詩篇 62

62 ¹我嘅心單單默默等候我嘅父；我嘅拯救係從佢而嚟。 ²唯獨佢係我嘅磐石、我嘅拯救， 係我嘅堡壘；我永遠都唔會大大動搖。 ³你哋要攻擊一個人到幾時呢？ 一齊將佢擊倒， 好似一堵傾斜嘅牆， 一道搖搖欲墜嘅籬笆咁？ ⁴佢哋淨係謀算將佢從高位推倒；佢哋以講大話為樂。 佢哋口裏面就祝福， 心裏面就咒詛。

⁵我嘅心啊，你要單單默默等候我嘅父， 因為我嘅盼望係從佢而嚟。 ⁶唯獨佢係我嘅磐石、我嘅拯救， 係我嘅堡壘；我唔會動搖。 ⁷我嘅拯救同我嘅榮耀都在乎我嘅父；我大能嘅磐石、 我嘅避難所，都係在乎我嘅父。 ⁸眾人啊，你哋要時時刻刻倚靠佢； 要喺佢面前 傾心吐意；我哋嘅父係我哋嘅避難所。

⁹卑微嘅人真係只不過一口氣，有權勢嘅人都係虛幻； 佢哋放喺天平上一稱就浮起——加埋一齊 仲輕過一口氣。 ¹⁰唔好倚靠勒索得嚟嘅嘢； 唔好空空咁指望搶奪得嚟嘅財物；就算財富增多， 都唔好將心放喺上面。 ¹¹我哋嘅父講過一次； 呢樣嘢我聽過兩次： 就係能力係屬於我哋嘅父， ^a a v11 「一次……兩次」係一種希伯來詩歌嘅表達方式，意思係：呢件事係至緊要嘅。 ¹²我至高嘅父啊， 慈愛都係屬於你嘅。因為你會照住各人所做嘅嚟報應各人。