Desh khan amar Pitri laga pahar phale juari ahise
Desh khan amar Pitri laga pahar phale uthi ahibo Tai laga rasta shikhibole, aru tarkhan laga talwar khan ke pitai kene hal-phal bonaibo, aru sob manuh nijor laga angur gach tolete bhoi nathaki kene bohibo. Tetiya kotha tu etiya laga somoi te ghuri ahe: Zion bacha jonom diya dukh te ase, Babylon phale ulai jai, aru ta te uddhar pai, kintu ta jabole rasta pora nabachai.
4 1Hekh din khan te amar Pitri laga ghor thaka pahar tu sob pahar khan majot te sobse uncha hoi kene mojbut hobo, tila khan pora bhi bisi uporte uthai dibo, aru manuh khan eitu phale juari ahibo. 2Bisi desh khan ahi kene kobo, “Ahibi, amikhan amar Pitri laga pahar te, Jacob laga Isor laga ghor te uthi jabo, titia Tar pora amikhan ke Tar laga rasta khan sikhai dibo aru amikhan Tar laga rasta khan te berabo.” Kilemane sikhai diya kotha Zion pora ulabo, aru amar Pitri laga kotha Jerusalem pora ulabo. 3Tar pora bisi manuh khan majot te bisar koribo aru dur te thaka takot desh khan laga jhagara khan thik koribo. Tarkhan laga tarwal khan ke kutikena kheti kora hathiar bonabo aru tarkhan laga barsa khan ke daa bonabo; ekta desh pora dusra desh bhirodh te tarwal nauthabo, aru tarkhan aru kitia bhi lorai kora nasikhibo. 4Sob manuh nijor laga angur ghas nichete aru nijor laga dimoru ghas nichete bohibo, aru kun bhi tarkhan ke bhoi nadibo, kilemane sorgo laga sena khan laga Pitri nijor koi dise. 5Kilemane sob manuh khan nijor laga devta laga nam te berai, kintu amikhan amar Pitri laga nam te hodai aru hodai nimite berabo.
Amar Pitri pora Tar sitri-bitri hoi juwa bacha khan ke joma kore
6Hei din te, amar Pitri koi ase, Moi khora khan ke joma koribo aru khedai diya khan ke eke logote anibo, kun khan ke Moi dukh dise, taikhan ke. 7Moi khora khan ke bachi juwa manuh bonabo, aru dur te khedai diya khan ke takot desh bonabo, aru amar Pitri pora Zion pahar te tarkhan uporte etiya pora aru hodai nimite raj koribo.
8Aru tumi, mer-dol laga pahara-ghor, Zion laga chukri laga tila, tumar logote eitu ahibo—age laga raj wapas ahibo, Jerusalem laga chukri laga rajyo.
9Etiya tumi kile jor pora kandi ase? Tumar majot te raja nai naki? Tumar salah-dewa manuh khotom hoi jaise naki, eitu nimite bacha jonom diya mahila nisena bikhna pora tumi ke dhori loise? 10Bikhna pora mari-poti kore aru kandi thaka, Zion laga chukri, bacha jonom diya mahila nisena, kilemane etiya tumi sheher pora ulai jabo aru khula kheti te thakibo; tumi Babylon te jabo. Ta te tumi ke bachai lobo; ta te amar Pitri pora tumar dushman khan laga hath pora tumi ke mukti dibo.
11Etiya bisi desh khan tumar bhirodh te joma hoi ase, eneka koi kene, “Tai ke letera koribi, aru amikhan laga suku khan Zion ke khushi pora sai thakibi.” 12Kintu tarkhan amar Pitri laga bhabona khan najane; tarkhan Tar laga porikolpona bhi bujhi napare, Tar pora tarkhan ke dhaan mara jagate dhaan muthi khan nisena joma korise, eitu. 13Uthibi aru dhaan mari dibi, Zion laga chukri, kilemane Moi tumar seing ke loha bonabo aru tumar theng-khuri khan ke pitol bonabo; tumi bisi manuh khan ke chenchi dibo, aru tumi tarkhan laga labh amar Pitri ke, tarkhan laga dhun sob prithibi laga Malik ke di dibo.