Besalele Yidikaka Sanduku
Besalele ke tunga mambu yina ba tubaka ntete: sanduku yina ba fukaka na wolo ti bakeluba ya yawu ke talana na zulu ya kitapu ya mulemvo, mesa, kitentokolo ya minda yina ba tutaka ti bakopo ya mutindu ya bafulele, kiyokolo ya maaka ya nsunga, mpe mafuta ya mbyekolo mpe maaka ya nsunga. Bantumunu ya kapu ya makumi zole na tanu ke kuma bima yina nge lenda simba.
37 1Besalele yidikaka sanduku na bayinti ya akasya. Yinda ya sanduku vwandaka basentimetele nkama na kumi (110), nene ya yawu basentimetele makumi sambanu na nsambwadi (67), mpe mutela ya yawu basentimetele makumi sambanu na nsambwadi (67). 2Yandi tulaka yawu wolo ya mbote na kati ya sanduku mpe na ngaanda, mpe yandi yidikaka ndilu ya wolo yina ke zungidila yawu. 3Yandi tulaka yawu milunga yiya ya wolo na makulu ya yawu yiya, milunga zole na lweka mosi mpe milunga zole na lweka ya nkaka. 4Yandi yidikaka bayinti na mabaya ya akasya mpe yandi tulaka yawu wolo, 5mpe yandi tulaka bayinti na kati ya milunga yina vwandaka na balweka nyonso zole ya sanduku, samu na kunanguna yawu.
6Yandi yidikaka kitapu ya kupesilaka minkayulu ya menga na wolo ya mbote. Yinda ya yawu vwandaka ya basentimetele nkama na kumi (110) mpe nene ya yawu basentimetele makumi sambanu na nsambwadi (67). a a v6 Kitapu ya kupesilaka minkayulu ya menga vwandaka kisika yina Tata ya beto vwandaka kudyana na bantu ya yandi mpe kisika yina ba pesaka kyadi; Kuwakana ya Mpa ke bokila Yesu yandi mosi ti kisika yayi ya kyadi, kisika yina menga ya yandi ke fuka beto ntangu yayi. 7Yandi yidikaka bakeluba zole na wolo yina ba tutaka na bansongi nyonso zole ya kitapu ya kupesilaka minkayulu ya menga, 8keluba mosi na nsongi mosi, keluba ya nkaka na nsongi ya nkaka; yandi yidikaka bakeluba yina kuvwanda kaka kima mosi na kitapu ya kupesilaka minkayulu ya menga na bansongi ya yawu nyonso zole. 9Bakeluba talisaka mapapu ya bawu na zulu, mpe mapapu yango fukaka kitapu, kisika ya kupesilaka minkayulu ya menga. Bawu vwandaka ya kutalasana, mpe bizizi ya bawu talanaka na kitapu.
Mesa
10Yandi yidikaka mesa na bayinti ya akasya. Yinda ya mesa vwandaka basentimetele makumi kwenda (90), nene ya yawu basentimetele makumi yiya na tanu (45), mpe mutela ya yawu basentimetele makumi sambanu na nsambwadi (67). 11Yandi tulaka yawu wolo ya mbote mpe yandi yidikaka ndilu ya wolo yina ke zungidila yawu. 12Yandi yidikaka ndilu yina ke zungidila yawu ya basentimetele nana na nene, mpe yandi tulaka ndilu ya wolo na ndilu yina. 13Yandi tulaka yawu milunga yiya ya wolo, mpe yandi kangaka yawu na bansongi nyonso yiya ya makulu ya mesa. 14Milunga yina vwandaka pene-pene ya ndilu, samu na kuyamba bayinti ya kunanguninaka mesa. 15Yandi salaka bayinti na mabaya ya akasya mpe yandi tulaka yawu wolo, samu na kunanguninaka mesa. 16Yandi yidikaka bisalulu ya mesa na wolo ya mbote: bandonga, bambungu, bandonga ya fyoti mpe bakopo samu na minkayulu ya vinu.
Kitentokolo ya Minda
17Yandi yidikaka kitentokolo ya minda na wolo ya mbote yina ba tutaka. Dikulu, dikolo, mwa bambungu, makolo na bifulu ya yawu, nyonso vwandaka kaka kima mosi na yawu. 18Bintala sambanu basisaka na balweka ya yawu, bintala tatu na lweka mosi mpe bintala tatu na lweka ya nkaka. 19Kintala mosi vwandaka na mwa bambungu tatu mutindu bifulu ya amande, konso mosi na dikolo mpe na kifulu, mpe kintala ya nkaka na bambungu tatu dyaka. Ni mutindu yina vwandaka na bintala nyonso sambanu yina basisaka na kitentokolo ya minda. 20Na zulu ya kitentokolo ya minda yawu mosi vwandaka na mwa bandonga yiya mutindu bifulu ya amande, na makolo ya yawu mpe bifulu ya yawu. 21Dikolo mosi vwandaka na yisi ya bintala zole ya ntete yina basisaka na yawu, dikolo mosi na yisi ya bintala zole ya zole, dikolo mosi na yisi ya bintala zole ya tatu, samu na bintala nyonso sambanu. 22Makolo mpe bintala ya yawu vwandaka kima mosi kaka na kitentokolo; nyonso vwandaka kima mosi ya wolo ya mbote yina ba tutaka. 23Yandi yidikaka minda ya yawu nsambwadi, bambele ya yawu na bima ya bombi ya yawu, na wolo ya mbote. 24Yandi yidikaka kitentokolo ya minda na bisalulu ya yawu nyonso na wolo ya mbote ya kilo makumi tatu na yiya.
Kiyokolo ya Maaka ya Nsunga ya Mbote
25Yandi yidikaka kiyokolo ya maaka ya nsunga ya mbote na bayinti ya akasya. Yinda ya yawu mpe nene vwandaka basentimetele makumi yiya na tanu (45) na balweka nyonso, mpe mutela ya yawu basentimetele makumi kwenda (90). Mampoka ya yawu vwandaka kaka kima mosi na yawu. 26Yandi fukaka yawu nyonso na wolo ya mbote: zulu ya yawu, balweka ya yawu nyonso na mampoka ya yawu. Mpe yandi yidikaka ndilu ya wolo yina ke zungidila yawu. 27Yandi yidikaka yawu milunga zole ya wolo; yandi tulaka yawu na yisi ya ndilu, na balweka ya yawu nyonso zole, samu na kuyamba bayinti ya kunanguninaka yawu. 28Yandi yidikaka bayinti na mabaya ya akasya mpe yandi tulaka yawu wolo. 29Yandi yidikaka mpe mafuta ya mbyekolo ya longo mpe maaka ya nsunga ya mbote ya kuvedila, kisalu ya bisadi-mananasi.