Solomoneibü Tetenbü Ngüh Khangda
Solomoneibü lolo tetenbü ngüh meimeida hoba lam jeilenda: songlen aei aki, lulu den lulu ngüh che che ki. Limanlen loubü kho sembung hoba khübü sühko loubü ki, wentek kubü sembung hoba ik shatyobü phoan kibü sembung yoa, hoba müt cheei hapbü nyaksinamei hao maimaitham thungetda lo dogobü.
10 1Solomoneibü tetenbü ngüh: Songbüdobü shouei jembü bou to olin kümda, lausikei ngoubü shouei jembü nyu la maangnoutida. 2Amaibüei hapbü nyaksinam ai apailetda, lausikei saopobüei hee ka khümenda. 3Seneibü Bouei saopobü shuong mühei haitila alelabü, lausikei amaibü shuongeibü damsühbü kho haoei kongkong aptida. 4Haulohaushed ikei shalebü kümda, lausikei kümsilei kibü ikei keibü kümda. 5Sulanga kamshaibou kho damanchühbü shou ki, lausikei youlatbü jiha yepan kibou kho himou kümbü shou ki. 6Saopobü shuongeibü khua haülabü shuong baulabü, lausikei amaibüeibü sembungei ik shatyobü küplepbü ki. 7Saopobü damenbü kho haülabü ki, lausikei amaibüeibü nyen kho pienlabü. 8Songbüdobü maangponei sakkubü shuong sungletda, lausikei ngüh juongbü ngoubü kho mautilabü. 9Tükdebüei paibü kho püetan paida, lausikei jembü lamnyu khüpbülangbü kümbou kho müt pendouei haplabü. 10Nyek pepan kibou kho khonsak kümda, hoba ngüh juongbü ngoubü kho mautilabü. 11Saopobüeibü sembung kho langkei deikük ki, lausikei amaibüeibü sembungei ik shatyobü küplepbü ki. 12Mangsenbüei oyongümyobü shouentida, lausikei sanouei shedbü pendou küpleplabü. 13Ditenbü müteibü sembunga songsihon hapda, lausikei sensimaang akibü müt la juei ki. 14Songbüdobü shuongei hapbüngebü thanan ki, lausikei ngoubüeibü sembungei mautibü neinoutida. 15Keibü shuongeibü nyaksinam kho haoeneibü kailepbü sangnyu ki, shalebü shuongeibü mautibü kho haoeneibü peisilei ki. 16Saopobüeibü mu kho langkei la leida, amaibüeibü pailetbü kho shabü la leida. 17Tangtikubü sungletbü kho langkei lama kida, lausikei hakbü mangsenbü kho lubü shuong ayinglam to leida. 18Mangsenbü küplepbü kho yepeijawebü ki, hoba pintiaatibü ngüh jungbou kho ngoubü ki. 19Ngüh juongbü kijinei shabü ananglabü, lausikei jembü tongde natenbou kho songbüdobü ki. 20Saopobüeibü tongde kho pienbü chandinam ki, amaibüeibü maangpon kho khaibou aying. 21Saopobüeibü sembungei müt juong samda, lausikei ngoubü shuongei sensimaang akibü laüa hailabü. 22Seneibü Boueibü haülabüei keibü kümda, hoba kho yoa maangmau ajinkulabü. 23Ngoubü shanga amaibü kümbü kho olinbü tegü ki, lausikei ditenbü müt shanga songsihon kho maanghaibü ki. 24Amaibüei hatbü kho hao thükto loulabü, lausikei saopobü shuongeibü damsühbü kho kulabü. 25Yeishi dan phaiaje amaibü shuong ayingko kilabü, lausikei saopobü shuong ponpen songdaktila kilabü. 26Hauh shanga haijepbü dei tegü hoba nyek shanga wankhük tegü, aeibou haulohaushed müt kho hao hautibü shuong shanga ki. 27Seneibü Bou to hatbüei langkei lengailabü, lausikei amaibü shuongeibü po kho tuitikulabü. 28Saopobü shuongeibü maanglembü kho olinbü kümda, lausikei amaibü shuongeibü maangangbü kho maulabü. 29Seneibü Boueibü lam kho mubü shuong shanga satenshang ki, lausikei amaibü kümbü shuong shanga mautibü ki. 30Saopobü shuong ladangkei ashaknyinlabü, lausikei amaibü shuong kaodaka ajoulabü. 31Saopobü müt sembungei songsihon longda, lausikei khüpbülangbü lishang kho dankhümlabü. 32Saopobü müt sembungkhopei maibü ngeda, lausikei amaibü müt sembungei khüpbülangbü ong ngeda.
