Makanda ya Bantu ke Kwizila na Mongo ya Tata ya beto
Makanda ya bantu ke yuluka na mongo ya Tata ya beto samu na kulongoka, mpe ke bula bambele ya bawu ya mvita na kukumisa yawu mpiosi, konso muntu ke vwanda na yisi ya yinti ya vinu ya yandi mosi kukonda boma. Na manima, meso vutukaka na mambu ya ntangu yayi: Siyone ke mona mpasi ya kubuta, ke basika mpe ke kwenda na Babilone, mpe ba ke gulusa yandi kuna, kasi na nzila yango ve.
Tata ya beto ke zonza na bavese 6–7
4 1Na bilumbu ya nsuka, mongo yina yinzo ya Tata ya beto kele ke vwanda ngolo mutindu mongo ya nene kuluta myongo nyonso, ya kunanguka na zulu ya myongo ya fyoti, mpe makanda ya bantu ke kwizila na yawu. 2Makanda mingi ya bantu ke kwiza mpe ke tuba: «Beno kwiza, beto yuluka na mongo ya Tata ya beto, na yinzo ya Nzambi ya Yakobi, samu ti yandi longa beto banzila ya yandi mpe beto tambula na banzila ya yandi.» Samu ti Musiku ke basika na Siyone, mpe mambu ya Tata ya beto ke basika na Yelusalemi. 3Yandi ke fundisa na kati ya bantu mingi mpe ke katula mambu ya kulwalasana ya makanda ya ngolo yina kele ntama. Bawu ke bula bambele ya bawu ya mvita na kukumisa yawu mpiosi mpe madyonga ya bawu na kukumisa yawu bisengo ya kuzengila bintala; dikanda ke nanguna ve mbele ya mvita na dikanda ya nkaka, mpe bawu ke longoka dyaka ve samu na mvita. 4Konso muntu ke vwanda na yisi ya yinti ya vinu ya yandi mosi mpe na yisi ya yinti ya fike ya yandi mosi, mpe muntu mosi ve ke pesa bawu boma, samu ti Tata ya binwani ya zulu yandi mosi me tuba. 5Samu ti bantu nyonso ke tambula na nkumbu ya nzambi ya bawu mosi, kasi beto ke tambula na nkumbu ya Tata ya beto seko na seko.
Tata ya beto ke Kutikisa Bana ya Yandi yina Mwanganaka
6Na kilumbu yina, Tata ya beto ke tuba, mu ke kutikisa bikata mpe ke vukisa bantu yina ba kulaka, bantu yina mu me nyokola. 7Mu ke kumisa bikata mutindu bantu yina me bikana, mpe bantu yina ba kulaka ntama mutindu dikanda ya ngolo, mpe Tata ya beto ke yala bawu na zulu ya Mongo Siyone kubanda bubu yayi mpe seko.
8Mpe nge, yinzo ya mutela ya mameme, mongo ya mwana-nkento ya Siyone, na nge yawu ke kwiza—kiyalu ya ntama ke vutuka, Kimfumu ya mwana-nkento ya Yelusalemi.
9Ntangu yayi, samu na nki nge ke dila na ngolo? Ntinu kele ve na kati ya nge? Mupesi-malongi ya nge me fwa, samu ti mpasi me simba nge mutindu nkento yina kele na mpasi ya kubuta? 10Mona mpasi mpe kunga, mwana-nkento ya Siyone, mutindu nkento yina kele na mpasi ya kubuta, samu ti ntangu yayi nge ke basika na mbanza mpe nge ke zinga na nseke ya mpamba; nge ke kwenda na Babilone. Kuna, ba ke vuukisa nge; kuna Tata ya beto ke kuula nge na maboko ya bambeni ya nge.
11Ntangu yayi makanda mingi ya bantu me vukana samu na kunwanisa nge, bawu ke tuba: «Bika bawu sumuna yandi, mpe bika meso ya beto tala Siyone na kuseka.» 12Kasi bawu zaba ve mabanza ya Tata ya beto; bawu visa ve lukanu ya yandi, ti yandi me kutikisa bawu mutindu bifunda ya bambuma na kisika ya kukabula bambuma. 13Telama mpe kabula bambuma, mwana-nkento ya Siyone, samu ti mu ke sala ti mpungi ya nge kuvwanda ya kisengo mpe makulu ya nge bisengo ya mbwaki; nge ke kosona bantu mingi, mpe nge ke pesa bima ya bawu na Tata ya beto, bimvwama ya bawu na Mfumu ya ntoto nyonso.