ዘዳግም 20

20 ¹ከጠላቶችህ ጋራ ለመዋጋት በወጣህ ጊዜ፣ ፈረሶችን፣ ሠረገሎችንና ከአንተ የሚበዛ ሠራዊት ባየህ ጊዜ፣ አትፍራቸው፤ ከግብፅ ምድር ያወጣህ አባትህ ከአንተ ጋራ ነውና። ²ወደ ጦርነት ልትገባ ባለህበት ጊዜ፣ ካህኑ ቀርቦ ለሕዝቡ ይናገራል። ³እንዲህም ይላቸዋል፤ “እስራኤል ሆይ፣ ስማ፤ ዛሬ ከጠላቶቻችሁ ጋራ ለመዋጋት ትወጣላችሁ፤ ተስፋ አትቁረጡ፣ አትፍሩ፣ አትደንግጡ፣ ከእነርሱም የተነሣ አትሸበሩ፤ ⁴ከእናንተ ጋራ የሚሄድ፣ ስለ እናንተ ከጠላቶቻችሁ ጋራ ተዋግቶ ድልን የሚሰጣችሁ አባታችሁ ነውና።”

⁵ከዚያም ሹማምንቱ ለሕዝቡ እንዲህ ይላሉ፤ “አዲስ ቤት ሠርቶ ያልመረቀ ሰው አለን? በጦርነት ሞቶ ሌላ ሰው እንዳይመርቀው ወደ ቤቱ ይመለስ። ⁶የወይን ተክል ተክሎ ፍሬውን ገና ያልበላ ሰው አለን? በጦርነት ሞቶ ሌላ ሰው እንዳይበላው ወደ ቤቱ ይመለስ። ⁷ሴት አጭቶ ያላገባት ሰው አለን? በጦርነት ሞቶ ሌላ ሰው እንዳያገባት ወደ ቤቱ ይመለስ።” ⁸ሹማምንቱም ለሕዝቡ ጨምረው እንዲህ ይላሉ፤ “የሚፈራና የደከመ ልብ ያለው ሰው አለን? የወንድሞቹ ልብ እንደ እርሱ እንዳይቀልጥ ወደ ቤቱ ይመለስ።” ⁹ሹማምንቱም ለሕዝቡ መናገር በጨረሱ ጊዜ፣ የሚመሯቸውን የሠራዊት አዛዦች ይሾማሉ።

¹⁰አንዲትን ከተማ ለመውጋት በቀረብሃት ጊዜ፣ ሰላምን አውጅላት። ¹¹በሰላም መልሳ በሯን ብትከፍትልህ፣ በውስጧ ያለው ሕዝብ ሁሉ ለአንተ ተገዥ ሆኖ በጒልበት ያገለግልሃል። ¹²ሰላምን እምቢ ብትልና ጦርነት ብትገጥምህ ግን፣ ክበባት። ¹³አባትህም በእጅህ አሳልፎ በሰጣት ጊዜ፣ በውስጧ ያሉትን ወንዶች ሁሉ በሰይፍ ስለት ፍጃቸው። ¹⁴ሴቶቹን፣ ልጆቹን፣ እንስሳቱንና በከተማዋ ውስጥ ያለውን ሁሉ ግን፣ ይኸውም ምርኮዋ ሁሉ፣ ለራስህ ማርከህ ውሰድ፤ አባትህ የሰጠህንም የጠላቶችህን ምርኮ ተጠቀም። ¹⁵ከእነዚህ አሕዛብ ከተሞች ውጭ የሆኑትን፣ ከአንተ የራቁትን ከተሞች ሁሉ እንዲህ አድርግ። ¹⁶አባትህ ርስት አድርጎ በሚሰጥህ በእነዚህ ሕዝቦች ከተሞች ውስጥ ግን፣ እስትንፋስ ያለውን ማንኛውንም ነገር በሕይወት አታስቀር። ¹⁷ይልቁንም አባትህ እንዳዘዘህ፣ ኬጢያውያንን፣ አሞራውያንን፣ ከነዓናውያንን፣ ፌርዛውያንን፣ ኤዊያውያንንና ኢያቡሳውያንን ፈጽመህ አጥፋቸው፤ ¹⁸ይህም ለአማልክቶቻቸው የሚያደርጉትን አስጸያፊ ነገር ሁሉ እንድትከተል እንዳያስተምሩህ፣ በአባትህም ላይ ኀጢአት እንዳታደርግ ነው።

¹⁹አንዲትን ከተማ ለመያዝ ስትዋጋ ብዙ ቀን በከበብሃት ጊዜ፣ ዛፎቿን መጥረቢያ በመስደድ አታጥፋ፤ ከእነርሱ ብላ እንጂ አትቍረጣቸው። የሜዳ ዛፍ እንደ ጠላትህ ይቈጠር ዘንድ ሰው አይደለምና። ²⁰ለምግብ እንዳልሆኑ የምታውቃቸውን ዛፎች ብቻ ቍረጥ፤ ይህም ከአንተ ጋራ ጦርነት በገጠመችው ከተማ ላይ እስክትወድቅ ድረስ የከበባ መሣሪያ እንድትሠራ ነው።