Ọkàn Mi Ń Dúró Ní Ìdákẹ́jẹ́ẹ́
Fún olùdarí orin. Fún Jedutuni. Saamu Dafidi.
Dafidi dákẹ́ jẹ́ẹ́, ó ń dúró de Baba rẹ̀ nìkan, nígbà tí àwọn mìíràn ń kọlù ú bí ògiri tí ó tẹ̀, tí wọ́n ń súre fún un lẹ́nu, tí wọ́n sì ń ṣépè fún un nínú ọkàn. Ó wọn àwọn onírẹ̀lẹ̀ àti àwọn alágbára, ó sì rí i pé wọ́n fúyẹ́ ju èémí lọ. Lẹ́yìn náà ó sọ fún gbogbo àwọn yòókù pé kí àwọn náà tú ọkàn wọn jáde.
62 1Baba mi nìkan ni ọkàn mi ń dúró dè ní ìdákẹ́jẹ́ẹ́; ọ̀dọ̀ rẹ̀ ni ìgbàlà mi ti ń wá. 2Òun nìkan ni àpáta mi àti ìgbàlà mi, odi agbára mi; a kì yóò mì mí gidigidi láéláé. 3Yóò ti pẹ́ tó tí gbogbo yín yóò fi máa kọlu ọkùnrin kan, tí ẹ ó máa lù ú wó, bí ògiri tí ó ń dọ̀bọ̀, bí ọgbà tí ó ń mì? 4Èrò wọn kìkì ni láti wó o lulẹ̀ kúrò ní ipò gíga rẹ̀; inú wọn sì ń dùn sí irọ́. Ẹnu wọn ni wọ́n fi ń súre, ṣùgbọ́n nínú ọkàn wọn ni wọ́n ti ń ṣẹ́pè.
5Baba mi nìkan ni, ọkàn mi, dúró ní ìdákẹ́jẹ́ẹ́, nítorí ọ̀dọ̀ rẹ̀ ni ìrètí mi ti ń wá. 6Òun nìkan ni àpáta mi àti ìgbàlà mi, odi agbára mi; a kì yóò mì mí. 7Ìgbàlà mi àti ògo mi gbé ara lé Baba mi; àpáta agbára mi, ibi ìsádi mi, wà nínú Baba mi. 8Ẹ gbẹ́kẹ̀lé e nígbà gbogbo, ẹ̀yin ènìyàn; ẹ tú ọkàn yín jáde níwájú rẹ̀; Baba wa ni ibi ìsádi fún wa.
9Nítòótọ́, àwọn ẹni rírẹlẹ̀ kìkì èémí ni, àwọn alágbára sì jẹ́ ẹ̀tàn; lórí òsùwọ̀n wọ́n a gòkè—papọ̀ wọ́n fúyẹ́ ju èémí lọ. 10Ẹ má ṣe gbẹ́kẹ̀lé ìfipábánigbà; ẹ má ṣe ní ìrètí asán nínú olè jíjà; bí ọrọ̀ bá ń pọ̀ sí i, ẹ má ṣe fi ọkàn yín lé e. 11Ẹ̀ẹ̀kan ni Baba wa ti sọ̀rọ̀; ẹ̀ẹ̀mejì ni mo ti gbọ́ èyí: pé agbára ń jẹ́ ti Baba wa, a a v11 “Ẹ̀ẹ̀kan… ẹ̀ẹ̀mejì” jẹ́ ìlànà oríkì èdè Hébérù tí ó túmọ̀ sí: èyí ju gbogbo rẹ̀ lọ ni ó ṣe pàtàkì jùlọ. 12àti pé tìrẹ ni, Baba mi Olódùmarè, ìfẹ́ májẹ̀mú. Nítorí ìwọ yóò san ẹ̀san fún olúkúlùkù gẹ́gẹ́ bí ohun tí ó ṣe.
