Shongzā 38

38 ¹Ana acaciathing eina rikkatā kachigatwui hanphut akha sākhui, asān-aret ngaraichāda khuining phangāngā, kala khuining kathum jui. ²Kala ana achithek mati chili angaji sākhui, chiwui angaji akha sāda sāshana, kala pithrai heirora. ³Kala ana hanphutwui khorkhong saikora sākhui: ham, belcha, khongsai, marik-kapei kala meikhong; chiwui khorkhong saikora pithrai eina sāsera. ⁴Kala ana hanphutwui vang pithrai eina ngayāng khavai akha sākhuilaga, chi akongnā azingli sangda hanphutwui ngahunshingli tāshung ngasaka. ⁵Kala thingphān sangkhavai, ana pithrai ngayāng khavaiwui achikun matitili akhui mati heikhui. ⁶Kala ana acaciathing eina thingphān sākhuilaga pithrai heirora. ⁷Kala hanphut chi ngava̱ khavai, ana hanphutwui lākharip khalei akhui chili thingphān chi thara̱sanga; kala ana hanphut chi chikhai eina akhur utlaga sākhui.

Pithraisā Khongsai

⁸Kala ana pithrai khongsai kala chiwui pithrai rungkhavai aphei chi, kazip khavai kachonshimwui khāmongpheili otram khangatha̱ sha̱naobingwui kalāra̱ngayot eina sākhui.

⁹Kala ana yāngkhup sākhui. Azingshongwui vang hokthāng khavai chonrān chi manakta hākakhui kazaira̱ chonsā eina sāda, khuining shākha sānga.

¹⁰Chiwui pākra̱ maga̱ kala aphei maga̱ pithrai eina sai; pākra̱wui hokkhui khavai kala masa̱khui khavai lupāsā eina sai. ¹¹Atungshongwui asānli hokthāng khavai chonrān khuining shākha sāda, pithrai eina kasā pākra̱ maga̱ kala aphei maga̱ sāsanga; pākra̱wui hokkhui khavai kala masa̱khui khavai lupāsā eina sai. ¹²Zingtunshongli ana chonrān khuining hangphangā hokthānga, kala pākra̱ tharā eina aphei tharā sāsanga; pākra̱wui hokkhui khavai kala masa̱khui khavai lupāsā eina sai. ¹³Mangāshong zingshoshongli, yāngkhupwui aret khuining hangphangāna. ¹⁴Ngavei chiwui arāp akhawui hokthāng khavai khuining tharāda phangā, pākra̱ kathum kala aphei kathum sāsanga. ¹⁵Arāp akhapāla tākam eina sāsanga; yāngkhup ngaveiwui arāp ava̱va̱li khuining tharāda phangā hokthāng khavai, pākra̱ kathum kala aphei kathum sāsanga. ¹⁶Yāngkhup kuimareidawui hokthāng khavai saikora manakta hākakhui kazaira̱ chonsā eina sāsera. ¹⁷Yāngkhup pākra̱bingwui apheibing pithrai eina sai; chiwui hokkhui khavai kala masa̱khui khavai lupāsā eina sai; chiwui atung rommi khavai lupāsā eina sai; yāngkhup pākra̱ saikora lupāsā eina masa̱khuiserra. ¹⁸Yāngkhupwui ngaveiwui chonrān chi khamayinga, hungrisi kala hungshi kahai kala manakta hākakhui kazaira̱ eina kasā kala kapim eina yekkasang chonsā eina sākhui; chi yāngkhupwui rānkhavai tākam eina asān khuining maga̱, kala kajui khuining phangāna. ¹⁹Chiwui pākra̱ mati kala aphei mati pithrai eina sai; chiwui hokkhui khavaibing lupāsā eina sai; chiwui atung romkahai kala masa̱khui khavaibing lupāsā eina sai. ²⁰Tabernacle kala yāngkhup kuimareidawui thingpar saikora pithraisā eina sai.

Bezalel eina Oholiab

²¹Moseswui kakaso athishurda pāngmon Aaronwui naomayara Ithamarwui azingli Levinaobingna kapiserhai tabernaclewui, ningkhamiwui tabernaclewui hishapbing chi hina. ²²Judah shangwui Uriwui naomayara, Hurwui ara̱ Bezalelna ithumwui Avāna Mosesli kakaso saikora chi sākhui; ²³kala ruksang katheiya, mathālak, kala khamayinga, hungrisi, hungshi kahai kala manakta hākakhui kazaira̱ eina kapim eina aphor phorkasang katheiya, Dan shangwui Ahisamachwui naomayara Oholiab ali ngasoi.

²⁴Kathara shimwui ot saikorali zangkahai sinā, khayitchigatwui sinā chi, kathara shimwui shekel aman athishurda kharit pound 2,193 shoka. ²⁵Yarui ashangva̱li mashing shānhai mibingwui lupāsā kathara shimwui shekel aman athishurda kharit pound 7,545 shoka: ²⁶Zingkum maga̱ eina thuilaga mashing shānhai mi ava̱va̱na lupāsā shekel makhai mihaowa; athum mi shātharuk kala thing kathum shāphangā kala hangphangāna. ²⁷Lupāsā pound 7,500 eina kathara shimwui aphei kala mairārwui aphei heikhui; chi lupāsāwui eina aphei shākha sākhui, kala aphei ava̱va̱wui kharit pound 75 shoka. ²⁸Lupāsā pound 45 eina ana pākra̱bingwui vang hokkhui khavai sākhui, chiwui atung lupāsā eina rommithai, kala chibingli masa̱khui. ²⁹Khayitchigatwui pithrai kharit pound 5,310 shoka. ³⁰Chi eina ana kazip khavai kachonshimwui khāmongwui aphei, pithraiwui hanphut kala chiwui pithrai ngayāng khavai, kala hanphutwui khorkhongbing saikora sākhui. ³¹Yāngkhup kuimareidawui aphei, yāngkhup ngaveiwui aphei, tabernaclewui thingpar saikora, kala yāngkhup kuimareidawui thingpar saikorala sākhui.