Thimo 11 FHB Father's Heart Bible™

11 ¹Ratiri cia maheeni nĩ magigi harĩ Ithe witũ, no mahĩga ma gũthima marĩa magĩrĩire nĩmo akenagĩra. ²Rĩrĩa mwĩtĩĩo wooka, thoni nĩcio ciũkaga, no ũũgĩ ũrĩ hamwe na arĩa menyiihagia. ³Ũrũngĩrĩru wa arĩa arũngĩrĩru nĩũmatongoragia, no ũogomu wa arĩa akunyanĩri nĩũmaanangaga. ⁴Ũtonga ndũrĩ bata mũthenya wa mangʼũrĩ, no ũthingu nĩũhonokagia kuuma gĩkuũinĩ. ⁵Ũthingu wa arĩa matarĩ ũcuuke nĩũrũngaragia njĩra yao, no mũndũ mwaganu nĩagũaga nĩ ũndũ wa waganu wake mwene. ⁶Ũthingu wa arĩa arũngĩrĩru nĩũmahonokagia, no arĩa akunyanĩri nĩmanyiitagwo nĩ merirĩria mao mene. ⁷Rĩrĩa mũndũ mwaganu akua, mwĩhoko wake nĩũthiraga, naguo wĩhoko ũrĩa aarĩ naguo harĩ hinya wake mwene ũgatuĩka wa tũhũ. ⁸Mũndũ mũthingu nĩahonokagio kuuma thĩĩnainĩ, nake mwaganu agatoonya thĩĩnainĩ ithenya rĩake. ⁹Mũndũ ũtetigĩrĩte Ngai nĩananga mũndũ wa itũũra na kanua gake, no arĩa athingu nĩmahonokagio nĩ ũndũ wa ũmenyo. ¹⁰Rĩrĩa arĩa athingu megaacĩra, itũũra inene nĩrĩkenaga, na rĩrĩa arĩa aaganu maaniinwo, gũkagĩa na mũkayo wa gĩkeno. ¹¹Nĩ ũndũ wa kĩrathimo kĩa arĩa arũngĩrĩru, itũũra inene nĩrĩtũũgagĩrio, no nĩ ũndũ wa kanua ka arĩa aaganu, nĩrĩmomoragwo. ¹²Mũndũ ũrĩa ũmenaga mũndũ wa itũũra ndarĩ ũũgĩ, no mũndũ ũrĩ na ũtaũku nĩakiraga. ¹³Mũndũ mũcambanĩri athiiaga akĩguũria hitho, no mũndũ ũrĩ na roho mwĩhokeku nĩahithaga ũndũ. ¹⁴Harĩa hatarĩ ũtaaro, andũ nĩmagũaga, no harĩa harĩ aheani kĩrĩra aingĩ, nĩ harĩ ũgitĩri. ¹⁵Mũndũ ũrĩa ũrĩĩhanagĩra mũgeni ti itherũ nĩakona thĩĩna, no ũrĩa ũthũũraga kũnyiitana moko na mwĩhotoro nĩagitĩirwo. ¹⁶Mũtumia ũrĩ ũtugi nĩonaga gĩtĩĩo, nao arũme matarĩ tha nĩmonaga ũtonga. ¹⁷Mũndũ ũrĩ tha nĩegunaga we mwene, no mũndũ ũtarĩ tha nĩ ereheragĩra thĩĩna we mwene. ¹⁸Mũndũ mwaganu nĩonaga mũcaara wa maheeni, no ũrĩa ũhaandaga ũthingu nĩonaga irĩhi rĩa ma. ¹⁹Mũndũ ũrĩa ũikaraga arũmĩte ũthingu nĩonaga muoyo, no ũrĩa ũrũmagĩrĩra ũũru nĩatengʼeragĩra gĩkuũ gĩake mwene. ²⁰Arĩa marĩ ngoro njogomu nĩ magigi harĩ Ithe witũ, no arĩa njĩra ciao itarĩ ũcuuke nĩo akenagĩra. ²¹Ti itherũ mũndũ mwaganu ndakaaga kũherithio, no ciana cia arĩa athingu nĩikohorwo. ²²O ta mbete ya thahabu ĩrĩ iniũrũinĩ rĩa ngũrwe, noguo mũtumia mũthaka ũtarĩ na ũtaũku ahaana. ²³Merirĩria ma arĩa athingu marĩkagĩrĩria o wegainĩ, no mwĩhoko wa arĩa aaganu ũrĩkagĩrĩria mangʼũrĩinĩ. ²⁴Mũndũ ũmwe aheanaga na ũtaana, no agĩkĩragĩrĩria o gũtonga; ũngĩ akaima kĩrĩa kĩagĩrĩire kũheana, agacooka gũkĩaga. ²⁵Mũndũ mũtaana nĩagatongio, na ũrĩa ũhuurũkagia arĩa angĩ o nake nĩakahuurũkio. ²⁶Andũ nĩmarumaga ũrĩa ũhingagĩrĩria ngano, no ũrĩa ũmĩendagia nĩarathimagwo. ²⁷Mũndũ ũrĩa ũcaragia wega na kĩyo nĩacaragia ũtugi, no ũrĩa ũcaragia ũũru, ũũru nĩũkamũkora. ²⁸Mũndũ ũrĩa wĩhokaga ũtonga wake nĩakagũa, no arĩa athingu nĩmagatheera ta mathangũ maruru. ²⁹Mũndũ ũrĩa ũrehagĩra nyũmba yake mwene thĩĩna nĩakagaya rũhuho, nake mũndũ mũkĩĩgu agaatuĩka ndungata ya ũrĩa ũrĩ na ngoro ya ũũgĩ. ³⁰Maciaro ma mũndũ mũthingu nĩ mũtĩ wa muoyo, na ũrĩa ũguucagĩrĩria mĩoyo nĩ mũũgĩ. ³¹Angĩkorwo mũndũ mũthingu nĩarĩhagwo gũkũ thĩ, githĩ mwaganu na mwĩhia matikĩrĩhio makĩria!