Mithali 10

10 ¹Mithali za Sulemani: Mwana mwenye hekima humfurahisha babaye, bali mwana mpumbavu humhuzunisha mamaye. ²Hazina zilizopatikana kwa uovu hazifai kitu, bali haki huokoa na mauti. ³Baba yetu hatamwacha mwenye haki apate njaa, bali hupinga tamaa ya waovu. ⁴Mikono ya uvivu hukufanya maskini, bali mikono yenye bidii huleta utajiri. ⁵Yeye akusanyaye wakati wa kiangazi ni mwana mwenye busara, bali yeye alalaye wakati wa mavuno ni mwana aletaye aibu. ⁶Baraka hukaa juu ya kichwa cha mwenye haki, bali kinywa cha waovu hufunika jeuri. ⁷Kumbukumbu ya mwenye haki ni baraka, bali jina la waovu litaoza. ⁸Moyo wenye hekima hupokea maagizo, bali mpumbavu apayukaye huangamia. ⁹Yeye aendaye kwa unyofu huenda salama, bali yeye azipotoshaye njia zake atagunduliwa. ¹⁰Yeye akonyezaye kwa jicho huleta taabu, na mpumbavu apayukaye huangamia. ¹¹Kinywa cha mwenye haki ni chemchemi ya uzima, bali kinywa cha waovu hufunika jeuri. ¹²Chuki huchochea ugomvi, bali upendo hufunika makosa yote. ¹³Katika midomo ya mwenye ufahamu, hekima hupatikana, bali fimbo ni kwa mgongo wa asiye na akili. ¹⁴Wenye hekima huhifadhi maarifa, bali kinywa cha mpumbavu hukaribisha uharibifu. ¹⁵Mali ya tajiri ndicho mji wake wenye ngome; uharibifu wa maskini ni umaskini wao. ¹⁶Ujira wa mwenye haki huelekea uzimani; faida ya waovu huelekea dhambini. ¹⁷Yeye apokeaye adabu yumo katika njia ya uzima, bali yeye apuuzaye maonyo huwapotosha wengine. ¹⁸Yeye afichaye chuki ni mwongo, na yeye aenezaye masingizio ni mpumbavu. ¹⁹Palipo na maneno mengi, dhambi haikosekani; bali yeye auzuiaye ulimi wake ana hekima. ²⁰Ulimi wa mwenye haki ni fedha iliyo bora; moyo wa waovu una thamani ndogo. ²¹Midomo ya mwenye haki hulisha wengi, bali wapumbavu hufa kwa kukosa akili. ²²Baraka ya Baba yetu huleta utajiri, wala hachanganyi huzuni pamoja nayo. ²³Kutenda uovu ni mchezo kwa mpumbavu, bali hekima ni furaha ya mtu mwenye ufahamu. ²⁴Kile anachokiogopa mwovu kitampata, bali haja ya mwenye haki itatimizwa. ²⁵Dhoruba ikiisha kupita, waovu hutoweka, bali wenye haki husimama imara milele. ²⁶Kama siki kwa meno na moshi kwa macho, ndivyo alivyo mvivu kwa wale wamtumao. ²⁷Kumcha Baba yetu huongeza siku za maisha, bali miaka ya waovu itafupishwa. ²⁸Tumaini la mwenye haki huleta furaha, bali matarajio ya waovu yataangamia. ²⁹Njia ya Baba yetu ni kimbilio kwa wanyofu, bali ni uharibifu kwa watendao mabaya. ³⁰Mwenye haki hatatikiswa kamwe, bali waovu hawatakaa katika nchi. ³¹Kinywa cha mwenye haki hutoa hekima, bali ulimi wa upotovu utakatiliwa mbali. ³²Midomo ya mwenye haki hujua yanayokubalika, bali kinywa cha waovu hujua yaliyo potovu tu.