyu khoei olinda, hoba amaibü shuong maulaje, olinbü ngekda. 11Tükdebü shuongeibü haülabüei sangnyu tonenlabü, lausikei amaibü shuongeibü sembungei kho shilabü. 12Aoei haoeibü lepbou to nyikuda haoei sensimaang akibü ki, lausikei ditenbü müt kho semele kida. 13Nyikubou kho paian huphangbü ngüh tang khida, lausikei soushou mailemlabü müt kho huphangbü ngüh hula thükkei. 14Damanchühbü akibüa, mütli tuonglabü, lausikei damanchühbü shuong juonga, khümenbü ki. 15Aoei yenbou shanga theyolanyolaje, haoei maimaitham khonkulabü, lausikei aoei ik khümbo theyolanyobü mangsenda haoei khümenan kida. 16Onoubü yaksaei nyenhang pailetda, hoba sanou akakbü müt shuongei nyaksinam hapda. 17Sanoudambü müt kho hao lolo la maibü kümda, lausikei onou akakbü müt kho hao lolo la khonsak lottida. 18Amaibü mütei amlangbü mu hapda, lausikei saopobü hekbouei tükdebü jongsak hapda. 19Aoei saopobüa kaangkhühtham kida haoei langkei hapda, lausikei aoei amaibü shijung louda haoei hao lolo hailabü to laangjung hauda. 20Maangpon khüpbülangbü shuong kho seneibü Bou thedanga mangsenlabü ki, lausikei lamnyu mubü shuong kho haoeibü olinbü ki. 21Maimaitham, amaibü müt kho mubü shed pailetlabü, lausikei saopobü shuongeibü shousi shuong kho litilabü. 22Honeibü chikom wa nahünyua kibü tegü, saomaibü yaksa ditenshuokenbü akibü kho ki. 23Saopobü shuongeibü maangdak kho maibü ong longlabü, lausikei amaibü shuongeibü maanglembü kho khauanga longlabü. 24Müt cheei amakhetko kuda, aieilausi aei aei keibou kiko hauda; atei tükdebü kho sengkuda, lausikei shale phambo kilabü. 25Onou lenbü müt kho keibou kilabü, hoba aoei atei haksotida haoei hao lolokei haksotilabü. 26Aoei shusiphon sengkuda mütliei hao to shedsikhau lauda, lausikei kho yaakbü müt kho haülabü yingshi. 27Aoei maibü haujembo lamda haoei onou lamda, lausikei aoei amaibü lamda, amaibü hao jungto loulabü. 28Aoei haoeibü nyaksinam to maanglemlaje hao tuonglabü, lausikei saopobü shuong nyem topeibü tegü pungtilabü. 29Aoei jembü chempen to khonsaktilaje hao yei phet phanlabü, hoba ngoubü maanga songsido kibü müt la aao kilabü. 30Saopobü müteibü buhek kho langkei bunyu ki, hoba aoei müt langkei hapda hao songsido kibü müt ki. 31Saopobü müt kaodaka jongsak hapalonga, kheijinei amaibü müt hoba shabü müt toje aei aplabü!
