हितोपदेश 13 FHB Father's Heart Bible™

13 ¹बुद्धिमान् छोरोले आफ्नो बुबाको शिक्षा मान्छ, तर गिल्ला गर्नेले हप्की सुन्दैन। ²आफ्नो मुखको फलबाट मानिसले असल कुराको आनन्द लिन्छ, तर विश्वासघातीको भोक हिंसाको निम्ति हुन्छ। ³आफ्नो मुखको रखवाली गर्नेले आफ्नो प्राण जोगाउँछ, तर जसले आफ्ना ओठ फराकिलो गरी खोल्छ, त्यो विनाशमा पर्छ। ⁴अल्छे मानिसले लालसा गर्छ तर केही पाउँदैन, तर परिश्रमीको भोक प्रशस्त गरी तृप्त हुन्छ। ⁵धर्मीले झूटलाई घृणा गर्छ, तर दुष्टले लाज र अपमान ल्याउँछ। ⁶धार्मिकताले निर्दोष चाल भएकाको रक्षा गर्छ, तर दुष्टताले पापीलाई पल्टाउँछ। ⁷कोही धनी भएको बहाना गर्छ, तैपनि त्योसँग केही छैन; अर्को गरिब भएको बहाना गर्छ, तैपनि त्योसँग प्रशस्त धन-सम्पत्ति छ। ⁸मानिसको धन-सम्पत्तिले उसको प्राण छुटाउन सक्छ, तर गरिबले धम्की सुन्दैन। ⁹धर्मीको ज्योति आनन्दसाथ चम्कन्छ, तर दुष्टको बत्ती निभाइनेछ। ¹⁰घमण्डले झगडाबाहेक केही जन्माउँदैन, तर सल्लाह खोज्नेहरूसँग बुद्धि हुन्छ। ¹¹छलकपटले कमाएको धन घट्दै जान्छ, तर जसले थोरै-थोरै गरी बटुल्छ, त्यसले यसलाई बढाउँछ। ¹²टारिएको आशाले मनलाई रोगी बनाउँछ, तर पूरा भएको इच्छा जीवनको रूख हो। ¹³जसले वचनलाई तुच्छ ठान्छ, त्यसले आफैमाथि विनाश ल्याउँछ, तर जसले आज्ञालाई आदर गर्छ, त्यसले इनाम पाउनेछ। ¹⁴बुद्धिमान्‌को शिक्षा जीवनको मूल हो, जसले मानिसलाई मृत्युका पासोहरूबाट तर्काउँछ। ¹⁵असल बुद्धिले कृपा पाउँछ, तर विश्वासघातीको बाटो तिनीहरूकै विनाश हो। ¹⁶हरेक विवेकी मानिसले ज्ञानसाथ काम गर्छ, तर मूर्खले आफ्नो मूर्खता देखाउँछ। ¹⁷दुष्ट दूत सङ्कष्टमा पर्छ, तर विश्वासी दूतले चङ्गाइ ल्याउँछ। ¹⁸अनुशासनलाई बेवास्ता गर्नेलाई गरिबी र लाज आइपर्छ, तर सुधारलाई मान्नेको आदर हुन्छ। ¹⁹पूरा भएको इच्छा प्राणलाई मीठो लाग्छ, तर दुष्टतादेखि तर्कनु मूर्खहरूलाई घृणित लाग्छ। ²⁰बुद्धिमान्‌हरूसँग हिँड्ने बुद्धिमान् हुन्छ, तर मूर्खहरूको सँगी हानिमा पर्छ। ²¹विपत्तिले पापीहरूलाई खेद्छ, तर असलले धर्मीहरूलाई इनाम दिन्छ। ²²असल मानिसले आफ्ना नातिनातिनाका निम्ति उत्तराधिकार छोड्छ, तर पापीको धन धर्मीका निम्ति सञ्चित गरिन्छ। ²³गरिबको नजोतिएको खेतले प्रशस्त अन्न फलाउन सक्थ्यो, तर न्यायको अभावमा त्यो बढारिन्छ। ²⁴लौरो नचलाउनेले आफ्नो छोरोलाई घृणा गर्छ, तर त्यसलाई प्रेम गर्नेले अनुशासन दिन तत्पर हुन्छ। ²⁵धर्मीले आफ्नो मनले चाहेजति खान्छ, तर दुष्टको पेट भोकै रहन्छ।