ዘፀአት 38

38 ¹እርሱም የሚቃጠለውን መሥዋዕት መሠዊያ ከግራር እንጨት ሠራ፤ ርዝመቱ ሰባት ጫማ ተኩል ያህል፣ ስፋቱም እንደዚሁ ሆኖ አራት ማእዘን ነበረ፤ ከፍታውም አራት ጫማ ተኩል ነበረ። ²በአራቱ ማእዘኖቹ ላይ ከእርሱ ጋር አንድ አካል የሆኑ ቀንዶች ሠራ፤ በናስም ለበጠው። ³የመሠዊያውንም ዕቃዎች ሁሉ ሠራ፤ ማለትም ማሰሮዎችን፣ መጫሪያዎችን፣ ሰኖዎችን፣ ሹካዎችንና የእሳት መቀበያዎችን፤ ዕቃዎቹ ሁሉ ከናስ ነበሩ። ⁴ለመሠዊያውም ከጠርዙ በታች እስከ እኩሌታው የሚደርስ የናስ መረብ ሠራለት። ⁵መሎጊያዎቹን ለመያዝ በናሱ መረብ በአራቱ ማእዘኖች ላይ አራት ቀለበቶች አፈሰሰ። ⁶መሎጊያዎቹንም ከግራር እንጨት ሠራ፤ በናስም ለበጣቸው። ⁷መሠዊያውን በእነርሱ ለመሸከም መሎጊያዎቹን በመሠዊያው ጎኖች ባሉት ቀለበቶች ውስጥ አስገባ፤ በሳንቃዎችም ውስጡን ባዶ አድርጎ ሠራው።

የናስ ሰን

⁸የናሱንም ሰንና የናስ መቀመጫውን በመገናኛው ድንኳን መግቢያ ያገለግሉ ከነበሩት ሴቶች መስተዋቶች ሠራ።

⁹አደባባዩንም ሠራ፤ በደቡብ በኩል የነበሩት መጋረጃዎቹ ከተፈተለ ጥሩ በፍታ የተሠሩ ሆነው ርዝመታቸው መቶ ኀምሳ ጫማ ያህል ነበር።

¹⁰ሃያ ዐምዶቻቸውና ሃያ መቀመጫዎቻቸው ከናስ ነበሩ፤ የዐምዶቹ መንጠቆዎችና መያዣዎች ከብር ነበሩ። ¹¹በሰሜን በኩልም መቶ ኀምሳ ጫማ መጋረጃዎች፣ ሃያ የናስ ዐምዶችና ሃያ የናስ መቀመጫዎች ነበሩ፤ የዐምዶቹ መንጠቆዎችና መያዣዎች ከብር ነበሩ። ¹²በምዕራብ በኩልም ሰባ አምስት ጫማ ያህል መጋረጃዎች፣ ዐሥር ዐምዶችና ዐሥር መቀመጫዎች ነበሩ፤ የዐምዶቹ መንጠቆዎችና መያዣዎች ከብር ነበሩ። ¹³በምሥራቅ በኩል፣ ፀሓይ ወደምትወጣበት፣ የአደባባዩ ስፋት ሰባ አምስት ጫማ ያህል ነበር። ¹⁴ለበሩ አንደኛ ጎን ርዝመታቸው ሃያ ሁለት ጫማ ተኩል የሆነ መጋረጃዎች፣ ሦስት ዐምዶችና ሦስት መቀመጫዎች ነበሩ። ¹⁵በሌላኛውም ጎን እንደዚሁ ነበር፤ በአደባባዩ በር በሁለቱም ጎኖች ርዝመታቸው ሃያ ሁለት ጫማ ተኩል ያህል የሆነ መጋረጃዎች፣ በየጎኑም ሦስት ዐምዶችና ሦስት መቀመጫዎች ነበሩ። ¹⁶በአደባባዩ ዙሪያ የነበሩት መጋረጃዎች ሁሉ ከተፈተለ ጥሩ በፍታ የተሠሩ ነበሩ። ¹⁷የአደባባዩ ዐምዶች መቀመጫዎች ከናስ ነበሩ፤ መንጠቆዎቻቸውና መያዣዎቻቸው ከብር ነበሩ፤ የራሶቻቸው ልባጭ ከብር ነበር፤ የአደባባዩ ዐምዶች ሁሉ በብር ተሸብበው ነበር። ¹⁸የአደባባዩ በር መጋረጃ ከሰማያዊ፣ ከሐምራዊና ከቀይ ክር እንዲሁም ከተፈተለ ጥሩ በፍታ በጥልፍ የተሠራ ነበር፤ ርዝመቱ ሠላሳ ጫማ ያህል፣ ከፍታውም እንደ አደባባዩ መጋረጃዎች ሰባት ጫማ ተኩል ነበር። ¹⁹አራት ዐምዶቻቸውና አራት መቀመጫዎቻቸው ከናስ ነበሩ፤ መንጠቆዎቻቸው ከብር ነበሩ፤ የራሶቻቸው ልባጭና መያዣዎቻቸው ከብር ነበሩ። ²⁰ለማደሪያውና በአደባባዩ ዙሪያ የነበሩት ችካሎች ሁሉ ከናስ ነበሩ።

በሳልኤልና ኦሆሊያብ

²¹የማደሪያው፣ ማለትም የምስክሩ ማደሪያ ሒሳብ ይህ ነው፤ በሙሴ ትእዛዝ መሠረት የተመዘገበ ሲሆን፣ የካህኑ የአሮን ልጅ በሆነው በኢታምር ሥር የሌዋውያን ሥራ ነበር። ²²ከይሁዳ ነገድ የሆነው የሆር ልጅ የኡሪ ልጅ በሳልኤል አባታችን ሙሴን ያዘዘውን ሁሉ ሠራ፤ ²³ከእርሱም ጋር ከዳን ነገድ የሆነው የአሒሳማክ ልጅ ኦሆሊያብ ነበረ፤ እርሱም ቀራፂ፣ ንድፍ አውጪና በሰማያዊ፣ በሐምራዊ፣ በቀይ ክር እንዲሁም በጥሩ በፍታ ጠላፊ ነበር።

²⁴ለሥራው የዋለው ወርቅ ሁሉ፣ ማለትም በመቅደሱ ሥራ ሁሉ የዋለው የሚወዘወዝ መሥዋዕት ወርቅ፣ በመቅደሱ ሚዛን መሠረት ሁለት ሺህ አንድ መቶ ዘጠና ሦስት ፓውንድ ያህል ነበር። ²⁵በማኅበሩ ውስጥ ከተቈጠሩት የተሰበሰበው ብር በመቅደሱ ሚዛን መሠረት ሰባት ሺህ አምስት መቶ አርባ አምስት ፓውንድ ያህል ነበር፤ ²⁶ዕድሜው ሃያ ዓመትና ከዚያ በላይ ሆኖ ለተቈጠረ ለእያንዳንዱ ራስ አንድ አምስተኛ ኦውንስ ያህል ብር ነበር፤ የተቈጠሩትም ስድስት መቶ ሦስት ሺህ አምስት መቶ ኀምሳ ሰዎች ነበሩ። ²⁷ሰባት ሺህ አምስት መቶ ፓውንድ ያህል ብር የመቅደሱን መቀመጫዎችና የመጋረጃውን መቀመጫዎች ለማፍሰስ ዋለ፤ ከዚያ ብር መቶ መቀመጫዎች ተሠሩ፤ እያንዳንዱም ሰባ አምስት ፓውንድ ያህል ነበር። ²⁸ከአርባ አምስቱ ፓውንድ ብርም ለዐምዶቹ መንጠቆዎች ሠራ፤ ራሶቻቸውንም ለበጠ፤ መያዣዎችንም አበጀላቸው። ²⁹የሚወዘወዘው መሥዋዕት ናስ አምስት ሺህ ሦስት መቶ ዐሥር ፓውንድ ያህል ነበር። ³⁰በእርሱም የመገናኛውን ድንኳን መግቢያ መቀመጫዎች፣ የናሱን መሠዊያ ከናሱ መረቡ ጋር፣ የመሠዊያውንም ዕቃዎች ሁሉ ሠራ። ³¹በአደባባዩ ዙሪያ ያሉትን መቀመጫዎች፣ የአደባባዩን በር መቀመጫዎች፣ የማደሪያውን ችካሎች ሁሉ፣ በአደባባዩ ዙሪያ ያሉትንም ችካሎች ሁሉ ሠራ።