Mika 4

4 ¹Ní àwọn ọjọ́ ìkẹyìn, òkè tí ilé Baba wa dúró lé lórí ni a ó fìdí rẹ̀ múlẹ̀ gbọn-in gẹ́gẹ́ bí òkè tí ó ga jù nínú àwọn òkè, a ó sì gbé e ga ju àwọn òkè kéékèèké lọ, àwọn ènìyàn yóò sì ṣàn wá sí ọ̀dọ̀ rẹ̀. ²Ọ̀pọ̀ orílẹ̀-èdè yóò wá, wọn yóò sì wí pé, “Ẹ wá, ẹ jẹ́ kí a gòkè lọ sí òkè Baba wa, sí ilé Ọlọ́run Jakọbu, kí ó lè kọ́ wa ní ọ̀nà rẹ̀, kí àwa lè rìn ní ipa ọ̀nà rẹ̀.” Nítorí ìtọ́ni yóò ti Síónì jáde, àti ọ̀rọ̀ Baba wa láti Jerusalẹmu wá. ³Yóò ṣe ìdájọ́ láàrin ọ̀pọ̀ ènìyàn, yóò sì parí awuyewuye fún àwọn orílẹ̀-èdè alágbára ní ọ̀nà jíjìn réré. Wọn yóò sì fi idà wọn rọ ohun ìtulẹ̀, àti ọ̀kọ̀ wọn rọ dòjé; orílẹ̀-èdè kì yóò gbé idà sókè sí orílẹ̀-èdè, bẹ́ẹ̀ ni wọn kì yóò kọ́ ogun jíjà mọ́. ⁴Olúkúlùkù yóò jókòó lábẹ́ àjàrà tirẹ̀ àti lábẹ́ igi ọ̀pọ̀tọ́ tirẹ̀, kò sí ẹni tí yóò dẹ́rùbà wọn, nítorí Baba àwọn ọmọ ogun ọ̀run tìkára rẹ̀ ni ó ti sọ̀rọ̀. ⁵Nítorí gbogbo àwọn ènìyàn ń rìn ní orúkọ òrìṣà tiwọn, ṣùgbọ́n àwa yóò rìn ní orúkọ Baba wa láé àti láéláé.

Baba Wa Kó Àwọn Ọmọ Rẹ̀ Tí Ó Ti Fọ́nká Jọ

⁶Ní ọjọ́ náà, ni Baba wa wí, èmi yóò kó àwọn arọ jọ, èmi yóò sì ṣà àwọn tí a lé kúrò jọpọ̀, àwọn tí mo ti pọ́n lójú. ⁷Èmi yóò sọ àwọn arọ di ìyókù, àti àwọn tí a lé lọ sí ọ̀nà jíjìn di orílẹ̀-èdè alágbára, Baba wa yóò sì jọba lé wọn lórí ní Òkè Síónì, láti ìsinsin yìí lọ àti títí láé.

⁸Àti ìwọ, ilé ìṣọ́ agbo ẹran, òkè ọmọbìnrin Síónì, ọ̀dọ̀ rẹ ni yóò wá—ìjọba ìṣáájú yóò padà dé, ìjọba ọmọbìnrin Jerusalẹmu.

⁹Ní ìsinsin yìí, èéṣe tí ìwọ fi ń kígbe sókè? Kò ha sí ọba kankan nínú rẹ bí? Olùdámọ̀ràn rẹ ha ti ṣègbé, tí ìrora fi dì ọ́ mú bí obìnrin tí ń rọbí? ¹⁰Yí lọ, kí o sì kérora, ìwọ ọmọbìnrin Síónì, bí obìnrin tí ń rọbí, nítorí ní ìsinsin yìí ìwọ yóò jáde kúrò nínú ìlú, ìwọ yóò sì máa gbé ní pápá gbalasa; ìwọ yóò lọ sí Babeli. Níbẹ̀ ni a ó ti gbà ọ́ là; níbẹ̀ ni Baba wa yóò ti rà ọ́ padà kúrò lọ́wọ́ àwọn ọ̀tá rẹ.

¹¹Ní ìsinsin yìí ọ̀pọ̀ orílẹ̀-èdè kó ara wọn jọ sí ọ, wọn ń wí pé, “Ẹ jẹ́ kí a sọ ọ́ di àìmọ́, kí ojú wa sì fi ìdùnnú wo Síónì.” ¹²Ṣùgbọ́n wọn kò mọ èrò inú Baba wa; wọn kò yé ètò rẹ̀, pé ó ti kó wọn jọ bí ìtí ọkà sí ilẹ̀ ìpakà. ¹³Dìde, kí o sì pa ọkà, ìwọ ọmọbìnrin Síónì, nítorí èmi yóò sọ ìwo rẹ di irin, àti pátákò ẹsẹ̀ rẹ di idẹ; ìwọ yóò sì pa ọ̀pọ̀ ènìyàn run, ìwọ yóò sì ya èrè wọn sí mímọ́ fún Baba wa, àti ọrọ̀ wọn fún Olódùmarè gbogbo ayé.