Moses pora sabha ke matise
Moses pora sabha ke amar Pitri ki mangise eitu koise, aru dan khan sob nijor mon pora diya ase: jun manuh laga mon uthise, tai sona, suta, chamra, tel, mohamulyo pathor ani dise. Kam jana mahila khan nijor hath pora suta katise. Bezalel aru Oholiab laga naam lise, kam koribo karne aru dusra khan ke sikhai dibo karne bhi dan pai kene.
35 1Moses pora Israel laga manuh khan laga pura sabha ke joma kori kene tarkhan ke koise, “Eitu khan amar Pitri pora tumikhan ke koribole hukum diya jinis khan ase. 2Choh din kaam koribi; sat number din tu tumikhan nimite pobitro ase, amar Pitri nimite pura aram laga Sabbath din ase. Kun manuh hei din te kaam koribo, tar ke morai dibo lage. 3Sabbath din te tumikhan laga ekta bhi ghor te jui nojolabi.”
Itcha thaka mon pora diya daan
4Moses pora Israel laga pura sabha ke koise, “Eitu amar Pitri pora hukum diya kotha ase: 5Tumikhan majot pora amar Pitri nimite ekta daan uthabi. Kun laga mon itcha ase, hei sob pora amar Pitri laga daan ani dibi: suna, chandi, aru pitol. 6Neela, bengoni, aru lal rong laga suta, bhal mihin kapor, chagol laga chuli, 7rong kora mer laga chamra, bhal chamra, aru acacia kath, 8puhor nimite tel, abhishek laga tel nimite aru sugandh thaka dhoop nimite masala, 9aru onyx pathor khan aru bosai dibole pathor khan, ephod nimite aru chati laga kapor nimite.
10“Tumikhan majot kun manuh te hunor ase, hei sob ahhi kene amar Pitri pora hukum diya sob jinis bonabi: 11pobitro tombu: tar tombu, dhakni, hook khan, khuri khan, gojal khan, khamba khan, aru bheti khan, 12tar danda khan logot niyom-sinduk, doya laga ason, aru eitu ke dhaki thaka pordah; 13tar danda khan aru tar sob bostu khan logot mez, aru Isor usor te thaka roti; 14puhor nimite deeya rakha jaga, tar bostu khan aru tar deeya khan logot, aru puhor nimite tel; 15dhoop laga bedi aru tar danda khan; abhishek laga tel aru sugandh dhoop; aru pobitro tombu laga dorja nimite pordah; 16pitol laga jali, danda khan, aru tar sob bostu khan logot jolai diya bolidan laga bedi; dhua-patra aru tar thiya kora jaga, 17chowk laga pordah khan, tar khamba khan aru bheti khan, aru tar dorja nimite pordah, 18pobitro tombu laga khuta khan aru chowk laga khuta khan, tar rusi khan logot; 19Pobitro Jaga te sewa koribole bhal kori buna kapor khan, purohit Aaron nimite pobitro kapor khan, aru tar laga chokra khan purohit hoi kene sewa koribole kapor khan.”
20Tetiya Israel laga manuh khan laga pura sabha Moses usor pora jai jaise. 21Kun laga mon jagai dise, kun laga atma hilai dise, hei sob manuh pora milan laga tombu laga kaam nimite, tar sob sewa nimite, aru pobitro kapor khan nimite amar Pitri laga daan ani dise. 22Mota aru maiki eke logote ahhise; kun laga mon itcha thakise, hei sob pora chati laga gehna, kaan-phul, chhap laga angthi, aru hath laga churi—sob kisim laga suna jinis—ani dise, aru sob pora amar Pitri ke suna laga hilai diya daan dise. a a v22 Hilai diya daan tu nijor ke samarpan kora nisena Isor laga samne te uthai kene dikhai diya ekta daan thakise. 23Kun logot te neela, bengoni, nahole lal rong laga suta, bhal mihin kapor, chagol laga chuli, rong kora mer laga chamra, nahole bhal chamra thakise, hei sob pora eitu khan ani dise. 24Kun pora chandi nahole pitol laga daan dibo parise, hei sob pora amar Pitri laga daan nisena eitu ani dise; kun logot te kaam laga kiba kaam nimite acacia kath thakise, hei pora eitu ani dise. 25Hunor thaka sob maiki pora nijor hath pora suta katise aru nijor kata suta ani dise: neela, bengoni, lal, aru bhal mihin kapor. 26Kun hunor thaka maiki khan laga mon jagai dise, hei sob pora chagol laga chuli katise. 27Mukhyia khan pora onyx pathor khan aru bosai dibole moni khan, ephod nimite aru chati laga kapor nimite ani dise, 28aru masala, aru puhor nimite tel, abhishek laga tel nimite, aru sugandh dhoop nimite ani dise. 29Kun Israel laga mota aru maiki laga mon itcha korise, hei sob pora amar Pitri pora Moses dwara hukum diya sob kaam nimite amar Pitri ke itcha laga daan ani dise.
Bezalel ke nam loi kene matise
30Tetiya Moses pora Israel laga manuh khan ke koise, “Sabi, amar Pitri pora Judah laga jati laga, Hur laga nati, Uri laga chokra Bezalel ke nam loi kene matise, 31aru tar ke amar Pitri laga Atma pora bhorta kori dise—hunor, buddhi, gyaan, aru sob kisim laga kaam kora gun, 32sundor design khan bonabole, suna, chandi, aru pitol te kaam koribole, 33bosai dibole pathor kata te aru kath khunda te, sob kisim laga hunor laga kaam koribole. 34Amar Pitri pora Bezalel laga mon te sikhai dibole rakhise—tar aru Dan laga jati laga, Ahisamach laga chokra Oholiab ke. 35Tar pora tarkhan ke sob kisim laga kaam nimite hunor pora bhorta kori dise—khundi kene likha, design bona, neela, bengoni, aru lal rong laga suta aru bhal mihin kapor te buti-kaam kora, aru kapor buna—sob hunor laga kaam te nipuna, buddhi pora bhorta.”