Eksodu 35

35 ¹Mose kó gbogbo àwùjọ àwọn ọmọ Israẹli jọ, ó sì sọ fún wọn pé, “Wọ̀nyí ni àwọn nǹkan tí Baba wa pàṣẹ pé kí ẹ ṣe. ²Ẹ máa ṣiṣẹ́ fún ọjọ́ mẹ́fà; ọjọ́ keje jẹ́ mímọ́ fún yín, Sabáti ìsinmi pípé sí Baba wa. Ẹnikẹ́ni tí ó bá ṣiṣẹ́ ní ọjọ́ náà ni a gbọdọ̀ pa. ³Ẹ kì yóò dáná ní èyíkéyìí nínú ilé yín ní ọjọ́ Sabáti.”

Ọrẹ Láti Inú Ọkàn Tí Ó Fẹ́

⁴Mose sọ fún gbogbo àpéjọ Israẹli pé, “Èyí ni ohun tí Baba wa pàṣẹ: ⁵Ẹ mú ọrẹ fún Baba wa láti àárín yín. Jẹ́ kí ẹnì kọ̀ọ̀kan tí ó ní ọkàn tí ó fẹ́ mú ọrẹ Baba wa wá: wúrà, fàdákà, àti idẹ. ⁶Òwú aláró, elése àlùkò, àti òdòdó, aṣọ ọ̀gbọ̀ dáradára, irun ewúrẹ́, ⁷awọ àgbò tí a ti rì, awọ dáradára, àti igi ṣittimu, ⁸òróró fún ìmọ́lẹ̀, olóòórùn dídùn fún òróró ìfòróróyàn àti fún tùràrí dídùn, ⁹àti àwọn òkúta óníkìsì àti àwọn òkúta ìfisí, fún ẹ́fọ́dù àti fún ìgbàyà.

¹⁰“Jẹ́ kí gbogbo ẹni tí ó ní ọgbọ́n ọwọ́ láàrin yín wá kí ó sì ṣe gbogbo ohun tí Baba wa ti pàṣẹ: ¹¹àgọ́ ìjọsìn: àgọ́ rẹ̀, ìbòrí rẹ̀, àwọn ìkọ̀ rẹ̀, àwọn pákó rẹ̀, àwọn ọ̀pá rẹ̀, àwọn òpó rẹ̀, àti àwọn ihò ìtẹ̀bọ̀ rẹ̀, ¹²àpótí ẹ̀rí pẹ̀lú àwọn ọ̀pá rẹ̀, ìtẹ́ àánú, àti aṣọ ìkélé tí ó bò ó; ¹³tábìlì pẹ̀lú àwọn ọ̀pá rẹ̀ àti gbogbo ohun èlò rẹ̀, àti àkàrà ìfihàn; ¹⁴ọ̀pá fìtílà fún ìmọ́lẹ̀, pẹ̀lú ohun èlò rẹ̀ àti àwọn fìtílà rẹ̀, àti òróró fún ìmọ́lẹ̀; ¹⁵pẹpẹ tùràrí àti àwọn ọ̀pá rẹ̀; òróró ìfòróróyàn àti tùràrí dídùn; àti aṣọ ìkélé fún ẹnu-ọ̀nà àgọ́ ìjọsìn; ¹⁶pẹpẹ ẹbọ sísun pẹ̀lú ààrò idẹ rẹ̀, àwọn ọ̀pá, àti gbogbo ohun èlò rẹ̀; agbádá àti ẹsẹ̀ rẹ̀, ¹⁷àwọn aṣọ ìkélé àgbàlá, àwọn òpó rẹ̀ àti àwọn ihò ìtẹ̀bọ̀ rẹ̀, àti aṣọ ìkélé fún ẹnu-ọ̀nà rẹ̀, ¹⁸àwọn ìṣó àgọ́ ìjọsìn àti àwọn ìṣó àgbàlá, pẹ̀lú àwọn okùn wọn; ¹⁹àwọn aṣọ híhun dáradára fún iṣẹ́ ìsìn ní Ibi Mímọ́, àwọn aṣọ mímọ́ fún Aaroni àlùfáà, àti àwọn aṣọ fún àwọn ọmọ rẹ̀ láti ṣe iṣẹ́ àlùfáà.”

²⁰Nígbà náà ni gbogbo ìjọ àwọn ọmọ Israẹli kúrò lọ́dọ̀ Mose. ²¹Olúkúlùkù ẹni tí ọkàn rẹ̀ rú u sókè, olúkúlùkù ẹni tí ẹ̀mí rẹ̀ sún un, mú ọrẹ Baba wa wá fún iṣẹ́ àgọ́ àjọ, gbogbo iṣẹ́ ìsìn rẹ̀, àti àwọn aṣọ mímọ́. ²²Àwọn ọkùnrin àti obìnrin jọ wá; gbogbo àwọn tí ọkàn wọn fẹ́ mú àwọn ìkọ́ àyà, yẹtí, òrùka èdìdì, àti ẹ̀gbà apá wá—onírúurú ohun wúrà gbogbo—gbogbo wọn sì gbé ọrẹ fífì ti wúrà kalẹ̀ síwájú Baba wa. ^a a v22 Ọrẹ fífì jẹ́ ẹ̀bùn tí a gbé sókè ní ọ̀nà tí ó bójúmu tí a sì fi hàn níwájú Ọlọ́run gẹ́gẹ́ bí iṣẹ́ ìyàsímímọ́. ²³Olúkúlùkù ẹni tí ó ní òwú aláró, elése àlùkò, tàbí òdòdó, aṣọ ọ̀gbọ̀ dáradára, irun ewúrẹ́, awọ àgbò tí a ti rì, tàbí awọ dáradára mú wọn wá. ²⁴Olúkúlùkù ẹni tí ó lè fi fàdákà tàbí idẹ ṣe ọrẹ mú un wá gẹ́gẹ́ bí ọrẹ Baba wa; olúkúlùkù ẹni tí ó ní igi ṣittimu fún iṣẹ́kíṣẹ́ nínú iṣẹ́ náà mú un wá. ²⁵Gbogbo obìnrin tí ó ní ọgbọ́n ọwọ́ ran òwú pẹ̀lú ọwọ́ rẹ̀, ó sì mú òwú rírán rẹ̀ wá: aláró, elése àlùkò, òdòdó, àti aṣọ ọ̀gbọ̀ dáradára. ²⁶Gbogbo àwọn obìnrin tí ó ní ọgbọ́n ọwọ́ tí ọkàn wọn rú sókè ran irun ewúrẹ́. ²⁷Àwọn olórí mú àwọn òkúta óníkìsì àti àwọn òkúta iyebíye fún ìfisí wá, fún ẹ́fọ́dù àti fún ìgbàyà, ²⁸àti olóòórùn dídùn, àti òróró fún ìmọ́lẹ̀, fún òróró ìfòróróyàn, àti fún tùràrí dídùn. ²⁹Gbogbo ọkùnrin àti obìnrin Israẹli tí ọkàn rẹ̀ fẹ́ ẹ mú ọrẹ àtinúwá wá fún Baba wa fún gbogbo iṣẹ́ tí Baba wa pàṣẹ láti ọwọ́ Mose.

A Pe Bẹsaleli Lórúkọ

³⁰Nígbà náà ni Mose sọ fún àwọn ọmọ Israẹli pé, “Ẹ wò ó, Baba wa ti pe Bẹsaleli lórúkọ, ọmọ Uri, ọmọ Huri, ti ẹ̀yà Juda, ³¹ó sì fi Ẹ̀mí Baba wa kún un—ọgbọ́n, òye, ìmọ̀, àti onírúurú iṣẹ́ ọnà gbogbo, ³²láti hùmọ̀ àwọn àpẹẹrẹ ọnà, láti fi wúrà, fàdákà, àti idẹ ṣiṣẹ́, ³³nínú gígé àwọn òkúta fún ìfisí àti nínú gbígbẹ́ igi, láti ṣiṣẹ́ nínú onírúurú iṣẹ́ ọgbọ́n ọwọ́ gbogbo. ³⁴Baba wa ti fi sí ọkàn Bẹsaleli láti máa kọ́ni—òun àti Oholiabu ọmọ Ahisamaki, ti ẹ̀yà Dani. ³⁵Ó fi ọgbọ́n ọwọ́ kún wọn fún onírúurú iṣẹ́ gbogbo—fífín, dídá àpẹẹrẹ, iṣẹ́ abẹ́rẹ́ ní òwú aláró, elése àlùkò, àti òdòdó àti aṣọ ọ̀gbọ̀ dáradára, àti híhun—tí wọ́n ní ọgbọ́n nínú iṣẹ́ gbogbo, tí wọ́n kún fún èrò.”