UMikha 4

4 ¹Ngezinsuku zokugcina intaba lapho kumi khona indlu kaBaba wethu iyakumiswa iqine njengephakeme kunazo zonke izintaba, iphakanyiselwe phezulu kwamagquma, nezizwe ziyakugobhozela kuyo. ²Izizwe eziningi ziyakuza zithi: “Wozani, asenyukele entabeni kaBaba wethu, endlini kaNkulunkulu kaJakobe, ukuze asifundise izindlela zakhe futhi sihambe emikhondweni yakhe.” Ngokuba imfundiso iyakuphuma eSiyoni, nezwi likaBaba wethu eJerusalema. ³Uyakwahlulela phakathi kwezizwe eziningi, axazulule izingxabano zezizwe ezinamandla ezikude. Ziyakukhanda izinkemba zazo zibe ngamakhuba, nemikhonto yazo ibe yizingqamu zokuthena; isizwe asiyikuphakamisela isizwe inkemba, zingasayikuqeqeshelwa impi. ⁴Yilowo nalowo uyakuhlala phansi komvini wakhe nangaphansi komkhiwane wakhe, kungabi khona obethusayo, ngokuba uBaba wamabutho asezulwini uqobo lwakhe ukhulumile. ⁵Ngokuba zonke izizwe zihamba egameni likankulunkulu wazo, kodwa thina siyakuhamba egameni likaBaba wethu kuze kube phakade naphakade.

UBaba Wethu Ubutha Abantwana Bakhe Abahlakazekileyo

⁶Ngalolo suku, kusho uBaba wethu, ngiyakubutha abaqhugayo, ngiqoqe abaxoshiweyo, labo engibahluphileyo. ⁷Ngiyakwenza abaqhugayo babe yinsali, nalabo abaxoshelwe kude babe yisizwe esinamandla, uBaba wethu uyakubusa phezu kwabo eNtabeni iSiyoni kusukela manje kuze kube phakade.

⁸Wena-ke, mbhoshongo womhlambi, gquma lendodakazi yaseSiyoni, kuyakufika kuwe—umbuso wakuqala uyakubuya, umbuso wendodakazi yaseJerusalema.

⁹Manje umemezelani kangaka? Akukho yini inkosi phakathi kwakho? Umeluleki wakho ubhubhile yini, ukuba ubuhlungu bukubambe njengowesifazane obelethayo? ¹⁰Zijikijike ububule, ndodakazi yaseSiyoni, njengowesifazane obelethayo, ngokuba manje uyakuphuma emzini uhlale endle; uyakuya eBabiloni. Lapho uyakukhululwa; lapho uBaba wethu uyakukuhlenga esandleni sezitha zakho.

¹¹Manje izizwe eziningi zibuthene zimelene nawe, zithi: “Makangcoliswe, amehlo ethu abukele iSiyoni ngentokozo.” ¹²Kodwa abazazi imicabango kaBaba wethu; abaliqondi icebo lakhe, lokuthi ubabuthile njengezithungu esibuyeni. ¹³Sukuma ubhule, ndodakazi yaseSiyoni, ngokuba ngiyakwenza uphondo lwakho lube yinsimbi, namasondo akho abe lithusi; uyakuchoboza izizwe eziningi, unikele inzuzo yazo kuBaba wethu, ingcebo yazo kuMbusi womhlaba wonke.