Ngoro Yakwa Nĩĩetereire

Kũrĩ mũtongoria wa aini. Kũrĩ Jeduthuni. Thaburi ya Daudi.

Daudi etereire Ithe wake we wiki ahoreire, o rĩrĩa andũ arĩa angĩ mamũgũthagũtha ta rũthingo rũrĩa rwenekete, makĩmũrathima na tũnua na makamũruma ngoroinĩ. Athimaga arĩa anyinyi na arĩa marĩ hinya, agakora marĩ mahũthũ gũkĩra mĩhũmũ, agacooka akeera andũ arĩa angĩ oothe maitũrĩre ngoro ciao o nao.

Gĩcunjĩ 62.

Ithe wakwa we wiki nĩ we ngoro yakwa ĩetagĩrĩra ĩkirĩte; ũhonokio wakwa uumaga kũrĩ we. We wiki nĩ we ihiga rĩakwa na ũhonokio wakwa, nĩ we kĩĩhitho gĩakwa; ndigathingithio mũno o na rĩ. Nĩ nginya rĩ inyuĩ othe mũgũtharĩkagĩra mũndũ, mũkĩmũgũtha mũmũgwĩthie thĩ, ta rũthingo rũrĩa rwenekete, ta rũgiri rũrĩa rũinainaga? Mathugundaga o kũmũgũithia kuuma handũ hake harĩa ha igũrũ; nĩmakenagĩra maheeni. Na tũnua twao nĩmarathimanaga, no thĩinĩ wa ngoro ciao nĩmarumanaga.

Ithe wakwa we wiki, wee ngoro yakwa, ikara ũkirĩte ũmwetagĩrĩra, tondũ mwĩhoko wakwa uumaga kũrĩ we. We wiki nĩ we ihiga rĩakwa na ũhonokio wakwa, nĩ we kĩĩhitho gĩakwa; ndigathingithio. Ũhonokio wakwa na riiri wakwa ciĩhokete Ithe wakwa; ihiga rĩakwa rĩrĩ hinya, na rĩũrĩro rĩakwa, irĩ thĩinĩ wa Ithe wakwa. Mwĩhokagei we hĩndĩ ciothe, inyuĩ andũ; itũrũrai ngoro cianyu mbere yake; Ithe witũ nĩ we rĩũrĩro riitũ.

Ti-itherũ andũ arĩa anyinyi no mĩhũmũ, na arĩa marĩ hinya nĩ maheeni; maigĩrĩirwo ratiri-inĩ nĩmambataga—marĩ hamwe mahũthũ gũkĩra mĩhũmũ. Mũtikehoke ũtunyani; mũtikagĩe na mwĩhoko wa tũhũ harĩ ũici; ũtonga ũngĩingĩha, mũtikaige ngoro cianyu igũrũ rĩaguo. Ihinda rĩmwe Ithe witũ nĩarĩtie; maita meerĩ nĩnjiguĩte ũndũ ũyũ: atĩ hinya nĩ wa Ithe witũ, ^a na wee, Ithe wakwa Mũnene, nĩ waku wendo wa kĩrĩĩkanĩro. Nĩgũkorwo nĩũkarĩha o mũndũ kũringana na ũrĩa ekĩte.