ሚክያስ 4

4 ¹በመጨረሻው ዘመን የአባታችን ቤት የቆመበት ተራራ ከተራሮች ሁሉ በላይ ጸንቶ ይቆማል፤ ከኮረብቶችም በላይ ከፍ ከፍ ይላል፤ ሕዝቦችም ወደ እርሱ ይጎርፋሉ። ²ብዙ ሕዝቦች መጥተው እንዲህ ይላሉ፤ “ኑ፣ ወደ አባታችን ተራራ፣ ወደ ያዕቆብ አምላክ ቤት እንውጣ፤ መንገዶቹን ያስተምረን ዘንድ፣ በጎዳናዎቹም እንሄድ ዘንድ።” ትምህርት ከጽዮን፣ የአባታችንም ቃል ከኢየሩሳሌም ይወጣልና። ³በብዙ ሕዝቦች መካከል ይፈርዳል፤ ርቀው ላሉ ኀያላን መንግሥታትም ፍርድ ይሰጣል። ሰይፎቻቸውን ማረሻ፣ ጦሮቻቸውንም ማጭድ ያደርጋሉ፤ ሕዝብ በሕዝብ ላይ ሰይፍ አያነሣም፤ ከእንግዲህም ለጦርነት አይለማመዱም። ⁴እያንዳንዱ ከገዛ ወይኑ በታች፣ ከገዛ በለሱም በታች ይቀመጣል፤ የሚያስፈራቸውም አይኖርም፤ የሰማይ ሠራዊት አባት ራሱ ተናግሯልና። ⁵ሕዝቦች ሁሉ በየራሳቸው አምላክ ስም ይመላለሳሉና፤ እኛ ግን ለዘላለም እስከ ዘላለም በአባታችን ስም እንመላለሳለን።

አባታችን የተበተኑ ልጆቹን ይሰበስባል

⁶በዚያ ቀን፣ ይላል አባታችን፣ አንካሶችን እሰበስባለሁ፤ የተባረሩትንም፣ ያስጨነቅኋቸውንም አንድነት እሰበስባለሁ። ⁷አንካሶችን ቀሪ ሕዝብ፣ ርቀው የተጣሉትንም ኀያል ሕዝብ አደርጋለሁ፤ አባታችንም በጽዮን ተራራ ላይ ከአሁን ጀምሮ እስከ ዘላለም ይነግሣቸዋል።

⁸አንተም የመንጋ ግንብ፣ የጽዮን ልጅ ኮረብታ ሆይ፣ ወደ አንተ ይመጣል፤ የቀድሞው ግዛት፣ የኢየሩሳሌም ልጅ መንግሥት ይመለሳል።

⁹አሁን ለምን ትጮኺያለሽ? በመካከልሽ ንጉሥ የለምን? እንደ ምጥ ላይ ያለች ሴት ምጥ ይይዝሽ ዘንድ መካርሽ ጠፍቷልን? ¹⁰የጽዮን ልጅ ሆይ፣ እንደ ምጥ ላይ ያለች ሴት ተጨነቂ፣ አቃስቺ፤ አሁን ከከተማ ትወጫለሽና በሜዳ ላይ ትኖሪያለሽ፤ ወደ ባቢሎንም ትሄጃለሽ። በዚያ ትድኛለሽ፤ በዚያ አባታችን ከጠላቶችሽ እጅ ይቤዥሻል።

¹¹አሁን ብዙ ሕዝቦች በአንቺ ላይ ተሰብስበው እንዲህ ይላሉ፤ “ትርከስ፤ ዓይኖቻችንም በጽዮን ላይ ደስ ይበላቸው።” ¹²እነርሱ ግን የአባታችንን ሐሳብ አያውቁም፤ ዕቅዱንም አያስተውሉም፤ እንደ ነዶ ወደ አውድማ እንደ ሰበሰባቸው። ¹³የጽዮን ልጅ ሆይ፣ ተነሥተሽ ውቂ፤ ቀንድሽን ብረት፣ ሰኰናዎችሽንም ናስ አደርጋለሁና፤ ብዙ ሕዝቦችን ትቀጠቅጫለሽ፤ ትርፋቸውንም ለአባታችን፣ ሀብታቸውንም ለምድር ሁሉ ጌታ ትቀድሻለሽ።