ዘፀኣት 36 FHB Father's Heart Bible™

36 ¹ባስልኤልን ኤልያብን፥ ነቲ መቕደስ ንምስራሕ ኣቦና ጥበብን ምስትውዓልን ዝሃቦ ኵሉ ክኢላ ሰብን፥ ከምቲ ኣቦና ዝኣዘዞ ዅሉ ነቲ ስራሕ ይስርሑ።

²ሽዑ ሙሴ ንባስልኤልን ንኤልያብን፥ ኣቦና ኣብ ልቦም ጥበብ ዝሃቦ ኵሉ ክኢላ ሰብን፥ ነቲ ስራሕ መፂኦም ክሰርሑ ልቦም ዘለዓዓሎም ዅሎምን ፀውዖም። ³ነቲ ደቂ እስራኤል ነቲ መቕደስ ንምስራሕ ዘምፅእዎ ኵሉ መባእ ካብ ሙሴ ተቐበሉ። እቶም ህዝቢ ግና ንግሆ ንግሆ ብፍቓዶም ዝወሃብ መባእ የምፅኡሉ ነበሩ። ⁴ኵሎም እቶም ኵሉ ስራሕ መቕደስ ዝሰርሑ ዝነበሩ ክኢላታት ድማ፥ ነፍሲ ወከፍ ካብቲ ዝሰርሖ ዝነበረ ስራሕ ተፈልዩ መፁ። ⁵ንሙሴ ድማ “እቲ ህዝቢ ነቲ ኣቦና ክንገብሮ ዝኣዘዘና ስራሕ፥ ካብ ዘድሊ ኣዝዩ ኣብዚሑ የምፅእ ኣሎ” በልዎ።

⁶ሽዑ ሙሴ ኣዘዘ፤ ኣብ ኵሉ እቲ ሰፈር ድማ “ሰብኣይ ኮነ ሰበይቲ ደጊም ንመቕደስ መባእ ኣየቕርብ” ኢሎም ለኣኹ። እቲ ህዝቢ ድማ ምምፃእ ኣቋረፀ፥ ⁷እቲ ኣቐዲሞም ዝነበሮም ነቲ ዅሉ ስራሕ ንምግባር እኹል፥ ልዕሊ እኹል ነበረ እሞ።

ዓሰርተ ዓለባታት ሃርን ወርቅን

⁸እቶም ክኢላታት ድማ ነቲ ድንኳን ሰርሑ፤ ካብ ዝተፍሓሰ ሃርን፥ ካብ ሰማያዊ፥ ሓምራዊ፥ ውፁእ ቀይሕ ፈትልን ዝተገብረ፥ ምስሊ ኪሩቤል ዘለዎ፥ ብክኢላ ኣላም ዝተሰርሐ ዓሰርተ ዓለባታት ገበሩ። ⁹ምንዋሕ ነፍሲ ወከፍ ዓለባ ዕስራን ሸሞንተን እመት፥ ወርዱ ኸዓ ኣርባዕተ እመት ነበረ፤ ዓቐን ኵሉ ዓለባታት ሓደ ነበረ። ¹⁰ነተን ሓሙሽተ ዓለባታት ብሓደ ኣላግበን፤ ነተን ካልኦት ሓሙሽተ ዓለባታትውን ብሓደ ኣላግበን። ¹¹ኣብ ጫፍ እታ ኣብ ቀዳማይ ክፋል ዘላ ግዳማዊት ዓለባ ብሰማያዊ ፈትሊ ቐለበታት ገበረ፤ ኣብ ጫፍ እታ ኣብ ካልኣይ ክፋል ዘላ ግዳማዊት ዓለባ ኸዓ ኸምኡ ገበረ። ¹²ኣብታ ቐዳመይቲ ዓለባ ሓምሳ ቐለበት ገበረ፤ ኣብ ጫፍ እታ ኣብ ካልኣይ ክፋል ዘላ ዓለባ ኸዓ ሓምሳ ቐለበት ገበረ፤ እቲ ቐለበታት ንሓድሕዱ ዝገጣጠም ነበረ። ¹³ብወርቂ ጌሩ ሓምሳ መቘለፊ ሰርሐ፤ ነቲ ዓለባታት ድማ በቲ መቘለፊ ንስንሳቱ ኣጋጠሞ፤ እቲ ድንኳን ከዓ ሓደ ኾነ።

¹⁴ኣብ ልዕሊ እቲ ድንኳን ዝድረብ ድማ ብፀጕሪ ጤል ጌሩ ዓለባታት ሰርሐ፤ ዓሰርተ ሓደ ዓለባታት ገበረ። ¹⁵ዓቐን እቲ ዓሰርተ ሓደ ዓለባታት ሓደ ነበረ፤ ምንዋሕ ነፍሲ ወከፍ ዓለባ ሰላሳ እመት፥ ወርዱ ኸዓ ኣርባዕተ እመት ነበረ። ¹⁶ነተን ሓሙሽተ ዓለባታት ብሓደ ኣላግበን፤ ነተን ካልኦት ሽዱሽተ ዓለባታትውን ብሓደ ኣላግበን። ¹⁷ኣብ ጫፍ እታ ኣብ ቀዳማይ ክፋል ዘላ ግዳማዊት ዓለባ ሓምሳ ቐለበት ገበረ፤ ኣብ ጫፍ እታ ኣብ ካልኣይ ክፋል ዘላ ዓለባ ድማ ሓምሳ ቐለበት ገበረ። ¹⁸እቲ መደረብታ ሓደ ምእንቲ ክኸውን፥ ብነሃስ ጌሩ ሓምሳ መቘለፊ ሰርሐ። ¹⁹ነቲ መደረብታ ኸዓ ብዝተቐረፀ ቘራብቲ ማጓሉ ጌሩ መኽደን ገበረሉ፤ ኣብ ልዕሊኡ ድማ ብልስሉስ ቈርበት ጌሩ መኽደን ገበረሉ።

²⁰ድሕሪዙይ ነቲ ድንኳን ዝኸውን ደው ዝብል ሉሕ ካብ ዕንፀይቲ ሰራው ገይሩ ሰርሐ። ²¹ምንዋሕ ነፍሲ ወከፍ ሉሕ ዓሰርተ እመት፥ ምግፋሑ ኸዓ እመትን ፈረቓን ነበረ። ²²ነፍሲ ወከፍ ሉሕ ንስንሳቱ ዝገጣጠም ከክልተ ጉጭ ነበሮ፤ ንዅሉ ነቲ ናይ ድንኳን ሉሕ ከዓ ኸምኡ ጌሩ ሰርሖ። ^a a v22 ጉጭ ማለት ኣብ ታሕቲ ነፍሲ ወከፍ ሉሕ ዘሎ፥ ኣብቲ ናይ ብሩር መርገፂ ዘሎ ኣፍ ዝኣቱ፥ ነቲ ሉሕ ደው ኢሉ ዝሕዝ፥ ዝወፅእ ዕንፀይቲ ጉጭ እዩ። ²³ነቲ ድንኳን ዝኸውን ሉሕ ሰርሐ፤ ብወገን ደቡብ ዕስራ ሉሕ ገበረ። ²⁴ኣብ ትሕቲ እቲ ዕስራ ሉሕ ድማ ብብሩር ጌሩ ኣርብዓ መርገፂ ሰርሐ፤ ኣብ ትሕቲ ሓደ ሉሕ ንኽልተ ጉጩ ዝኸውን ክልተ መርገፂ፥ ኣብ ትሕቲ እቲ ቐፃሊ ሉሕ ድማ ንኽልተ ጉጩ ዝኸውን ክልተ መርገፂ ገበረ። ²⁵ነቲ ኻልኣይ ወገን ድንኳን፥ ማለት ብወገን ሰሜን ድማ ዕስራ ሉሕ ገበረ፥ ²⁶ብብሩር ዝተሰርሐ ኣርብዓ መርገፂኦምን፤ ኣብ ትሕቲ ሓደ ሉሕ ክልተ መርገፂ፥ ኣብ ትሕቲ እቲ ቐፃሊ ሉሕ ድማ ክልተ መርገፂ ገበረ። ²⁷ብድሕሪ እቲ ድንኳን፥ ማለት ብወገን ምዕራብ ሽዱሽተ ሉሕ ገበረ። ²⁸ንመኣዝናት እቲ ድንኳን ኣብ ዳሕረዋይ ወገኑ ዝኸውን ክልተ ሉሕ ገበረ። ²⁹ክልቲኡ ኻብ ታሕቲ ድርብ ነበረ፤ ክሳዕ ላዕሊ ኸዓ ክሳዕ እቲ ቐዳማይ ቀለበት ተጋጥመ፤ ንኽልቲኡ ኣብቲ ክልተ መኣዝን ከምኡ ገበሮ። ³⁰ስለዙይ ሸሞንተ ሉሕ ምስ ብሩር መርገፂኦም ነበረ፤ ዓሰርተ ሽዱሽተ መርገፂ ኾይኑ፥ ኣብ ትሕቲ ሓደ ሉሕ ክልተ መርገፂ ነበረ።

³¹ካብ ዕንፀይቲ ሰራው ድማ ወርወር ሰርሐ፤ ሓሙሽተ ወርወር ንሉሕ ሓደ ወገን ድንኳን ገበረ፥ ³²ሓሙሽተ ወርወር ነቲ ኻልኣይ ወገን ድንኳን ዘሎ ሉሕ፥ ሓሙሽተ ወርወር ድማ ብድሕሪ እቲ ድንኳን ብወገን ምዕራብ ንዘሎ ሉሕ ገበረ። ³³እቲ ኣብ ማእኸል ዘሎ ወርወር ከዓ ካብቲ ሓደ ወሰን ክሳዕ እቲ ኻልኣይ ወሰን ኣብ ማእኸል እቲ ሉሕ ክሕለፍ ገበሮ። ³⁴ነቲ ሉሕ ብወርቂ ለበጦ፤ ነቲ ወርወር ዝኣትዎ ቐለበታት ድማ ብወርቂ ሰርሐ፤ ነቲ ወርወርውን ብወርቂ ለበጦ።

³⁵ብሰማያዊ፥ ሓምራዊ፥ ውፁእ ቀይሕ ፈትልን ብዝተፍሓሰ ሃርን ጌሩ መጋረጃ ሰርሐ፤ ብብልሓት ድማ ምስሊ ኪሩቤል ገበረሉ። ³⁶ካብ ዕንፀይቲ ሰራው ድማ ኣርባዕተ ዓምዲ ገበረሉ፤ ብወርቂ ለበጦም፤ መሰቓቐሊኦም ከዓ ብወርቂ ነበረ፤ ኣርባዕተ መርገፂ ብሩር ድማ ኣፍሰሰሎም።

³⁷ነቲ ኣፍ ደገ ድንኳን ድማ ብሰማያዊ፥ ሓምራዊ፥ ውፁእ ቀይሕ ፈትልን ብዝተፍሓሰ ሃርን ዝተጠልፈ መጋረጃ ገበረ፥ ³⁸ምስ መሰቓቐሊኡ ድማ ሓሙሽተ ኣዕምዱ ገበረ፤ ንጕልላቶምን ዘንግታቶምን ብወርቂ ለበጦ፤ እቲ ሓሙሽተ መርገፂኦም ግና ነሃስ ነበረ።