ዘፀአት 35

35 ¹ሙሴ የእስራኤልን ሕዝብ ማኅበር ሁሉ ሰብስቦ፣ “አባታችን እንድታደርጓቸው ያዘዛችሁ ነገሮች እነዚህ ናቸው። ²ስድስት ቀን ሥሩ፤ ሰባተኛው ቀን ግን ለእናንተ የተቀደሰ፣ ለአባታችን የተሟላ ዕረፍት ያለው ሰንበት ነው። በዚያ ቀን የሚሠራ ሁሉ ይገደል። ³በሰንበት ቀን በየትኛውም ቤታችሁ እሳት አታንድዱ።”

በፈቃደኝነት ልብ የቀረበ መባ

⁴ሙሴ ለእስራኤል ጉባኤ ሁሉ እንዲህ አለ፤ “አባታችን ያዘዘው ይህ ነው፤ ⁵ከእናንተ መካከል ለአባታችን መባ አምጡ። ፈቃደኛ ልብ ያለው ሁሉ የአባታችንን መባ ያምጣ፤ ወርቅ፣ ብርና ናስ፤ ⁶ሰማያዊ፣ ሐምራዊና ቀይ ክር፣ ጥሩ በፍታ፣ የፍየል ጠጕር፣ ⁷የተለፋ የአውራ በግ ቍርበት፣ ጥሩ ቈዳና የግራር እንጨት፣ ⁸ለመብራቱ ዘይት፣ ለቅብዐ ዘይቱና ለመዐዛ ዕጣን የሚሆን ቅመማ ቅመም፣ ⁹መረግድ ድንጋዮችና ለኤፉዱና ለደረት ልብሱ የሚቀነባበሩ ድንጋዮች።

¹⁰“ከእናንተ መካከል ጥበበኛ የሆነ ሁሉ መጥቶ አባታችን ያዘዘውን ሁሉ ይሥራ፤ ¹¹ማደሪያውን፣ ድንኳኑንና መሸፈኛውን፣ መንጠቆዎቹን፣ ሳንቃዎቹን፣ መወርወሪያዎቹን፣ ምሰሶዎቹንና መሠረቶቹን፤ ¹²ታቦቱን ከመሎጊያዎቹ ጋራ፣ የስርየት መክደኛውንና የሚጋርደውን መጋረጃ፤ ¹³ገበታውን ከመሎጊያዎቹና ከዕቃዎቹ ሁሉ ጋራ፣ የገጽ ኅብስቱንም፤ ¹⁴ለብርሃኑ መቅረዙን ከዕቃዎቹና ከመብራቶቹ ጋራ፣ ለመብራቱም ዘይት፤ ¹⁵የዕጣኑን መሠዊያ ከመሎጊያዎቹ ጋራ፣ ቅብዐ ዘይቱንና መዐዛ ያለውን ዕጣን፣ ለማደሪያው መግቢያ የሚሆነውን መጋረጃ፤ ¹⁶የሚቃጠለውን መሥዋዕት መሠዊያ ከናሱ ፍርግርግ፣ ከመሎጊያዎቹና ከዕቃዎቹ ሁሉ ጋራ፣ የመታጠቢያውን ገንዳ ከመቀመጫው ጋራ፣ ¹⁷የግቢውን መጋረጃዎች ከምሰሶዎቹና ከመሠረቶቹ ጋራ፣ ለግቢው በር የሚሆነውን መጋረጃ፣ ¹⁸የማደሪያውን ችካሎችና የግቢውን ችካሎች ከገመዶቻቸው ጋራ፤ ¹⁹በተቀደሰው ስፍራ ለማገልገል ጥበብ ተሞልቶ የተሠራውን ልብስ፣ ለካህኑ ለአሮን የተቀደሰውን ልብስና ልጆቹ በክህነት እንዲያገለግሉ የሚለብሱትን ልብስ።”

²⁰ከዚያም የእስራኤል ሕዝብ ማኅበር ሁሉ ከሙሴ ዘንድ ወጣ። ²¹ልቡ የተነሣሣው ሁሉ፣ መንፈሱ ያነቃቃው ሁሉ፣ ለመገናኛው ድንኳን ሥራ፣ ለአገልግሎቱ ሁሉና ለተቀደሱት ልብሶች የአባታችንን መባ አመጣ። ²²ወንዶችና ሴቶች አብረው መጡ፤ ፈቃደኛ ልብ ያላቸው ሁሉ የደረት ጌጥ፣ ጕትቻ፣ ማኅተም ቀለበትና አምባር፣ ከወርቅ የተሠራ ዕቃ ሁሉ አመጡ፤ ሁሉም ለአባታችን የወርቅ የማወዛወዝ ቍርባን አቀረቡ። ^a a v22 የማወዛወዝ ቍርባን ለመወሰን ምልክት ሆኖ በእግዚአብሔር ፊት ከፍ ተደርጎ የሚቀርብ መባ ነበር። ²³ሰማያዊ፣ ሐምራዊ ወይም ቀይ ክር፣ ጥሩ በፍታ፣ የፍየል ጠጕር፣ የተለፋ የአውራ በግ ቍርበት ወይም ጥሩ ቈዳ ያለው ሁሉ አመጣ። ²⁴ከብር ወይም ከናስ መባ ማቅረብ የሚችል ሁሉ ለአባታችን መባ አድርጎ አመጣ፤ ለማናቸውም ሥራ የሚሆን የግራር እንጨት ያለው ሁሉ አመጣ። ²⁵ጥበበኛ የሆነች ሴት ሁሉ በእጆቿ ፈተለች፤ የፈተለችውንም ክር አመጣች፤ ሰማያዊ፣ ሐምራዊ፣ ቀይና ጥሩ በፍታ። ²⁶ልባቸው የተነሣሣ ጥበበኛ ሴቶች ሁሉ የፍየሉን ጠጕር ፈተሉ። ²⁷መሪዎቹ መረግድ ድንጋዮችንና ለኤፉዱና ለደረት ልብሱ የሚቀነባበሩ የከበሩ ድንጋዮችን አመጡ፤ ²⁸ቅመማ ቅመም፣ ለብርሃኑ ዘይት፣ ለቅብዐ ዘይትና ለመዐዛ ዕጣን የሚሆነውንም አመጡ። ²⁹አባታችን በሙሴ እጅ ያዘዘውን ሥራ ሁሉ ለማከናወን፣ ልባቸው የፈቀደ እስራኤላዊ ወንድና ሴት ሁሉ ለአባታችን በፈቃዳቸው መባ አመጡ።

በስልኤል በስሙ ተጠራ

³⁰ከዚያም ሙሴ እስራኤላውያንን እንዲህ አለ፤ “እነሆ፣ አባታችን ከይሁዳ ነገድ የሆነውን የሆርን ልጅ የኡሪን ልጅ በስልኤልን በስሙ ጠርቷል፤ ³¹በአባታችንም መንፈስ ሞልቶታል፤ በጥበብ፣ በማስተዋል፣ በዕውቀትና በማናቸውም ዐይነት የእጅ ጥበብ፤ ³²ጥበብ የተሞላባቸውን ንድፎች ይቀምር ዘንድ፣ በወርቅ፣ በብርና በናስ ይሠራ ዘንድ፣ ³³የሚቀነባበሩ ድንጋዮችን በመጥረብ፣ እንጨትንም በመቅረጽ፣ በማናቸውም ዐይነት ጥበባዊ ሥራ ይሠራ ዘንድ። ³⁴አባታችን ያስተምር ዘንድ በበስልኤል ልብ አኑሮታል፤ እርሱና ከዳን ነገድ የሆነው የአኪሳሚክ ልጅ ኤልያብ። ³⁵ለማናቸውም ዐይነት ሥራ በጥበብ ሞላቸው፤ በመቅረጽ፣ በመንደፍ፣ በሰማያዊ፣ በሐምራዊና በቀይ ክር እንዲሁም በጥሩ በፍታ በመጥለፍ፣ በመሽመን፤ በማናቸውም ጥበብ የተካኑ፣ በሐሳብም የተሞሉ ነበሩ።”