Eyemfuduko 35 FHB Father's Heart Bible™

35 ¹UMoses wahlanganisa lonke ibandla loonyana bakaSirayeli, wathi kubo: “Zizo ezi izinto uBawo wethu aniwisele umthetho ngazo, ukuba nizenze. ²Niya kusebenza imihla emithandathu; umhla wesixhenxe ube ngcwele kuni, ube yisabatha yokuphumla ngokupheleleyo kuBawo wethu. Nabani na osebenza ngawo wobulawa afe. ³Nize ningabasi mlilo nakuliphi na ikhaya lenu ngomhla wesabatha.”

Umnikelo wentliziyo evumayo

⁴UMoses wathi kulo lonke ibandla loonyana bakaSirayeli: “Nantsi into awayiwisela umthetho uBawo wethu, esithi: ⁵Thabathani phakathi kwenu umrhumo kuBawo wethu. Yonke intliziyo evumayo mayizise umrhumo kaBawo wethu: igolide, nesilivere, nobhedu; ⁶nemisonto emsi nemfusa nebomvu, nelinen ecikizekileyo, noboya beebhokhwe; ⁷nezintsu zeenkunzi zezimvu, zenziwe zayingqombela, nezikhumba zamahlengezi, nomngampunzi; ⁸neoli yesikhanyiso, nobulawu beoli yentambiso, nobesiqhumiso esimnandi; ⁹namatye ebherilo, namatye okufakwa e-efodini nawobengo.

¹⁰“Bonke abantliziyo zilumkileyo phakathi kwenu mabeze benze konke uBawo wethu akuwisele umthetho: ¹¹umnquba, intente yawo, nesigubungelo sawo, namagwegwe awo, neeplanga zawo, nemivalo yawo, neentsika zawo, neziseko zawo; ¹²ityeya nezibonda zayo, nesihlalo sokucamagusha, nomkhusane osithelisayo; ¹³netafile, nezibonda zayo, nazo zonke iimpahla zayo, nezonka zokubonisa; ¹⁴nesiphatho sezibane sesikhanyiso neempahla zaso nezibane zaso, neoli yesikhanyiso; ¹⁵nesibingelelo sesiqhumiso nezibonda zaso, neoli yentambiso, nesiqhumiso esiqholiweyo, nesisitheliso sokusithelisa umnyango womnquba; ¹⁶nesibingelelo sedini elinyukayo nothango lwaso lobhedu, izibonda zaso, neempahla zaso zonke, uhehema lwesitya sokuhlambela noseko lwalo; ¹⁷namawundu entendelezo, iintsika zayo neziseko zayo, nesisitheliso sesango lentendelezo; ¹⁸izikhonkwane zomnquba, nezikhonkwane zentendelezo, nezintya zazo; ¹⁹izambatho ezilukwe kakuhle zokulungiselela endaweni engcwele, izambatho ezingcwele zika-Aron umbingeleli, nezambatho zoonyana bakhe zokubingelela.”

²⁰Laphuma ke lonke ibandla loonyana bakaSirayeli kuMoses. ²¹Bonke abantliziyo yabavuselelayo, nawo wonke olomoya wamqhubayo, bazisa umrhumo kaBawo wethu wokusebenza umsebenzi wentente yokuhlangana, nenkonzo yayo yonke, nezambatho ezingcwele. ²²Beza ndawonye amadoda nabafazi; bonke abantliziyo zivumayo bazisa izacholo, namajikazi, nemisesane yokutywina, nemixhaka, yonke into yegolide; wonke umntu wasondeza umtshangatshangiso wegolide kuBawo wethu. ^a a v22 Umtshangatshangiso ube ngumnikelo ophakanyiswa wasondezwa phambi koThixo njengesenzo sokungcwaliswa. ²³Wonke umntu owayenemisonto emsi nemfusa nebomvu, nelinen ecikizekileyo, noboya beebhokhwe, nezintsu zeenkunzi zezimvu zenziwe zayingqombela, nezikhumba zamahlengezi, wazizisa. ²⁴Wonke owayenokunikela umrhumo wesilivere nowobhedu wawuzisa, waba ngumrhumo kaBawo wethu; wonke owayenomngampunzi wokusebenza wonke umsebenzi wawuzisa. ²⁵Wonke umfazi ontliziyo ilumkileyo wasonta ngezandla zakhe, wazisa oko akusontileyo: imisonto emsi nemfusa nebomvu, nelinen ecikizekileyo. ²⁶Bonke abafazi abantliziyo zabavuselelayo belumkile basonta uboya beebhokhwe. ²⁷Izikhulu zazisa amatye ebherilo, namatye okufakwa, zomfela e-efodini nobengo; ²⁸nobulawu, neoli yesikhanyiso, neyentambiso, neyesiqhumiso esimnandi. ²⁹Wonke umntu, indoda nomfazi, owayenentliziyo evumayo phakathi koonyana bakaSirayeli, wazisa umnikelo wokuqhutywa yintliziyo kuBawo wethu, wawo wonke umsebenzi uBawo wethu awawisa umthetho ngawo ngesandla sikaMoses.

UBhetsaleli ubizwa ngegama

³⁰Waza uMoses wathi koonyana bakaSirayeli: “Khangelani, uBawo wethu umbize ngegama uBhetsaleli unyana kaUri, unyana kaHuri, wesizwe sakwaYuda; ³¹wamzalisa ngoMoya kaBawo wethu, ngobulumko, nangokuqonda, nangokwazi, nangobungcibi bamashishini onke, ³²ukuba athelekelele, ayile, asebenze ngegolide nangesilivere nangobhedu, ³³nangokukrola amatye okufakwa, nangokukrola imithi, asebenze kuwo wonke umsebenzi wobungcibi. ³⁴UBawo wethu ubeke entliziyweni kaBhetsaleli ukuba afundise, yena noAholiyabhi unyana ka-Ahisamaki, wesizwe sakwaDan. ³⁵Wabazalisa ngobungcibi bokwenza wonke umsebenzi, owokukrola, nowokuyila, nowokufaka imfakamfele ngemisonto emsi nemfusa nebomvu, nelinen ecikizekileyo, nowokuluka, bengabenzi balo lonke uhlobo lomsebenzi, beziingcibi zokuyila.”