Shongzā 35

35 ¹Mosesna Israelwui mibing, yarui ashangva̱ saikora kazipkhuilaga athumli hānga, "Hi ithumwui Avāna nathumna sākhavai kaso kahai tuibing china: ²Tharukthang ot sāra, kha kashinethang chi nathumwui vang katharana, ithumwui Avāli chingri eina ngasāmkakhui sabbathna. Chithang ot kasā kachikathā ali sāthatra. ³Nathumna sabbaththang nathumwui shim kachiva̱li mei marungpaimana."

Ning Khuisang Chigat

⁴Mosesna Israelwui yarui ashangva̱ saikorali hānga, "Hi ithumwui Avāna kakasona: ⁵Nathumwui alung eina ithumwui Avāli chigat khuilu. Ning khuisang kachiva̱na ithumwui Avāwui chigat sāda sinā, lupāsā, kala pithrai, ⁶khamayinga, hungrisi, kala hungshi kahai chonsā, manakta hākakhui kazaira̱, meha, ⁷yaohui mathen kahai, mehui, acaciathing, ⁸kahorwui vang thaora̱, tharchisin khavai thao kala nganamkaphā thaowui vang ayur-ayā, ⁹kala ephod kala thikhomwui vang onyx ngalung kala ruksang khavai ngalung yur khuirāranu.

¹⁰"Nathumwui alungli khalei sākathei mi kachiva̱ rāda ithumwui Avāna kaso kahai saikora sāranu: ¹¹tabernacle, chiwui kachonshim kala faror khavai, hokkhui khavaibing, akombing, khamakhārra thingbing, pākra̱bing, kala apheibing, ¹²oko eina chiwui thingphānbing, lukhamashan pamkhong, kala chi sākhamhaowui mairār chonrān; ¹³table eina chiwui thingphān kala chiwui khorkhongbing saikora, kala ngasokhamiwui khamui; ¹⁴kahorwui vang thaomeishong, chiwui khorkhongbing kala chiwui thaomeibing, kala shārkhavai thao; ¹⁵nganamkaphā riktā khavai hanphut eina chiwui thingphānbing; neokhavai thao kala nganamkaphā thao; kala tabernaclewui khāmongli rānkhavai chonrān; ¹⁶rikkatā kachigatwui hanphut eina chiwui pithrai yākrei, chiwui thingphān, kala chiwui khorkhongbing saikora; khongsai eina chiwui aphei, ¹⁷yāngkhupwui rānkhavai kachon, chiwui pākra̱bing kala apheibing, kala chiwui ngaveiwui chonrān, ¹⁸tabernaclewui thingshun kala yāngkhupwui thingshun eina athumwui khara̱bing; ¹⁹katharapamli otram ngatha̱ khavai themlāk eina sākakhui sāribing, pāngmon Aaronwui kathara sāribing, kala anaomayarabing pāngmon sāda otram ngatha̱mi khavai sāribing sāranu."

²⁰Chieina Israelnaobingwui ashangva̱ saikorana Moseswui eina thuihaowa. ²¹Awui ning ngatha̱mi kahai mi kachiva̱, kala awui manglāna rāza̱mi kahai mi kachiva̱na, kazip khavai kachonshimwui ot khavai, chiwui otram ngatha̱ saikorawui vang, kala kathara sāribingwui vang ithumwui Avāwui chigat chi khuirāhaira. ²²Mayarnaobing kala sha̱naobing katonga rāhaowa; ning sāngairereo kahai mi saikorana chā, unra̱, shoi khutop, kala hār kaji sinā ot yur kachiva̱ saikora khuirāhaira, kala mi kachiva̱na sinā chi ithumwui Avāli khayitchigat sāda chigata. ^a a v22 Khayitchigat hi tharchigat sāki thada, Varewui mangāli khāngkāda samphangngasaka kachigat china. ²³Khamayinga, hungrisi, lah hungshi kahai chonsā, manakta hākakhui kazaira̱, meha, yaohui mathen kahai, lah mehui leikahai mi kachiva̱na chi khuirāhaira. ²⁴Lupāsā lah pithraisā chigat khami khavai mi kachiva̱na chi ithumwui Avāwui chigat khavai khuirāhaira; kala ot akai khavai acaciathing leikahai mi saikorana chi khuirāhaira. ²⁵Sākathei sha̱nao kachiva̱na apāng eina hāhaowa, kala awui hākahai chonsā, khamayinga, hungrisi, hungshi kahai, kala manakta hākakhui kazaira̱ chi khuirāhaira. ²⁶Ning ngatha̱mi kahai sākathei sha̱nao saikorana meha chi hāhaowa. ²⁷Akhokabingna ephod eina thikhomwui vang onyx ngalung kala ruksang khavai ngalung, ²⁸kala nganamkaphā otyur, kala thaomeiwui vang, neomi khavai thaowui vang, kala nganamkaphā thaowui vang thaora̱ khuirāhaira. ²⁹Awui ning eina rāza̱mi kahai Israelwui mayarnaobing kala sha̱naobing kachiva̱na, ithumwui Avāna Mosesli kaso kahai ot saikorawui vang, ithumwui Avāli lemmet kachigat khuirāhaira.

Bezalel Ming eina Hokahai

³⁰Chieina Mosesna Israelnaobingli hānga, "Yanglu, ithumwui Avāna Judah shangwui Uriwui naomayara, Hurwui ara̱ Bezalelli ming eina hokhuihaira, ³¹kala ithumwui Avāwui Manglā eina ali sākathei, theishingkakhui, theikakhui, kala pāngthem yur kachiva̱ saikora chipemmihaira, ³²pāngthem otsak khangarān khavai, sinā, lupāsā, kala pithrai eina ot sākhavai, ³³ruksang khavai ngalung kashānda, kala thingli chankasang, them yur kachiva̱ saikorawui ot sākhavaina. ³⁴Ithumwui Avāna Bezalel kala Dan shangwui Ahisamachwui naomayara Oholiab aniwui ningli tamchithei khavai sangmihaira. ³⁵Ana athumli rukkasang, themlāk, kala khamayinga, hungrisi, kala hungshi kahai kala manakta hākakhui kazaira̱ chonsā eina aphor phorkasang, kala rakkhui, ot ayur kachiva̱ sākhavai thangkhamei eina chipemmihaira. Athum them saikorali sākathei kala machinme eina pemtinghai kahai mina."