யாத்திராகமம் 36

36 ¹பெசலெயேலும், அகோலியாபும், பரிசுத்த ஸ்தலத்தைக் கட்டுவதற்குரிய திறமையையும் அறிவையும் எங்கள் பிதா அருளிய திறமையுள்ள ஒவ்வொருவரும், எங்கள் பிதா கட்டளையிட்டபடியே எல்லா வேலையையும் செய்யக்கடவர்கள்.

²அப்பொழுது மோசே பெசலெயேலையும், அகோலியாபையும், எங்கள் பிதா எவர்களுடைய இருதயத்தில் திறமையை அருளினாரோ அந்தத் திறமையுள்ள ஒவ்வொருவரையும், வேலைசெய்ய வர இருதயம் ஏவப்பட்ட யாவரையும் அழைத்தான். ³பரிசுத்த ஸ்தலத்தைக் கட்டுவதற்காக இஸ்ரவேல் புத்திரர் கொண்டுவந்திருந்த காணிக்கைகள் யாவையும் அவர்கள் மோசேயினிடத்திலிருந்து வாங்கிக்கொண்டார்கள். அப்பொழுதும் ஜனங்கள் காலைதோறும் தங்கள் மனப்பூர்வமான காணிக்கைகளை அவனிடத்தில் கொண்டுவந்துகொண்டேயிருந்தார்கள். ⁴அப்பொழுது பரிசுத்த ஸ்தலத்தின் எல்லா வேலையையும் செய்துகொண்டிருந்த திறமையுள்ளவர்கள் அனைவரும், தாங்கள் செய்துகொண்டிருந்த வேலையைவிட்டு ஒவ்வொருவராய் வந்து, ⁵மோசேயை நோக்கி: “எங்கள் பிதா செய்யும்படி எங்களுக்குக் கட்டளையிட்ட வேலைக்குத் தேவையானதைவிட ஜனங்கள் மிகவும் அதிகமாய்க் கொண்டுவருகிறார்கள்” என்றார்கள்.

⁶அப்பொழுது மோசே கட்டளையிட்டு: “ஆணாகிலும் பெண்ணாகிலும் ஒருவரும் பரிசுத்த ஸ்தலத்திற்காக இனிமேல் காணிக்கை செய்யவேண்டாம்” என்று பாளயம் எங்கும் அறிவிக்கச்செய்தான். அப்பொழுது ஜனங்கள் கொண்டுவருவதை நிறுத்தினார்கள்; ⁷ஏனெனில் எல்லா வேலையையும் செய்வதற்கு அவர்களிடத்தில் ஏற்கெனவே இருந்ததே போதுமானதாயும், தேவைக்கு அதிகமாயும் இருந்தது.

மெல்லிய நூலினாலும் பொன்னினாலும் செய்யப்பட்ட பத்து தொங்குதிரைகள்

⁸வேலைசெய்த திறமையுள்ளவர்கள் வாசஸ்தலத்தைப் பத்துத் தொங்குதிரைகளால் உண்டாக்கினார்கள்; அவைகள் திரித்த மெல்லிய பஞ்சுநூலினாலும், இளநீலம், இரத்தாம்பரம், சிவப்பு நூலினாலும் செய்யப்பட்டு, திறமையான வேலைப்பாட்டினால் கேருபீன்களைக் கொண்டிருந்தன. ⁹ஒவ்வொரு தொங்குதிரையும் ஏறக்குறைய நாற்பத்திரண்டு அடி நீளமும், ஆறு அடி அகலமுமாயிருந்தது; எல்லாத் தொங்குதிரைகளும் ஒரே அளவாயிருந்தன. ¹⁰ஐந்து தொங்குதிரைகளை ஒன்றோடொன்று இணைத்து, மற்ற ஐந்தையும் ஒன்றோடொன்று இணைத்தான். ¹¹முதலாம் தொகுதியிலுள்ள வெளிப்புறத் தொங்குதிரையின் ஓரத்தில் இளநீல நாடாக்களைக் கட்டி, இரண்டாம் தொகுதியிலுள்ள வெளிப்புறத் தொங்குதிரையின் ஓரத்திலும் அப்படியே கட்டினான். ¹²முதலாம் தொங்குதிரையில் ஐம்பது நாடாக்களையும், இரண்டாம் தொகுதியிலுள்ள தொங்குதிரையின் ஓரத்தில் ஐம்பது நாடாக்களையும், ஒன்றுக்கொன்று எதிரெதிராய் உண்டாக்கினான். ¹³ஐம்பது பொன் கொக்கிகளையும் செய்து, அவைகளால் தொங்குதிரைகளை ஒன்றோடொன்று இணைத்தான்; அப்படியே வாசஸ்தலம் ஒன்றாயிற்று.

¹⁴வாசஸ்தலத்தின்மேல் கூடாரமாக வெள்ளாட்டு மயிரினால் தொங்குதிரைகளையும் செய்தான்; பதினொரு தொங்குதிரைகளைச் செய்தான். ¹⁵ஒவ்வொரு தொங்குதிரையும் ஏறக்குறைய நாற்பத்தைந்து அடி நீளமும், ஆறு அடி அகலமுமாயிருந்தது; பதினொரு தொங்குதிரைகளும் ஒரே அளவாயிருந்தன. ¹⁶அவைகளில் ஐந்து தொங்குதிரைகளை ஒன்றாக இணைத்து, மற்ற ஆறையும் ஒன்றாக இணைத்தான். ¹⁷முதலாம் தொகுதியில் வெளிப்புறத் தொங்குதிரையின் ஓரத்தில் ஐம்பது நாடாக்களையும், இரண்டாம் தொகுதியிலுள்ள தொங்குதிரையின் ஓரத்தில் ஐம்பது நாடாக்களையும் உண்டாக்கினான். ¹⁸கூடாரத்தை ஒன்றாக இணைப்பதற்கு ஐம்பது வெண்கலக் கொக்கிகளையும் செய்தான். ¹⁹சிவப்புச் சாயமிட்ட ஆட்டுக்கடாத் தோல்களினால் கூடாரத்திற்கு ஒரு மூடியையும், அதின்மேல் மெல்லிய தோலினால் ஒரு மூடியையும் செய்தான்.

²⁰பின்பு வாசஸ்தலத்திற்குச் சீத்திம் மரத்தினால் நிமிர்ந்துநிற்கும் பலகைகளைச் செய்தான். ²¹ஒவ்வொரு பலகையும் ஏறக்குறைய பதினைந்து அடி நீளமும், இருபத்தேழு அங்குல அகலமுமாயிருந்தது. ²²ஒவ்வொரு பலகைக்கும் ஒன்றோடொன்று இணைந்த இரண்டு கழுந்துகள் இருந்தன; வாசஸ்தலத்தின் எல்லாப் பலகைகளையும் இப்படியே செய்தான். ^a a v22 கழுந்து என்பது ஒவ்வொரு பலகையின் அடிப்பாகத்தில் நீட்டிக்கொண்டிருக்கும் மரமுளையாகும்; இது வெள்ளிப் பாதத்திலுள்ள துவாரத்தில் பொருந்தி, பலகையை நிமிர்ந்து நிற்கும்படி பிடித்துக்கொள்கிறது. ²³வாசஸ்தலத்திற்குப் பலகைகளைச் செய்தான்; தென்புறத்திற்கு இருபது பலகைகளைச் செய்தான். ²⁴இருபது பலகைகளின் கீழ் நாற்பது வெள்ளிப் பாதங்களைச் செய்தான்; ஒரு பலகையின் இரண்டு கழுந்துகளுக்குக் கீழ் இரண்டு பாதங்களும், அடுத்த பலகையின் இரண்டு கழுந்துகளுக்குக் கீழ் இரண்டு பாதங்களும் இருந்தன. ²⁵வாசஸ்தலத்தின் இரண்டாம் புறமாகிய வடபுறத்திற்கு இருபது பலகைகளையும், ²⁶அவைகளின் நாற்பது வெள்ளிப் பாதங்களையும் செய்தான்; ஒரு பலகையின் கீழ் இரண்டு பாதங்களும், அடுத்த பலகையின் கீழ் இரண்டு பாதங்களும் இருந்தன. ²⁷வாசஸ்தலத்தின் பின்புறமாகிய மேற்குப் பக்கத்திற்கு ஆறு பலகைகளைச் செய்தான். ²⁸பின்புறத்தில் வாசஸ்தலத்தின் மூலைகளுக்கு இரண்டு பலகைகளைச் செய்தான். ²⁹அவை இரண்டும் கீழே இரட்டையாயிருந்து, மேலே ஒரே வளையத்தில் இணைந்திருந்தன; இரண்டு மூலைகளிலும் இரண்டையும் இப்படியே செய்தான். ³⁰இப்படியே எட்டுப் பலகைகளும், அவைகளின் வெள்ளிப் பாதங்களாகிய பதினாறு பாதங்களும் இருந்தன; ஒவ்வொரு பலகையின் கீழும் இரண்டு பாதங்கள் இருந்தன.

³¹சீத்திம் மரத்தினால் தாழ்ப்பாள்களைச் செய்தான்; வாசஸ்தலத்தின் ஒரு பக்கத்துப் பலகைகளுக்கு ஐந்து தாழ்ப்பாள்களையும், ³²வாசஸ்தலத்தின் இரண்டாம் பக்கத்துப் பலகைகளுக்கு ஐந்து தாழ்ப்பாள்களையும், பின்புறமாகிய மேற்குப் பக்கத்துப் பலகைகளுக்கு ஐந்து தாழ்ப்பாள்களையும் செய்தான். ³³பலகைகளின் நடுவே ஒரு கடையிலிருந்து மறுகடைமட்டும் உருவப்பாய்கிறதற்கு நடுத்தாழ்ப்பாளையும் செய்தான். ³⁴பலகைகளைப் பொன்தகட்டால் மூடி, தாழ்ப்பாள்களைப் பிடித்துக்கொள்ளும்படி பொன் வளையங்களைச் செய்து, தாழ்ப்பாள்களையும் பொன்தகட்டால் மூடினான்.

³⁵இளநீலம், இரத்தாம்பரம், சிவப்பு நூலினாலும், திரித்த மெல்லிய பஞ்சுநூலினாலும் திரையை நெய்து, அதில் திறமையான வேலைப்பாட்டினால் கேருபீன்களைச் செய்தான். ³⁶அதற்கு நான்கு சீத்திம் மரத்தூண்களைச் செய்து, அவைகளைப் பொன்தகட்டால் மூடி, அவைகளுக்குப் பொன் கொக்கிகளையும் செய்து, அவைகளுக்கு நான்கு வெள்ளிப் பாதங்களை வார்ப்பித்தான்.

³⁷கூடாரத்தின் வாசலுக்கு இளநீலம், இரத்தாம்பரம், சிவப்பு நூலினாலும், திரித்த மெல்லிய பஞ்சுநூலினாலும் சித்திரத்தையலாக ஒரு தொங்குதிரையையும், ³⁸அதின் ஐந்து தூண்களையும் அவைகளின் கொக்கிகளையும் செய்தான்; அவைகளின் குமிழ்களையும் பூண்களையும் பொன்தகட்டால் மூடினான்; அவைகளின் ஐந்து பாதங்களோ வெண்கலமாயிருந்தன.