ପିତାଙ୍କ ମୁକ୍ତିର ବର୍ଷ

ପ୍ରତି ସପ୍ତମ ବର୍ଷରେ ଋଣ ମୁକ୍ତ କରାଯାଏ, ଏବଂ ବ୍ୟବସ୍ଥା ପ୍ରଲୋଭନଟିକୁ ଠିକ୍ ନାମ ଦିଏ: ମୁକ୍ତି ବର୍ଷ ନିକଟ ବୋଲି ଋଣ ଦେବାକୁ ମନା କରିବା। ତୁମ୍ଭର ହାତ ଖୋଲି ଦିଅ। ମୁକ୍ତ ଦାସମାନେ ଖାଲି ହାତରେ ନୁହେଁ, ସାମଗ୍ରୀ ନେଇ ବିଦାୟ ହୁଅନ୍ତି, କାରଣ ତୁମ୍ଭେ ମିସରରେ ଦାସ ଥିଲ ଏବଂ ତୁମ୍ଭର ପିତା ତୁମ୍ଭକୁ ମୁକ୍ତ କଲେ।

ଅଧ୍ୟାୟ 15।

ପ୍ରତି ସାତ ବର୍ଷର ଶେଷରେ ତୁମ୍ଭେ ଋଣ କ୍ଷମା କରିବ। ଏହି ମୁକ୍ତି ଅଟେ; ପ୍ରତ୍ୟେକ ମହାଜନ ଆପଣା ପ୍ରତିବାସୀକୁ ଦେଇଥିବା ଋଣ କ୍ଷମା କରିବ। ସେ ଆପଣା ପ୍ରତିବାସୀ କିମ୍ବା ଭାଇଠାରୁ ତାହା ଆଦାୟ କରିବ ନାହିଁ, କାରଣ ତୁମ୍ଭ ପିତା ମୁକ୍ତି ଘୋଷଣା କରିଅଛନ୍ତି। ^a ତୁମ୍ଭେ ବିଦେଶୀଠାରୁ ପରିଶୋଧ ଦାବି କରିପାର, ମାତ୍ର ତୁମ୍ଭ ଭାଇ ତୁମ୍ଭର ଯାହା ଦେବାର ଅଛି, ତାହା କ୍ଷମା କର। ତଥାପି ତୁମ୍ଭମାନଙ୍କ ମଧ୍ୟରେ କୌଣସି ଦରିଦ୍ର ନ ଥିବ, କାରଣ ତୁମ୍ଭ ପିତା ତୁମ୍ଭକୁ ଅଧିକାର ଅର୍ଥେ ଅଧିକାର କରିବା ନିମନ୍ତେ ଯେଉଁ ଦେଶ ଦେଉଅଛନ୍ତି, ସେଥିରେ ତୁମ୍ଭ ପିତା ତୁମ୍ଭକୁ ନିଶ୍ଚୟ ଆଶୀର୍ବାଦ କରିବେ। କେବଳ ଯଦି ତୁମ୍ଭେ ଆଜି ତୁମ୍ଭକୁ ଦେଉଥିବା ଏହି ସମସ୍ତ ଆଜ୍ଞା ଯତ୍ନପୂର୍ବକ ପାଳନ କରି ତୁମ୍ଭ ପିତାଙ୍କ ବାକ୍ୟ ପ୍ରକୃତରେ ଶୁଣ। କାରଣ ତୁମ୍ଭ ପିତା ଆପଣା ପ୍ରତିଜ୍ଞାନୁସାରେ ତୁମ୍ଭକୁ ଆଶୀର୍ବାଦ କରିବେ। ତୁମ୍ଭେ ଅନେକ ଜାତିକୁ ଋଣ ଦେବ, ମାତ୍ର କାହାଠାରୁ ଋଣ ନେବ ନାହିଁ; ତୁମ୍ଭେ ଅନେକ ଜାତି ଉପରେ ଶାସନ କରିବ, ମାତ୍ର କେହି ତୁମ୍ଭ ଉପରେ ଶାସନ କରିବ ନାହିଁ।

ତୁମ୍ଭ ପିତା ତୁମ୍ଭକୁ ଦେଉଥିବା ଦେଶର କୌଣସି ନଗରରେ ଯଦି ତୁମ୍ଭ ଭାଇମାନଙ୍କ ମଧ୍ୟରୁ କେହି ଦରିଦ୍ର ହୁଏ, ତେବେ ତୁମ୍ଭେ ଆପଣା ଦରିଦ୍ର ଭାଇ ବିରୁଦ୍ଧରେ ଆପଣା ହୃଦୟ କଠିନ କର ନାହିଁ କିମ୍ବା ଆପଣା ହସ୍ତ ବନ୍ଦ କର ନାହିଁ। ବରଂ ତାହା ପ୍ରତି ଆପଣା ହସ୍ତ ବିସ୍ତାର କର ଓ ତାହାର ଅଭାବ ଅନୁସାରେ ଯାହା ଆବଶ୍ୟକ, ତାହା ମୁକ୍ତ ଭାବରେ ତାହାକୁ ଋଣ ଦିଅ। ସାବଧାନ ହୁଅ, ‘ସପ୍ତମ ବର୍ଷ, ମୁକ୍ତିର ବର୍ଷ, ନିକଟ ହେଲା’ ବୋଲି କୌଣସି ଦୁଷ୍ଟ ଚିନ୍ତା ତୁମ୍ଭ ହୃଦୟରେ ସ୍ଥାନ ନ ପାଉ, ପୁଣି ଆପଣା ଦରିଦ୍ର ଭାଇ ବିରୁଦ୍ଧରେ ତୁମ୍ଭ ଚକ୍ଷୁ ମନ୍ଦ ହୋଇ ତାହାକୁ କିଛି ନ ଦେଉ। ତହିଁରେ ସେ ତୁମ୍ଭ ବିରୁଦ୍ଧରେ ତୁମ୍ଭ ପିତାଙ୍କ ନିକଟରେ ଡାକ ପକାଇବ, ଆଉ ତୁମ୍ଭେ ପାପ ବହନ କରିବ। ତାହାକୁ ଉଦାର ଭାବରେ ଦିଅ, ପୁଣି ତାହାକୁ ଦେବା ସମୟରେ ତୁମ୍ଭ ହୃଦୟ ଦୁଃଖିତ ନ ହେଉ, କାରଣ ଏହି ହେତୁ ତୁମ୍ଭ ପିତା ତୁମ୍ଭର ସମସ୍ତ କାର୍ଯ୍ୟରେ ଓ ତୁମ୍ଭ ହସ୍ତର ଉଦ୍ୟୋଗ କରୁଥିବା ସମସ୍ତ କର୍ମରେ ତୁମ୍ଭକୁ ଆଶୀର୍ବାଦ କରିବେ। ଯେହେତୁ ଦରିଦ୍ର ଲୋକ ଦେଶରୁ କେବେ ଲୁପ୍ତ ହେବେ ନାହିଁ, ଏଥିପାଇଁ ମୁଁ ତୁମ୍ଭକୁ ଆଜ୍ଞା ଦେଉଅଛି, ତୁମ୍ଭେ ଆପଣା ଦେଶରେ ଆପଣା ଦରିଦ୍ର ଓ ଅଭାବଗ୍ରସ୍ତ ଭାଇ ପ୍ରତି ଆପଣା ହସ୍ତ ବିସ୍ତାର କର।

ଏବ୍ରୀୟ ଦାସମାନଙ୍କୁ ମୁକ୍ତ କରିବା

ଯଦି ତୁମ୍ଭ ଭାଇ, କୌଣସି ଏବ୍ରୀୟ ପୁରୁଷ କି ସ୍ତ୍ରୀ, ତୁମ୍ଭ ନିକଟରେ ବିକ୍ରିତ ହୁଏ ଓ ଛଅ ବର୍ଷ ତୁମ୍ଭର ସେବା କରେ, ତେବେ ସପ୍ତମ ବର୍ଷରେ ତାହାକୁ ଆପଣାଠାରୁ ମୁକ୍ତ କରି ବିଦାୟ କର। ପୁଣି ଯେତେବେଳେ ତୁମ୍ଭେ ତାହାକୁ ମୁକ୍ତ କରିବ, ସେତେବେଳେ ତାହାକୁ ଶୂନ୍ୟ ହସ୍ତରେ ବିଦାୟ କରିବ ନାହିଁ। ତୁମ୍ଭ ପିତା ଯେପରି ତୁମ୍ଭକୁ ଆଶୀର୍ବାଦ କରିଅଛନ୍ତି, ସେହିପରି ତୁମ୍ଭେ ଆପଣା ପଲ, ଖଳ ଓ ଦ୍ରାକ୍ଷାକୁଣ୍ଡରୁ ତାହାକୁ ମୁକ୍ତ ଭାବରେ ଯୋଗାଅ। ତୁମ୍ଭେ ଯେ ମିସର ଦେଶରେ ଦାସ ଥିଲ, ପୁଣି ତୁମ୍ଭ ପିତା ତୁମ୍ଭକୁ ମୁକ୍ତ କଲେ, ଏହା ସ୍ମରଣ କର — ଏହି ହେତୁ ମୁଁ ଆଜି ତୁମ୍ଭକୁ ଏହି ଆଜ୍ଞା ଦେଉଅଛି। ମାତ୍ର ଯଦି ସେ ତୁମ୍ଭକୁ ଓ ତୁମ୍ଭ ପରିବାରକୁ ପ୍ରେମ କରି, ତୁମ୍ଭ ସଙ୍ଗରେ ସୁଖରେ ଥିବାରୁ, ‘ମୁଁ ତୁମ୍ଭକୁ ଛାଡ଼ି ଯିବି ନାହିଁ’ ବୋଲି ତୁମ୍ଭକୁ କହେ, ତେବେ ଗୋଟିଏ ତେଟି ନେଇ ତାହାର କର୍ଣ୍ଣ ଭେଦ କରି କବାଟରେ ବିନ୍ଧ; ତହିଁରେ ସେ ଅନନ୍ତକାଳ ତୁମ୍ଭର ଦାସ ହେବ। ପୁଣି ଆପଣା ଦାସୀ ପ୍ରତି ମଧ୍ୟ ସେହି ପ୍ରକାର କର। ତାହାକୁ ମୁକ୍ତ କରିବା କଷ୍ଟକର ବୋଲି ମନେ କର ନାହିଁ — କାରଣ ତାହାର ଛଅ ବର୍ଷର ସେବା ବେତନଜୀବୀ ମଜୁରିଆର ଦୁଇଗୁଣ ବେତନର ତୁଲ୍ୟ ଥିଲା। ତୁମ୍ଭର ସମସ୍ତ କାର୍ଯ୍ୟରେ ତୁମ୍ଭ ପିତା ତୁମ୍ଭକୁ ଆଶୀର୍ବାଦ କରିବେ।

ପ୍ରଥମଜାତ ପଶୁ ପୃଥକ୍‍ କରାଯିବା

ତୁମ୍ଭ ଗୋରୁ ଓ ମେଣ୍ଢାପଲର ପ୍ରତ୍ୟେକ ପ୍ରଥମଜାତ ପୁଂଶାବକକୁ ତୁମ୍ଭ ପିତାଙ୍କ ଉଦ୍ଦେଶ୍ୟରେ ପୃଥକ୍‍ କର। ତୁମ୍ଭେ ଗୋରୁପଲର ପ୍ରଥମଜାତକୁ ଦେଇ କାର୍ଯ୍ୟ କର ନାହିଁ କିମ୍ବା ମେଣ୍ଢାପଲର ପ୍ରଥମଜାତର ଲୋମ କାଟ ନାହିଁ। ତୁମ୍ଭ ପିତା ଯେଉଁ ସ୍ଥାନ ମନୋନୀତ କରିବେ, ସେଠାରେ ତୁମ୍ଭେ ଓ ତୁମ୍ଭ ପରିବାର ପ୍ରତି ବର୍ଷ ତୁମ୍ଭ ପିତାଙ୍କ ସମ୍ମୁଖରେ ତାହା ଭୋଜନ କରିବ। ମାତ୍ର ଯଦି ତାହାର କୌଣସି ଖୁଣ ଥାଏ, ଅର୍ଥାତ୍‍ ତାହା ଲେଙ୍ଗଡ଼ା କି ଅନ୍ଧ ହୁଏ, କିମ୍ବା ତାହାର କୌଣସି ଗୁରୁତର ଦୋଷ ଥାଏ, ତେବେ ତୁମ୍ଭେ ତାହା ତୁମ୍ଭ ପିତାଙ୍କ ଉଦ୍ଦେଶ୍ୟରେ ବଳିଦାନ କର ନାହିଁ। ହରିଣ ଓ ମୃଗ ତୁଲ୍ୟ ଶୁଚି ଓ ଅଶୁଚି ଲୋକ ଏକତ୍ର ତାହା ଆପଣା ଆପଣା ନଗରରେ ଭୋଜନ କରିବ। କେବଳ ତୁମ୍ଭେ ତାହାର ରକ୍ତ ଭୋଜନ କରିବ ନାହିଁ; ଜଳ ତୁଲ୍ୟ ତାହା ଭୂମିରେ ଢାଳିଦେବ।