Bezalelna Ningkhami Oko Sakai
Bezalelna manā chithei haowui kala sāthang: hārna kahupshira sanduk kala aphungli ngasoda kayāngkhavai cherubimna khayangshi kharumkhavai zatli, sāsheng, hārna kahinsho meiselra ading, almond wuipa danei apanthui, mashun kasangkhavai langkhal, kala thao kaphāpkhavai kala mashun. Kachuk 25-wui tui hi mi khutna kakhuimeikhavai khangarung saikora sahaira.
37 1Bezalelna acaciathing eina ningkhami oko sākhui: asān khuining khani tangkhai, aretna khuining akha tangkhai, kala kajui khuining akha tangkhai. 2Ana chi alung ayār sinā kachanga eina heirora, kala akhamong kuimareida sinā eina heiunga. 3Ana sinā khui mati heikhuilaga, lākhavāk khani kala akhavāk khani da chiwui aphei matili pānshāna. 4Ana thingphān chi acaciathing eina sālaga sinā eina rommithai, 5kala ningkhami oko chi ngava̱ khavai, ana okowui arāp khaninili khalei akhui chili thingphān thara̱sanga.
6Ana sinā kachanga eina lukhamashan pamkhong sākhui: asān khuining khani tangkhai, kala aretna khuining akha tangkhai. a a v6 Lukhamashan pamkhong chi ithumwui Avāna awui mibing eina ngaso kahai kala lukhamashan mikhavai apam kasāna; Kadhara Kahaina Jishu chichāli, awui asheena atamda ithumli fakhamlak kaji lukhamashanwui apam hina da phokmi. 7Lukhamashan pamkhongwui arāp khaninili, ana sinā eina shaokhuilaga cherubim khani sākhui. 8Cherub akha lākhavāk kala cherub akha akhavāk hai; ana cherubim chi lukhamashan pamkhongli asā akha sāda, chiwui arāp khaninili sāngasaka. 9Cherubim chi angachāng atungshong hārkālaga, athumwui angachāng eina lukhamashan pamkhongli fakhama; athumwui mai ngareingasungda lukhamashan pamkhongshong ngareivāhaowa.
Table
10Ana acaciathing eina table sākhui: asān khuining khani, aretna khuiningkha, kala kajui khuining akha tangkhai. 11Ana chi sinā kachanga eina heirora, kala kuimareida sinā eina akhamong sāsanga. 12Ana kuimareida akom pāngmayā rikha sāsanga, kala akom chi sinā eina heiunga. 13Ana chiwui vang sinākhui mati heikhui, achikun mati kala aphei mati chili akharip pānshāna. 14Table chi ngava̱ khavai thingphān ruisangda, akhui chi akomli nganaida pānshāna. 15Ana table chi ngava̱ khavai acaciathing eina thingphān sākhuida sinā eina rommithai. 16Ana table chiwui khorkhongbing: khongphei, khongpāng, koklui, kala ra̱shakchigat khavai khorāmbing chi saikora sinā kachanga eina sākhui.
Thaomeishong
17Ana thaomeishong chi shaokhui sinā kachanga eina sākhui; chiwui rungkhavai, athing, akhongnao, athingnao kala awonbing chi asā akha sāngasaka. 18Akhashong aphāng kathum kala lakhashong aphāng kathum da, chiwui arāp eina aphāng tharuk shoka. 19Aphāng akhali athing eina awon ngasoda almond thāda akhongnao kathum sāsanga, kala aphāng akhapāli kathum sāsanga; thaomeishongwui eina kashok aphāng tharuk saikorali chithāda sāsanga. 20Thaomeishong atungli almond thāda akhongnao mati, athingbing eina awonbing ngasoda sāsanga. 21Aphāng tharuk saikorawui vang, chiwui eina aphāng khare khaniniwui azingli athing akha, kakhane khaniniwui azingli athing akha, kala kakathuma khaniniwui azingli athing akha shoka. 22Athingbing eina aphangbing chi asā akha sāsanga, kala katonga chi sinā kachanga eina shaokakhuiya asā akha sāsanga. 23Ana thaomei shini, chiwui meikhanit eina sangkhavai akhongla ngasoda, sinā kachanga eina sākhui. 24Ana thaomeishong kala chiwui khorkhongbing saikora sinā kachanga talent akha eina sākhui.
Nganamkaphā Thaowui Hanphut
25Ana nganamkaphā hanphut chi acaciathing eina asān-aret ngaraichāda asān khuiningkha, aret khuiningkha, kala kajui khuining khani da sākhui; kala chiwui angajibing asā akha sāngasaka. 26Ana chiwui atung, arāpbing kuimareida, kala angajibingla sinā kachanga eina heirorda, kuimareida sinā eina akhamong sāsanga. 27Hanphut chi ngava̱ khavai thingphān thara̱sang khavai, ana akhamong chiwui azingli arāp khaninili sināwui akhui khani sākhui. 28Ana acaciathing eina thingphān sākhuilaga sinā eina rommithai. 29Kala ana thao kashunga mina kasā thāda, kathara neokhavai thao kala mathingrik nganamkaphā thaola sākhui.
