ሙሴ ነቲ ማሕበር ይፅውዕ

ሙሴ ነቲ ማሕበር ኣቦና ዝደለዮ ነገራት ነገሮም፥ እቲ ምሃብ ከዓ ፍፁም ብፍቓድ ነበረ፦ ነፍሲ ወከፍ ልቡ ዝተንቀሳቐሶ ወርቅን ፈትልን ቈርበትን ዘይትን ኣእማን መረግድን የምፅእ ነበረ። ክኢላታት ኣንስቲ ድማ ብገዛእ ኣእዳወን ይፈትላ ነበራ። ባስልኤልን ኤልያብን ተሰምዩ፥ ክሰርሑ ጥራሕ ዘይኮነ ንኻልኦት ክምህሩ'ውን ተዓደሉ።

ምዕራፍ 35።

ሙሴ ንብዘሎ ማሕበር ደቂ እስራኤል ኣኪቡ ከምዙይ በሎም፦ “እዚ ኣቦና ክትገብርዎ ዝኣዘዘኩም ነገራት እዩ። ሽዱሽተ መዓልቲ ስራሕ ይስራሕ፤ እታ ሻውዐይቲ መዓልቲ ግና ንኣኻትኩም ቅድስቲ፥ ንኣቦና ሰንበት ዕረፍቲ እያ። ኣብኣ ዝሰርሕ ኵሉ ይቀተል። ብመዓልቲ ሰንበት ኣብ ዝኾነ ኣባይትኹም ሓዊ ኣይተንድዱ።”

ብፍቓድ ዝወሃብ መባእ

ሙሴ ንብዘሎ ማሕበር ደቂ እስራኤል ከምዙይ በሎም፦ “ኣቦና ዝኣዘዞ ነገር እዙይ እዩ፦ ካባኻትኩም ንኣቦና መባእ ውሰዱ። ነፍሲ ወከፍ ፍቓደኛ ልቢ ዘለዎ ድማ ነቲ መባእ ኣቦና የምፅእ፦ ወርቅን ብሩርን ነሃስን፥ ሰማያውን ሓምራውን ውፁእ ቀይሕ ዝኾነ ፈትልን፥ ቀጭን ሃርን፥ ፀጕሪ ጤልን፥ ዝተቐረፀ ቈራብቲ ማጓሉን፥ ልስሉስ ቈራብትን፥ ዕንፀይቲ ሰራው፥ ንቐንዲል ዝኸውን ዘይትን፥ ንመቕብኢ ዘይትን ንጥዑም ዕጣንን ዝኸውን ቀመማትን፥ ኣእማን መረግድ፥ ዝስኳዕ ኣእማንን፥ ንኤፉድን ንሳንቃ ኣፍ ልብን።

“ካባኻትኩም ጥበብ ዘለዎ ኵሉ ሰብ መፂኡ ነቲ ኣቦና ዝኣዘዞ ዅሉ ይስራሕ፦ እቲ መሕደሪ ድንኳን፥ ድንኳኑን፥ መኽደንን፥ ቝልፉን፥ ሉሑን፥ ጋድማቱን፥ ኣዕማዱን፥ ኣእጋሩን፥ እቲ ታቦት ምስ መፃውሩን፥ እቲ መኽደንን፥ እቲ ዝጋርዶ መጋረጃን፥ እቲ ጠረጴዛ ምስ መፃውሩን ኵሉ ኣቑሑኡን፥ ሕብስቲ ቝርባንን፥ እቲ ብርሃን ዝህብ ቐዋሚ ቐንዲል፥ ምስ ኣቑሑኡን ቐናዲሉን፥ ንቐንዲል ዝኸውን ዘይትን፥ እቲ መሰውኢ ዕጣንን መፃውሩን፥ መቕብኢ ዘይትን ጥዑም ዕጣንን፥ ነቲ ኣፍ ደገ ድንኳን መዕፀዊ መጋረጃን፥ እቲ መሰውኢ ናይቲ ዝቃፀል መስዋእቲ ምስ ብነሃስ ዝተሰርሐ መጋረዲኡን፥ መፃውሩን ኵሉ ኣቑሑኡን፥ እቲ ገበራን ኣጋሮኡን፥ እቲ መጋረጃታት ቕፅርን፥ ኣዕማዱን ኣእጋሩን፥ ነቲ ኣፍ ደገ ዝኸውን መጋረጃን፥ ሽኻላት እቲ ድንኳንን ሽኻላት እቲ ቕፅርን ምስ ኣግማዶምን፥ እቲ ኣብ መቕደስ ንምግልጋል ዝኸውን ብጥበብ ዝተኣልመ ኣልባስን፥ እቲ ንካህን ኣሮን ዝኸውን ቅዱስ ኣልባስን፥ ደቁ ካህናት ኮይኖም ከገልግሉ ዝኽደንዎ ኣልባስን።”

ሽዑ ብዘሎ ማሕበር ደቂ እስራኤል ካብ ሙሴ ወፁ። ነፍሲ ወከፍ ልቡ ዝተንቀሳቐሶ፥ ነፍሲ ወከፍ መንፈሱ ዝደፋፍኦ ድማ፥ ንስራሕ እቲ መራኸቢ ድንኳንን ንዅሉ ኣገልግሎቱን ንቅዱስ ኣልባሳት ዝኸውን መባእ ኣቦና ኣምፅአ። ሰብኡትን ኣንስትን ብሓደ መፁ፤ ፍቓደኛ ልቢ ዘለዎም ኵሎም ድማ ኣምባር፥ ኵትሻ፥ ቀለበት፥ ኣልቦ፥ ብዘሎ ዓይነት ኣቕሓ ወርቅን ኣምፅኡ፤ ነፍሲ ወከፍ ድማ ነቲ ወርቂ እናወዝወዘ ንኣቦና መስዋእቲ ኣቕረበ። ^a ሰማያዊ፥ ሓምራዊ፥ ውፁእ ቀይሕ ዝኾነ ፈትሊ፥ ሃሪ፥ ፀጕሪ ጤል፥ ዝተቐረፀ ቈራብቲ ማጓሉ፥ ወይ ልስሉስ ቈራብቲ ዝነበሮ ዅሉ ሰብ ኣምፅኦ። ብሩር ወይ ነሃስ ከበርክት ዝኽእል ኵሉ ሰብ ድማ ንመባእ ኣቦና ኣምፅኦ፤ ንዝኾነ ስራሕ ዝኸውን ዕንፀይቲ ሰራው ዘለዎ ዅሉ ድማ ኣምፅኦ። ጥበብ ዘለዋ ኵላ ሰበይቲ ድማ ብኢዳ ፈተለት፤ ነቲ ዝፈተለቶ ፈትሊ ኸዓ ኣምፅአቶ፦ ሰማያውን ሓምራውን ውፁእ ቀይሕን ቀጭን ሃርን። ልበን ዝተንቀሳቐሰ ጥበብ ዘለወን ኵለን ኣንስቲ ድማ ነቲ ፀጕሪ ጤል ፈተላ። እቶም መራሕቲ ድማ ኣእማን መረግድ፥ ንኤፉድን ንሳንቃ ኣፍ ልብን ዝስኳዕ ክቡር ኣእማንን ኣምፅኡ፥ ቀመማትን፥ ንብርሃንን ንመቕብኢ ዘይትን ንጥዑም ዕጣንን ዝኸውን ዘይትን ኣምፅኡ። ልቦም ዝፈቐደሎም ኵሎም ሰብኡትን ኣንስትን ደቂ እስራኤል ድማ፥ ነቲ ኣቦና ብሙሴ ገይሩ ክግበር ዝኣዘዞ ዅሉ ስራሕ፥ ንኣቦና ብፍቓዶም መባእ ኣምፅኡ።

ባስልኤል ብስሙ ተፀውዐ

ሽዑ ሙሴ ንደቂ እስራኤል ከምዙይ በሎም፦ “እንሆ፥ ኣቦና ንባስልኤል፥ ወዲ ኡሪ ወዲ ሁር፥ እቲ ካብ ነገድ ይሁዳ ዝኾነ፥ ብስሙ ፀዊዑ ኣሎ። ኵሉ ዓይነት ስራሕ ምእንቲ ክኽእል ድማ፥ ብመንፈስ ኣቦና፥ ብጥበብን ምስትውዓልን ፍልጠትን ብዘሎ ዓይነት ብልሓትን መልኦ፤ ስራሕ ጥበብ ክሰርሕ፥ ብወርቅን ብብሩርን ብነሃስን ክሰርሕ፥ ክቡር እምኒ ቐሪፁ ክስኵዕን፥ ዕንፀይቲ ክፀርብን፥ ኵሉ ዓይነት ስራሕ ጥበብ ክገብር። ኣቦና ድማ ኣብ ልቢ ባስልኤል ክምህር ኣንበረሉ፤ ንሱን ኤልያብን፥ ወዲ ኣሒሳማክ፥ እቲ ካብ ነገድ ዳን ዝኾነ። ንዅሉ ዓይነት ስራሕ ዝኸውን ጥበብ መልኦም፦ ናይ ቐራፅን ናይ ኣላምን፥ ብሰማያውን ሓምራውን ውፁእ ቀይሕ ዓለባን ሃርን ናይ ጠላፍን፥ ናይ ኣላምን ስራሕ፤ ኣብ ኵሉ ስራሕ ጥበብ ክኢላታት፥ ምህዞ ዝመልኦምን ገበሮም።”