Shongzā 39

39 ¹Khamayinga, hungrisi kala hungshi kahai eina athumna katharapamli otram khangatha̱li sangkhavai manaklak eina sākakhui sāri sākhui; kala ithumwui Avāna Mosesli kakaso athishurda, athumna Aaronwui vang kathara sāri sākhui.

²Ana sinā, khamayinga, hungrisi, hungshi kahai kala manakta hākakhui kazaira̱ eina kasā chonsā eina ephod sākhui.

³Athumna sinā chi shaokakhui kazaira̱ thāda tātkhui, kala chi khamayinga, hungrisi, hungshi kahai kala manakta hākakhui kazaira̱ eina kasā chonsāli themlāk eina rakkharumhui; chi them kathemapawui otsakna. ⁴Athumna chiwui vang yārtuipar sākhui, chiwui amarei akatanga khanili ngasunkhui. ⁵Ithumwui Avāna Mosesli kakaso athishurda, ephodwui themlāk eina rakkakhui apeng chi ephod kasā tākam eina, sinā, khamayinga, hungrisi, kala hungshi kahai kala manakta hākakhui kazaira̱ eina kasā chonsā eina asā akha sāngasaka.

⁶Athumna onyx ngalungbing chi sināwui akhara̱ eina khayekhuida, khutopli rukkasang thāda chili Israelwui naomayarabingwui aming ruksanga. ⁷Ithumwui Avāna Mosesli kakaso athishurda, ana Israelwui naomayarabingwui vang phaningung khavai ngalung sāda chi ephodwui yārtuiparli sāsangmi.

Thikhom

⁸Ana thikhom akha themlāk eina ephod kasā thāda sākhui; sinā, khamayinga, hungrisi, hungshi kahai kala manakta hākakhui kazaira̱ eina kasā chonsā eina sākhui. ⁹Athumna thikhom chi asān-aret ngaraichāda khani shida ngaphoda sākhui; chiwui asān-aret pangmayākha ngaraichai. ¹⁰Athumna chili ngalung ngaher mati sāsangmi. Khare apengli cornelian, topaz, kala emerald; ¹¹kakhane apengli carbuncle, sapphire, kala emerald; ¹²kakathuma apengli jacinth, agate, kala amethyst; ¹³khamate apengli beryl, onyx kala jasper; chi saikora sinā akhara̱ eina rukkasang chili khayeka. ¹⁴Shang tharāda khaniwui vang, ngalung tharāda khani chili Israelwui naomayarabing ava̱va̱wui aming mahor namkhavai thāda ruksangsera. ¹⁵Athumna thikhomwui vang sinā kachanga seipeng thāda hākakhui apeng sākhui. ¹⁶Athumna sināwui akhara̱ eina rukkasang khani kala sināwui akhui khani sākhui, kala akhui khani chi thikhomwui amarei khanili sāshāna. ¹⁷Sināwui apeng khani chi athumna thikhomwui amarei khanili khalei akhui khanili ruisanghai. ¹⁸Athumna apeng khani chiwui amarei khani chi sināwui ruksang khani chili pānkhui, kala ephodwui mangāshong yārtuiparli hokshānkhui. ¹⁹Athumna sināwui akhui khani sākhuida thikhomwui akatanga amarei khaniwui alungshong ephod ngalemli haihai. ²⁰Athumna sināwui akhui khani sākhuida ephodwui yārtuipar khaniwui azingpamwui mangāshong phonda, themlāk eina raksang kahai apeng chiwui atungshong ngasun ngasaka. ²¹Ithumwui Avāna Mosesli kakaso athishurda, thikhom chi ephodwui themlāk eina raksang kahai apeng atungli ngashikta ephod eina mangachoshok khavai, athumna khamaying khara̱ eina thikhomwui akhui chi ephodwui akhuili khalapshānmi.

Katuma Phahon kala Chiwui Amarei

²²Bezalelna ephodwui katuma phahon saikora khamayinga eina rakkhui. ²³Chiwui akhur chi coatwui akhur thāda alungthungli sāsanga, kala akhur chi makāk khavai kuimareida rakkakhuiya chonsā eina katim-unghai. ²⁴Athumna katuma phahon kuimareida khamaying, hungrisi, hungshi kahai kala manakta hākakhui kazaira̱ eina kabothei sāsanga. ²⁵Athumna sinā kachanga eina kantā sākhuida, katuma phahon kuimareida, kabothei amataktakli sāsanga. ²⁶Ithumwui Avāna Mosesli kakaso athishurda, otram ngatha̱khavai katuma phahon amarei kuimareida kantā eina kabothei, kantā eina kabothei da sāsanga.

²⁷Aaron kala anaomayarabingwui vang athumna khamanaka chonsā eina coat rakkhui, ²⁸khamanaka kuitei, khamanaka kuihon khamathā, kala manakta hākakhui kazaira̱ eina kongkarao, ²⁹ithumwui Avāna Mosesli kakaso athishurda, shānneira̱ chi manakta hākakhui kazaira̱, khamaying, hungrisi, hungshi kahai chonsā eina, kapim eina aphor phorsanga.

³⁰Athumna sinā kachanga eina kathara kuihonwui khongphei akha sākhuida, khutopli rukkasang thāda, "Ithumwui Avāli Tharmathengranu" da ruksanga. ³¹Ithumwui Avāna Mosesli kakaso athishurda, athumna chi khamayinga khara̱ eina kuiteiwui atungshong pānshāna.

Ot Saikora Kupha, Saikora Khamashunga

³²Kazip khavai kachonshimwui tabernaclewui ot saikora kuphaowa. Israelwui mibingna ithumwui Avāna Mosesli kakaso saikora chi tākam eina sai; chithāda athumna sai. ³³Athumna tabernacle chi Mosesli khuirai: kachonshim, chiwui thongthāng saikora, hokkhui khavai, akom, phākashut, pākra̱, kala aphei; ³⁴yaohui mathen kahaiwui fakham khavai, mehuiwui fakham khavai, kala chonrānwui mairār, ³⁵ningkhami oko chi thingphānli ngasoda kala lukhamashan pamkhong; ³⁶table kala chiwui khorkhongbing saikora, kala Ngasokhamiwui khamui, ³⁷sinā khamathing thaomeishong, chiwui thaomeibing ngarān kahai, chiwui khorkhongbing saikora, kala thaomeiwui vang thaora̱; ³⁸sināwui hanphut, neokhavai thao, nganamkaphā thao, kala kachonshimwui khāmong chonrān, ³⁹pithraina sākahai hanphut, chiwui pithrai yākrei, thingphānbing, kala chiwui khorkhong katham saikora; khongsai kala chi rungkhavai aphei; ⁴⁰yāngkhupwui rānkhavai, pākra̱bing kala apheibing, yāngkhupwui ngaveiwui chonrān, khara̱bing, thingshun, kala tabernacle kazip khavai kachonshimwui otram ngatha̱mi shikachin khorkhongbing saikora; ⁴¹kala katharapamli otram sangkhavai manaklak eina sākakhui sāri, pāngmon Aaronwui kathara sāri, kala awui anaomayarabingna pāngmon otram ngatha̱ khavai sāri. ⁴²Ithumwui Avāna Mosesli kaso kahai athishurda Israelwui mibingna ot saikora chi sāsera. ⁴³Mosesna ot saikora chi yanga; kala yanglu, ithumwui Avāna kaso kahai athishurda athumna sai; chithāda athumna sākahaina. Chieina Mosesna athumli somi.