ዘዳግም 15

15 ¹በየሰባት ዓመቱ መጨረሻ የዕዳ ፍታት ታውጃለህ። ²ፍታቱም ይህ ነው፤ አበዳሪ ሁሉ ለባልንጀራው ያበደረውን ይሰርዝ። አባትህ ፍታት አውጇልና ከባልንጀራው ወይም ከወንድሙ መልሶ አይጠይቅ። ^a a v2 በየሰባተኛው ዓመት በእስራኤላውያን መካከል የነበረው ዕዳ ይቅር ይባል ነበር፤ ይህም ድኽነት ወደ ዘላቂ ጥፋት እንዳይጠነክር የሚከለክል መደበኛ አዲስ ጅማሬ ነበር። ³ከባዕድ ሰው ዕዳ መጠየቅ ትችላለህ፤ ወንድምህ ያለበትን ዕዳ ግን ተወለት። ⁴ነገር ግን አባትህ ርስት አድርገህ እንድትወርሰው በሚሰጥህ ምድር በእርግጥ ስለሚባርክህ በመካከልህ ድኻ አይኖርም። ⁵ይህ የሚሆነው የአባትህን ድምፅ በእውነት ብትሰማ፣ ዛሬ የምሰጥህን ይህን ትእዛዝ ሁሉ በጥንቃቄ ብትጠብቅ ብቻ ነው። ⁶አባትህ ቃል በገባልህ መሠረት ይባርክሃልና። ለብዙ ሕዝቦች ታበድራለህ፤ ከማንም አትበደርም፤ በብዙ ሕዝቦች ትገዛለህ፤ አንተን ግን ማንም አይገዛህም።

⁷አባትህ በሚሰጥህ ምድር ባለ በማንኛውም ከተማ ከወንድሞችህ አንዱ ድኻ ቢሆን፣ ልብህን አታደንድን፤ በድኻው ወንድምህ ላይ እጅህን አትጨብጥ። ⁸ይልቁንም እጅህን በሰፊው ክፈትለት፤ ለሚያስፈልገው ሁሉ የሚበቃውን በልግስና አበድረው። ⁹‘ሰባተኛው ዓመት፣ የፍታት ዓመት ቀርቧል’ የሚል ክፉ አሳብ በልብህ እንዳይሞላ፣ በድኻው ወንድምህ ላይ ዐይንህ ክፉ ሆኖ ምንም ሳትሰጠው እንዳትቀር ተጠንቀቅ። እርሱም በአንተ ላይ ወደ አባትህ ይጮኻል፤ አንተም ኀጢአቱን ትሸከማለህ። ¹⁰በልግስና ስጠው፤ በምትሰጠውም ጊዜ ልብህ አያዝን፤ ስለዚህ ነገር አባትህ በሥራህ ሁሉ፣ እጅህ በሚሞክረው ነገር ሁሉ ይባርክሃል። ¹¹ድኾች ከምድር ከቶ ስለማይጠፉ፣ በምድርህ ላለው ለድኻውና ለችግረኛው ወንድምህ እጅህን በሰፊው ክፈትለት ብዬ አዝሃለሁ።

ዕብራውያን አገልጋዮችን ነጻ ስለ ማውጣት

¹²ወንድምህ የሆነ ዕብራዊ ወንድ ወይም ሴት ተሽጦልህ ስድስት ዓመት ቢያገለግልህ፣ በሰባተኛው ዓመት ነጻ አድርገህ ከአንተ ስደደው። ¹³ነጻ በምታወጣውም ጊዜ ባዶ እጁን አትስደደው። ¹⁴አባትህ እንደ ባረከህ፣ ከመንጋህ፣ ከዐውድማህ፣ ከወይን መጭመቂያህ በልግስና ስጠው። ¹⁵በግብፅ ምድር ባሪያ እንደ ነበርህ አስብ፤ አባትህም ቤዠህ፤ ስለዚህ ዛሬ ይህን አዝሃለሁ። ¹⁶ነገር ግን አንተንና ቤተ ሰብህን ስለ ወደደ፣ ከአንተም ጋራ ስለ ተመቸው፣ ‘ከአንተ አልለይም’ ቢልህ፣ ¹⁷ወስፌ ወስደህ ጆሮውን በበሩ ላይ ብሳው፤ ለዘላለምም አገልጋይህ ይሆናል። ለሴት አገልጋይህም እንዲሁ አድርግ። ¹⁸ነጻ ማውጣቱ ከባድ አይምሰልህ፤ ስድስቱ ዓመት የቀን ሠራተኛ ደመወዝ እጥፍ ዋጋ ነበረውና። አባትህም በምታደርገው ሁሉ ይባርክሃል።

የተለዩ የበኵር እንስሳት

¹⁹ከከብትህና ከመንጋህ የተወለደውን በኵር ወንድ ሁሉ ለአባትህ ቀድስ። የከብትህን በኵር አታሠራ፤ የመንጋህንም በኵር አትሸልት። ²⁰አንተና ቤተ ሰብህ በየዓመቱ አባትህ በሚመርጠው ስፍራ በአባትህ ፊት ትበሉታላችሁ። ²¹ነገር ግን ነውር ቢኖርበት፣ አንካሳ ወይም ዕውር ቢሆን፣ ማንኛውም ከባድ ጕድለት ቢኖረው፣ ለአባትህ አትሠዋው። ²²ርኩሱም ንጹሑም እንደ ሚዳቋ ወይም እንደ አጋዘን አንድ ላይ በከተሞችህ ይብሉት። ²³ደሙን ብቻ አትብላ፤ እንደ ውሃ በምድር ላይ አፍስሰው።