Musa Ya Tara Jama'a

Musa ya faɗa wa taron jama'a abin da Ubanmu ya roƙa, bayarwar kuma ta yardar rai ce ɗungum: duk wanda zuciyarsa ta motsa shi ya kawo zinariya, zare, fata, mai, duwatsu masu daraja. Mata masu fasaha suka yi kaɗi da hannuwansu. Aka ambaci Bezalel da Oholiyab, waɗanda aka ba su baiwa ba ta aiki kaɗai ba har ma ta koya wa waɗansu.

Babi na 35.

Musa ya tara dukan jama'ar Isra'ila ya ce musu, “Ga abubuwan da Ubanmu ya umarce ku ku yi. Ku yi aiki kwana shida; rana ta bakwai kuwa mai tsarki ce a gare ku, Asabar ta cikakken hutu ga Ubanmu. Duk wanda ya yi aiki a cikinta, dole a kashe shi. Kada ku kunna wuta a cikin kowane gidajenku a ranar Asabar.”

Baikon Zuciya Mai Niyya

Musa ya ce wa dukan jama'ar Isra'ila, “Ga abin da Ubanmu ya umarta, Ku ɗauko daga cikinku baiko domin Ubanmu. Bari kowace zuciya mai niyya ta kawo baikon Ubanmu, wato zinariya, da azurfa, da tagulla. da zare mai shuɗi, da shunayya, da jar garura, da lallausan lilin, da gashin awaki, da fatun raguna jajjaye, da lallausan fata, da itacen ƙirya, da mai domin fitila, da kayan ƙamshi domin man shafawa da kuma turaren ƙamshi, da duwatsun onis da duwatsu domin kafawa, domin efod da kuma ƙyallen ƙirji.

“Bari kowane gwani a cikinku ya zo ya yi dukan abin da Ubanmu ya umarta, wato tabanakul, da tentinsa, da murfinsa, da maɗauransa, da katakansa, da sandunansa, da ginshiƙansa, da kuma rammukansa, da akwatin alkawari da sandunansa, da murfin jinƙai, da labulen da yake rufe shi; da tebur da sandunansa da dukan kayayyakinsa, da kuma gurasar Kasancewa; da madogarar fitila domin haske, da kayayyakinta da fitilunta, da kuma mai domin fitila; da bagaden turare da sandunansa; da man shafawa da turaren ƙamshi; da kuma labulen ƙofar shiga tabanakul; da bagaden hadaya ta ƙonawa da ragar tagullarsa, da sandunansa, da dukan kayayyakinsa; da daron wanka da kuma matsayinsa, da labulen harabar, da ginshiƙanta da rammukanta, da kuma labulen ƙofarta, da turakun tabanakul da turakun harabar, tare da igiyoyinsu; da kyakkyawan saƙaƙƙun tufafi domin hidima a Wuri Mai Tsarki, da tsarkakan tufafi domin Haruna firist, da kuma tufafin 'ya'yansa maza domin su yi hidimar firist.”

Sai dukan jama'ar Isra'ila suka bar Musa. Duk wanda zuciyarsa ta motsa shi, duk wanda ruhunsa ya iza shi, ya kawo gudummawa domin Ubanmu saboda aikin tentin sujada, da dukan hidimarsa, da kuma tsarkakan tufafi. Maza da mata suka zo tare; duk masu zuciya mai niyya suka kawo fogaye, da 'yan kunne, da zoben hatimi, da mundaye, wato kowane irin kayan zinariya, kowa kuwa ya miƙa hadaya ta kaɗawa ta zinariya ga Ubanmu. ^a Duk wanda yake da zare mai shuɗi, ko shunayya, ko jar garura, ko lallausan lilin, ko gashin awaki, ko fatun raguna jajjaye, ko lallausan fata, ya kawo su. Duk wanda zai iya ba da gudummawa ta azurfa ko tagulla ya kawo ta a matsayin gudummawa domin Ubanmu; duk wanda yake da itacen ƙirya domin kowane aiki ya kawo shi. Kowace mace gwaniya ta kaɗa da hannuwanta ta kawo zarenta da ta kaɗa, wato mai shuɗi, da shunayya, da jar garura, da lallausan lilin. Dukan matan nan gwanaye waɗanda zukatansu suka motsa su suka kaɗa gashin awaki. Shugabannin kuwa suka kawo duwatsun onis da duwatsu masu daraja domin kafawa, domin efod da kuma ƙyallen ƙirji, da kayan ƙamshi, da mai domin fitila, da domin man shafawa, da kuma domin turaren ƙamshi. Kowane mutumin Isra'ila, namiji da mace, wanda zuciyarsa ta yarda, ya kawo baiko na yardar rai ga Ubanmu domin dukan aikin da Ubanmu ya umarta ta wurin Musa.

An Kirawo Bezalel da Suna

Sai Musa ya ce wa Isra'ilawa, “Ku duba, Ubanmu ya kirawo Bezalel ɗan Uri, ɗan Hur, na kabilar Yahuza, da suna, ya kuma cika shi da Ruhun Ubanmu, wato gwaninta, da fahimi, da sani, da kuma kowane irin sana'a, domin ƙirƙiro zane-zane masu kyau, da aiki da zinariya, da azurfa, da tagulla, da sassaƙa duwatsu domin kafawa, da sassaƙa itace, domin yin kowane irin sana'a ta gwaninta. Ubanmu ya sa a zuciyar Bezalel iyawar koyarwa, shi da Oholiyab ɗan Ahisamak, na kabilar Dan. Ya cika su da gwaninta domin kowane irin aiki, wato sassaƙa, da zane, da ɗinki mai ado da zare mai shuɗi, da shunayya, da jar garura, da lallausan lilin, da kuma saƙa, gwanaye a kowace sana'a, cike da dabaru.”