Ningli Mingairereo kala Sākathei Pāng
Sākhavai phokhuira, kala mashun akhaha zatkhui kaya—khamāna phungā eina ngasoda miyarana tangkhavai kathuingana lāhaokha da zaikashi miyarana Mosesli hanga, haowui vang ana athumli ta lākhui da tui mi pikhui. Kaseili ngachāi, kasheng, thing kala ngachāi kaphangra mashunwui tungli ngasoda sāthang, khanganaishim akha akha eina ngaraikhui.
36 1Bezalel, Oholiab, kala kathara shim sākā khavai ithumwui Avāna sākathei kala theishingkakhui sangmi kahai them kathem mi kachiva̱na, ithumwui Avāna kaso kahai tākam eina otram saikora sāra.
2Chieina Mosesna Bezalel, Oholiab, kala ithumwui Avāna ningli sākathei sangmi kahai them kathem mi kachiva̱, rāda otram sākhavai ningli rāza̱da khangatha̱ mi kachiva̱ hokhui. 3Israelwui mibingna kathara shim sākā khavai khuirā kahai kachigat saikora chi athumna Moseswui eina khui. Chithālala mibingna ngathor kachida ali lemmet kachigat khuirāchinga. 4Chieina kathara shimwui otram saikora sā kahai them kathem mi kachiva̱ saikora, kachichāna sākahai otpam chiwui eina rāhaowa. 5Athumna Mosesli hānga, "Ithumwui Avāna ithumli sākhavai kaso kahai otram chiwui vang, mibingna shapki kaji reimeithui khuirāda lei."
6Chieina Mosesna kaso mida, athumna rāmrah peichaoda pao hānga: "Mayarnaola sha̱naola kathara shimwui vang kachigat katei masāluimara." Chieina mibingna khuirā ngasāmhaowa, 7kaja athumna arui shurrā kahai chi otram saikora sākhavai shapa, reimeithuiya.
Kazaira̱ kala Sināwui Chonrān Tharā
8Them kathem mi kachiva̱na manakta hākakhui kazaira̱, khamayinga, hungrisi kala hungshi kahai eina kasā chonrān tharā eina tabernacle chi sākhui; chi cherubim eina themlāk eina sākakhui otsakna. 9Chonrān kachiva̱wui kapāk khuining matira, kasāng khuining maga̱da chishat; chonrān katonga asān-aret ngaraichāserra. 10Ana chonrān phangā akha eina akha ngarumda, khangatei phangā chila akha eina akha ngaruma. 11Ana khare phangāwui lākhavāk chonrānwui shokkhamayar amareili khamayinga angathān sāsanga, chi tākam eina khangatei phangāwui lākhavāk chonrānwui shokkhamayar amareili sāsanga. 12Chonrān kharewui vang angathān hangphangā kā, kala kakhane phangāwui chonrān amareili angathān hangphangā kā, kala angathān chi akha eina akha ngarei ngasungda sāsanga. 13Kala ana sinā akhui hangphangā sākhuilaga, chi eina chonrānbing chi hokrumkhuida tabernacle chi akha ngasāhaowa.
14Ana tabernacleli fakhavai kachonshimwui vang mesam eina chonrān tharāda akha sākhui. 15Chonrān ava̱va̱wui asān khuining thumrā, aret khuining matira; chonrān tharāda akha chi asān-aret ngaraichāserra. 16Ana chonrān phangā chi akhali ngarumda, kala khangatei tharuk chila akhali ngaruma. 17Ana khare phangāwui lākhavāk chonrānwui shokkhamayar amareili angathān hangphangā sāsanga, kala kakhane phangāwui chonrānwui shokkhamayar amareili angathān hangphangā sāsanga. 18Ana pithraiwui akhui hangphangā sākhuilaga, kachonshim chi akha sāngasaka. 19Ana kachonshimwui vang fakham khavai faror khavai mathen kahai yaohui eina sākhui, kala chiwui atungshong mehui eina fakham khavai akha sākhui.
20Chiwui thili ana tabernaclewui arāp acaciathing eina akom marānshak-shak sāsang. 21Akom ava̱va̱wui asān khuining tharārā, kala aret khuining akha tangkhaina. 22Akom ava̱va̱li ngasunkhui khavai amachat khanini kai; chithāda ana tabernaclewui akom saikorali sākhui. a a v22 Amachat chi akom ava̱va̱wui azingli khalei thing peg akha china, lupāsāwui khaning khavaili khalei kā akhali ngasunkhuida, akom chi marānshak-shak singtitmina. 23Ana tabernaclewui azingshongwui vang akom maga̱ sākhui. 24Ana akom maga̱wui azingli lupāsāwui khaning khavai hangmati sākhui; akom ava̱va̱wui amachat khaniwui vang ana khaning khavai khanini sāsanga. 25Kala tabernaclewui kakhaneshong, atungshong, ana akom maga̱ sākhui, 26kala lupāsāwui khaning khavai hangmati sākhui; akom ava̱va̱wui azingli khaning khavai khanini leihaowa. 27Kala tabernacle khanukwui zingtunshong, ana akom tharuk sākhui. 28Ana tabernaclewui khanukshongwui achithekli sangkhavai akom khani sākhui. 29Akom khani chi azingli ngatei, kha atungwui akhur khawut chili ana ngasunkhui ngasaka; ana lākharipwui achithek khanili chithāda sākhui. 30Chieina lupāsāwui khaning khavai tharāda tharuk eina akom chishat leihaowa; akom ava̱va̱wui azingli khaning khavai khanini leihaowa.
31Ana acaciathing eina tabernaclewui lākhashongwui akomwui vang phākashut phangā, 32kala tabernaclewui kakhaneshong akomwui vang phangā, kala tabernaclewui zingtunshong arāpwui akomwui vang phangā sākhui. 33Ana alungthungli kazanga phākashut chi akom saikorawui alungthungli ungshung-vāshungda thara̱vai ngasaka. 34Ana sinā eina akom katonga rommithai, kala phākashut chi thara̱sang khavai sinākhui sākhui; phākashutla sinā eina heirorseri.
35Ana khamayinga, hungrisi, hungshi kahai kala manakta hākakhui kazaira̱ eina themlāk eina sākakhui chonsāwui mairār sākhuida cherubim yeksanga. 36Ana chiwui vang acaciathing eina pākra̱ mati sākhuida sinā rommithai, chiwui hokkhui khavaibing chila sinā eina sāda, kala chiwui vang lupāsāwui aphei mati heikhui.
37Ana kachonshim chiwui khāmongli chonrān akha sākhui, chi khamayinga, hungrisi kala hungshi kahai kala manakta hākakhui kazaira̱ eina kasā, kala kapim eina phorkasanga sāsanga, 38kala chiwui pākra̱ phangā kala chiwui hokkhui khavaibing chila sākhui; ana chiwui athingbing kala masa̱khui khavai chi sinā eina rommithai, kha chiwui aphei phangā chi pithrai eina sai.
