詩篇 62

62 ¹ 我嘅心只係默默等候我嘅父;我嘅拯救係從佢而嚟。 ² 只有佢係我嘅磐石、我嘅拯救, 我嘅堡壘;我永遠唔會大大動搖。 ³ 你哋要攻擊一個人到幾時呢, 將佢打倒, 好似一堵歪斜嘅牆, 一道搖搖欲墜嘅籬笆咁? ⁴ 佢哋淨係諗住將佢從高位推倒;佢哋以講大話為樂。 佢哋口裡祝福, 但心裡就咒詛。細拉

⁵ 我嘅心啊,你要單單等候我嘅父, 默默等候,因為我嘅盼望係從佢而嚟。 ⁶ 只有佢係我嘅磐石、我嘅拯救, 我嘅堡壘;我唔會動搖。 ⁷ 我嘅拯救同我嘅榮耀都在乎我嘅父;我大能嘅磐石, 我嘅避難所,都係在乎我嘅父。 ⁸ 眾民哪,你哋要時時刻刻倚靠佢; 在佢面前傾心吐意; 我哋嘅父係我哋嘅避難所。細拉

⁹ 卑微嘅人不過係一口氣,有權勢嘅人只係虛幻; 放上天秤佢哋就浮起—— 加埋一齊仲輕過一口氣。 ¹⁰ 唔好倚靠勒索得嚟嘅嘢; 唔好對搶奪存虛空嘅指望;如果財富增多, 都唔好將你嘅心放喺佢哋度。 ¹¹ 有一次, 我哋嘅父講過;有兩次, 我聽過呢句話:權能係屬於我哋嘅父嘅, ^a a v11 「一次⋯⋯兩次」係希伯來詩歌嘅一種手法,意思係:呢樣嘢比一切都更加緊要。 ¹² 我主宰嘅父啊, 慈愛亦都係屬於你嘅。因為你要照各人所做嘅嚟報應佢。