Mithali 11

11 ¹Mizani ya udanganyifu ni chukizo kwa Baba yetu, bali vipimo sahihi ni furaha yake. ²Kiburi kikija, ndipo huja aibu, bali hekima huja pamoja na wanyenyekevu. ³Uadilifu wa wanyoofu huwaongoza, bali ukaidi wa wadanganyifu huwaangamiza. ⁴Utajiri haufai kitu katika siku ya ghadhabu, bali haki huokoa na mauti. ⁵Haki ya wasio na hatia hunyoosha njia yao, bali mwovu huanguka kwa uovu wake mwenyewe. ⁶Haki ya wanyoofu huwaokoa, bali wadanganyifu hunaswa na tamaa yao wenyewe. ⁷Mtu mwovu afapo, tumaini lake hupotea, na matumaini yake katika nguvu zake mwenyewe huwa si kitu. ⁸Mwenye haki huokolewa na taabu, na mwovu huingia humo mahali pake. ⁹Kwa kinywa chake asiyemcha Mungu humwangamiza jirani yake, bali kwa maarifa wenye haki huokolewa. ¹⁰Mambo yaendapo vema kwa wenye haki, mji hufurahi, na waovu waangamiapo, huwa na vigelegele vya shangwe. ¹¹Kwa baraka ya wanyoofu mji hutukuzwa, bali kwa kinywa cha waovu hubomolewa. ¹²Amdharauye jirani yake hana akili, bali mtu mwenye ufahamu hunyamaza kimya. ¹³Mchongezi huzunguka akifunua siri, bali mtu mwenye roho ya uaminifu huweza kuficha siri. ¹⁴Pasipo uongozi, watu huanguka, bali katika wingi wa washauri kuna usalama. ¹⁵Ajidhaminiye mgeni hakika atateseka kwa ajili yake, bali achukiaye kupeana mkono katika ahadi yu salama. ¹⁶Mwanamke mwenye neema hupata heshima, na watu wakatili hupata mali. ¹⁷Mtu mwenye fadhili hujinufaisha mwenyewe, bali mtu katili hujiletea taabu mwenyewe. ¹⁸Mwovu huchuma mshahara wa udanganyifu, bali apandaye haki huchuma thawabu ya kweli. ¹⁹Adumuye katika haki hupata uzima, bali afuatiaye uovu hukimbilia mauti yake mwenyewe. ²⁰Wenye moyo mpotovu ni chukizo kwa Baba yetu, bali wale ambao njia zao hazina hatia ni furaha yake. ²¹Uwe na hakika mtu mwovu hataachwa bila adhabu, bali watoto wa wenye haki wataponyoka. ²²Kama pete ya dhahabu katika pua ya nguruwe ndivyo alivyo mwanamke mzuri asiye na busara. ²³Shauku ya wenye haki huishia katika mema tu, bali tumaini la waovu huishia katika ghadhabu. ²⁴Mtu mmoja hutoa kwa ukarimu, lakini huzidi kutajirika; mwingine huzuia kilicho haki, na kuishia katika uhitaji. ²⁵Nafsi ya ukarimu itaneemeshwa, na yeye awaburudishaye wengine naye mwenyewe ataburudishwa. ²⁶Watu humlaani azuiaye nafaka, bali baraka huwa juu ya kichwa cha yeye aiuzaye. ²⁷Autafutaye mema kwa bidii hutafuta upendeleo, bali autafutaye uovu, uovu utamjia. ²⁸Autegemeaye utajiri wake ataanguka, bali wenye haki watastawi kama majani mabichi. ²⁹Aletaye taabu juu ya nyumba yake mwenyewe atarithi upepo, na mpumbavu atakuwa mtumishi wa mwenye moyo wa hekima. ³⁰Tunda la mwenye haki ni mti wa uzima, na avutaye roho za watu ni mwenye hekima. ³¹Ikiwa mwenye haki hulipwa duniani, je, si zaidi sana mwovu na mwenye dhambi!